«Հիմնովին վկայութիւն տանք» Աստուծոյ Թագաւորութեան մասին
1. Մարտ 14–ով սկսող շաբաթէն սկսեալ, Աստուածաշունչի ժողովքային ուսումնասիրութեան մէջ ի՞նչ գիրք նկատի պիտի առնենք։
1 2011–ի մարտ 14–ով սկսող շաբթուան ընթացքին, Աստուածաշունչի ժողովքային ուսումնասիրութեան մէջ պիտի սկսինք նկատի առնել՝ «Հիմնովին վկայութիւն տանք» Աստուծոյ Թագաւորութեան մասին գիրքը։ Այս հրատարակութիւնը Գործք Առաքելոց գիրքը կը ծածկէ այնպիսի կերպով, որ կարդացողը կարենայ զգալ ատոր մէջ արձանագրուած արագ–ընթացող իրադարձութիւններուն ոգեւորումը։ Համար առ համար մեկնաբանութիւններ տալու տեղ, Վկայութիւն տանք գիրքը Գործք Առաքելոցի արձանագրութիւններէն դասեր կը քաղէ ու մեզի կ’օգնէ որ տեսնենք, թէ ինչպէ՛ս կրնանք անձամբ զանոնք կիրարկել (Հռով. 15։4)։
2. Վկայութիւն տանք գիրքին կարգ մը յատկանշական երեսակները բացատրէ՛։
2 Գիրքին յատկանշական երեսակները։ Էջ 2–ի վրայ տպուած նախաբանը Կառավարիչ մարմինին կողմէ ջերմ նամակ մըն է, որ կը յայտնէ թէ անոնք ինչպէ՛ս կ’ուզեն որ այս հրատարակութենէն օգտուինք։ 2–րդ գլուխէն սկսեալ, սկիզբը կը նշուին Գործք Առաքելոց գիրքին քննարկուելիք համարները, ինչպէս նաեւ տուեալ գլուխին ընդհանուր բովանդակութիւնը։ Շատ մը գլուխներ կը պարունակեն տեղեկատու շրջանակներ, որոնք լրացուցիչ տեղեկութիւններ կը բովանդակեն մարդոց, վայրերու կամ իրադարձութիւններու մասին։ Լայն լուսանցքները թոյլ կու տան որ նշումներ ընենք։ Ամբողջ գիրքը զարդարուած է աստուածաշնչական տեսարաններու մանրակրկիտ նկարներով, որ մեզի օգնեն կարեւոր դէպքերը մտապատկերելու. իսկ վերջին էջին վրայ կայ նկարներու օգտալից ցանկ մը, որ կը բացատրէ թէ զանազան պատկերներու մէջ ի՛նչ բան կը նշուի։ Կողքերուն ետեւի մասերը քարտէսներ են՝ մեզի օգնելու, որ կարենանք հետեւիլ առաջին դարու հաւատակիցներուն յառաջդիմութեան, երբ սկսան բարի լուրը տարածել «մինչեւ երկրին ծայրերը» (Գործք 1։8)։
3. Գործք Առաքելոց գիրքը ուսումնասիրելը ի՞նչ կարեւոր հարցումներու պիտի պատասխանէ։
3 Կարեւոր հարցումներու պատասխաններ։ Գործք Առաքելոց գիրքը նկատի առնելը մեզի պիտի օգնէ, որ քրիստոնէական ծառայութեան վերաբերող կարեւոր հարցումներու պատասխանները յստակօրէն ըմբռնենք։ Օրինակի համար, Յիսուս Քրիստոսի ճշմարիտ հետեւորդները ի՞նչ գործով եւ ի՞նչ պատգամով կը բնորոշուին։ Այս աշխարհածաւալ քարոզչութիւնը ո՞վ կ’առաջնորդէ եւ ինչպէ՞ս։ Հալածանքն ու հակառակութիւնը ի՞նչ պատեհութիւններ կու տան քարոզիչներուն։ Սուրբ հոգին ի՞նչ դեր կը խաղայ մեր ծառայութեան մէջ։
4. Այս հրատարակութեան մեր քննարկումէն ինչպէ՞ս կրնանք լիովին օգտուիլ։
4 Լիովին օգտուելու համար՝ նիւթը կանխաւ ուսումնասիրէ ու նախապատրաստուէ՛ բաժին բերելու ժողովքի քննարկութեան մէջ։ Իւրաքանչիւր ժողովին ներկայ գտնուիր ու խոկա՛ թէ քաղուած դասերը ինչպէ՛ս կրնաս կիրարկել ծառայութեանդ մէջ։ Թող այս հետաքրքրաշարժ հրատարակութեան քննարկութիւնը մեզ խթանէ, որ հիմնովին վկայութիւն տանք Աստուծոյ Թագաւորութեան մասին (Գործք 28։23)։