Քարոզչութիւնը մեզ հոգեւորապէս զօրաւոր կը պահէ
1. Քարոզչութիւնը ի՞նչ օգուտ կը բերէ մեզի։
1 Քարոզչութեան մէջ գործունեայ ըլլալը կրնայ մեզ հոգեւորապէս զօրացնել եւ մեր երջանկութիւնը աւելցնել։ Անշուշտ, ծառայութեան կը մասնակցինք գլխաւորաբար Եհովան հաճեցնելու համար։ Սակայն ‘խօսքը քարոզելու’ պատուէրին հնազանդելով, Եհովայի օրհնութիւնը կը ստանանք եւ այլ կերպերով ալ օգուտներ կը քաղենք (Բ. Տիմ. 4։2. Եսա. 48։17, 18)։ Քարոզչութիւնը ի՞նչպէս կրնայ մեզ զօրացնել եւ ուրախացնել։
2. Ծառայութիւնը ի՞նչ կերպերով մեզ կը զօրացնէ։
2 Կը զօրանանք ու կ’օրհնուինք։ Քարոզչութիւնը մեզ կը քաջալերէ, որ Թագաւորութեան օրհնութիւններուն վրայ կեդրոնանանք, քան՝ ներկայ խնդիրներուն վրայ (Բ. Կոր. 4։18)։ Աստուածաշունչի ուսուցումները բացատրելը, Եհովայի խոստումներուն հանդէպ մեր հաւատքը կը զօրացնէ եւ ճշմարտութեան հանդէպ մեր գնահատութիւնը կը կերտէ (Եսա. 65։13, 14)։ Ուրիշներուն օգնելով որ հոգեւորապէս աճին ու ‘աշխարհէն չըլլան’, աշխարհին մէկ մասը չըլլալու մեր կեցուածքը կ’ամրացնենք (Յովհ. 17։14, 16. Հռով. 12։2)։
3. Մեր ծառայութիւնը ի՞նչպէս կ’օգնէ մեզի քրիստոնէական յատկութիւններ մշակելու։
3 Ծառայութեան մասնակցիլը մեզի կ’օգնէ քրիստոնէական յատկութիւններ մշակելու։ Օրինակ, ջանալը որ ‘ամէնուն հետ ամէն բան ըլլանք’, մեզի կ’օգնէ աւելի խոնարհութիւն մշակելու (Ա. Կոր. 9։19-23)։ Երբ ‘հովիւ չունեցող ոչխարներու պէս յոգնած ու ցիրուցան եղած’ անհատներու հետ կը խօսինք, կարեկցութիւն ու համակրանք կը սորվինք (Մատ. 9։36)։ Երբ կը յարատեւենք ի հեճուկս անտարբերութեան կամ հակառակութեան, համբերատարութիւն կը սորվինք։ Ուրիշներուն ի նպաստ զոհողութիւններ ընելը մեր ուրախութիւնը կ’աւելցնէ (Գործք 20։35)։
4. Ծառայութեանդ նկատմամբ ի՞նչպէս կը զգաս։
4 Ի՜նչ օրհնութիւն է ունենալ ծառայութիւն մը, որ մեր պաշտամունքին արժանի եղող Աստուծոյ փառք կը բերէ։ Ծառայութիւնը մեզ կը զօրացնէ։ Անիկա ճոխ օրհնութիւններ կը բերէ անոնց, որոնք լիովին կը զբաղին ‘բարի լուրին մասին հիմնովին վկայութիւն տալով’ (Գործք 20։24, ՆԱ)։