Ատակ ուսուցիչի մը ամէնէն կարեւոր յատկութիւնը
1. Ի՞նչ է ատակ ուսուցիչի մը ամէնէն կարեւոր յատկութիւնը։
1 Ի՞նչ բան անհատ մը կարող կը դարձնէ Աստուածաշունչի ատակ ուսուցիչ մը ըլլալու։ Աշխարհիկ ուսո՞ւմը, փորձառութի՞ւնը, տաղա՞նդը։ Իրականութեան մէջ, ատիկա այն նոյն յատկութիւնն է որ Օրէնքին կատարումն է, Յիսուսի աշակերտները կը բնորոշէ, եւ Եհովայի գլխաւոր յատկութիւններէն ամէնէն տիրականն ու գրաւիչն է (Յովհ. 13։35. Գաղ. 5։14. Ա. Յովհ. 4։8)։ Ատիկա սէրն է։ Ատակ ուսուցիչները սէր կը ցուցաբերեն։
2. Ինչո՞ւ կենսական է որ մարդիկը սիրենք։
2 Մարդիկը սիրէ։ Մեծ Ուսուցիչը՝ Յիսուս, մարդոց հանդէպ սէր ցուցաբերեց, եւ ասիկա զիրենք մղեց որ իրեն մտիկ ընեն (Ղուկ. 5։12, 13. Յովհ. 13։1. 15։13)։ Եթէ մարդիկը կը սիրենք, ամէն առիթով պիտի վկայենք։ Հալածանքին եւ անտարբերութեան նման խոչընդոտներ մեզ ետ պիտի չպահեն։ Մեր քարոզած անհատներուն հանդէպ անձնական ու անկեղծ հետաքրքրութիւն պիտի ցուցաբերենք եւ իրենց կարիքներուն համաձայն մեր մօտեցումը պիտի յարմարցնենք։ Պիտի ուզենք ժամանակ յատկացնել, ոչ միայն երբ իւրաքանչիւր Աստուածաշունչի աշակերտի հետ ենք, այլ նաեւ երբ իւրաքանչիւրին դասը նախապէս կը պատրաստենք։
3. Աստուածաշնչական ճշմարտութիւնները սիրելը, ծառայութեան մէջ մեզի ինչպէ՞ս պիտի օգնէ։
3 Աստուածաշնչական ճշմարտութիւնները սիրէ։ Յիսուս նաեւ աստուածաշնչական ճշմարտութիւնները սիրեց եւ զանոնք գանձեր նկատեց (Մատ. 13։52)։ Եթէ ճշմարտութիւնը կը սիրենք, խանդավառութեամբ պիտի խօսինք, եւ ասիկա մեր ունկնդիրները կրնայ ոգեւորել։ Այսպիսի սէր մը մեզի պիտի օգնէ որ մեր անհատական սահմանափակումներուն վրայ կեդրոնանալու փոխարէն, մեր հաղորդած թանկարժէք տեղեկութիւններուն վրայ կեդրոնանանք, եւ այսպէս կրնանք ծառայութեան մէջ նուազ ջղագրգիռ ըլլալ։
4. Ինչպէ՞ս կրնանք սէր մշակել։
4 Սէր մշակէ։ Ինչպէ՞ս կրնանք մարդոց հանդէպ սէր մշակել։ Եհովային ու իր Որդիին ցուցաբերած սիրոյն եւ թաղամասի մարդոց ողբալի հոգեւոր վիճակին մասին խոկալով (Մար. 6։34. Ա. Յովհ. 4։10, 11)։ Կանոնաւոր անձնական ուսումնասիրութեամբ եւ խոկալով, աստուածաշնչական ճշմարտութիւններուն հանդէպ մեր սէրը պիտի խորանայ։ Սէրը հոգիին պտուղին մէկ երեսակն է (Գաղ. 5։22)։ Ուստի, կրնանք Եհովայէն սուրբ հոգին խնդրել եւ աղաչել որ մեզի օգնէ սիրոյ մէջ աճելու (Ղուկ. 11։13. Ա. Յովհ. 5։14)։ Մեր աշխարհիկ ուսումը, ճշմարտութեան մէջ փորձառութիւնը կամ տաղանդը ի՛նչ որ ալ ըլլայ, կրնանք Աստուածաշունչի ազդու ուսուցիչ ըլլալ՝ սէր ցուցաբերելով։