Ուսուցանելու համար՝ լաւ նախապատրաստուէ
1. Աստուածաշունչի ուսումնասիրութիւն մը վարելու ատեն, ինչո՞ւ գնահատութիւն կերտելու վրայ պէտք է կեդրոնանանք։
1 Երբ Աստուածաշունչի ուսումնասիրութիւն մը կը վարենք, լաւ նախապատրաստուած պէտք է ըլլանք, եթէ կ’ուզենք աշակերտը մղել որ Եհովայի ծառայէ։ Մեր ջանքերը արդիւնաբեր պիտի ըլլան, եթէ աստուածաշնչական ճշմարտութեան հանդէպ գնահատանք կերտենք։ Ասիկա իր կարգին աշակերտը պիտի խթանէ (Բ. Օր. 6։5. Առ. 4։23. Ա. Կոր. 9։26)։ Ի՞նչպէս կրնանք ասիկա ընել։
2. Լաւ նախապատրաստութեան մէջ աղօթքը ի՞նչ դեր կը խաղայ։
2 Աղօթելով նախապատրաստուէ։ Քանի որ աշակերտին սրտին մէջ ճշմարտութեան սերմը աճեցնողը Եհովան է, պատշաճ է որ պատրաստութեան սկսինք՝ յատկապէս աշակերտին եւ իր մասնայատուկ կարիքներուն մասին աղօթելով (Ա. Կոր. 3։6. Յակ. 1։5)։ Այսպիսի աղօթքներ կրնան նաեւ մեզի օգնել որոշելու, թէ ի՛նչպէս կրնանք յաւելեալ օգնութիւն տալ, որպէսզի անոր սիրտը Եհովայի կամքին «գիտութիւնովը» լեցուի (Կող. 1։9, 10)։
3. Աշակերտը ի մտի ունենալով՝ ի՞նչպէս կրնանք նախապատրաստուիլ։
3 Աշակերտը ի մտի ունեցիր։ Յիսուս գիտէր թէ ազդուօրէն ուսուցանելը կը պարփակէ՝ ունկնդիրները ի մտի ունենալ։ Առնուազն երկու առիթով, նոյն հարցումը Յիսուսի ուղղուեցաւ. «Ի՞նչ ընեմ որ յաւիտենական կեանքը ժառանգեմ»։ Իւրաքանչիւր անգամին, ան տարբեր մօտեցում գործածելով պատասխանեց (Ղուկ. 10։25-28. 18։18-20)։ Նախապատրաստութեան ատեն աշակերտը ի մտի պէտք է ունենանք։ Անոր հետ ո՞ր նշուած համարները պիտի կարդանք։ Ո՞րքան նիւթ պիտի ջանանք ծածկել։ Դասին ո՞ր կէտերը թերեւս աշակերտը դժուարաւ հասկնայ կամ ընդունի։ Իսկ ակնկալելով կարգ մը յարուցուելիք հարցումներ, կրնանք լաւ պատասխաններ պատրաստել։
4. Լաւ նախապատրաստութիւնը ի՞նչ կը պարփակէ։
4 Նիւթը վերաքաղ ըրէ։ Անցեալին նիւթը որքան ալ ուսումնասիրած ըլլանք, աշակերտին հետ առաջին անգամն է որ զայն պիտի ուսումնասիրենք։ Եթէ կ’ուզենք անոր սրտին հասնիլ, իւրաքանչիւր ուսումնասիրութեան համար լաւ պատրաստուիլը կենսական է։ Ասիկա կը նշանակէ ընել ի՛նչ որ աշակերտը կը քաջալերենք որ ընէ։ Աշակերտը ի մտի ունենալով, նիւթը եւ նշուած համարները աչքէ անցուր ու բանալի կէտերը ընդգծէ (Հռով. 2։21, 22)։
5. Ի՞նչպէս կրնանք Եհովան ընդօրինակել։
5 Եհովա իւրաքանչիւր աշակերտի յառաջդիմութեամբ խորապէս հետաքրքրուած է (Բ. Պետ. 3։9)։ Ժամանակ տրամադրելով որ Աստուածաշունչի իւրաքանչիւր ուսումնասիրութեան համար նախապատրաստուինք, նոյն սիրալիր հետաքրքրութիւնը կը ցուցաբերենք։