Եհովան գովաբանելու յաւելեալ պատեհութիւններ
1. Ի՞նչ նոր կարգադրութիւն մեզի պիտի օգնէ որ ‘Եհովան շատ գովաբանենք’։
1 Անցեալ մարտ ամսուն, ի զօրու դարձաւ նոր կարգադրութիւն մը, որ հրատարակիչներուն պատեհութիւն կու տայ օժանդակ ռահվիրայութիւն ընելու 30 ժամով, թէ՛ մարտ եւ թէ ապրիլ ամիսները, ինչպէս նաեւ շրջանային տեսուչին այցելութեան ամսուան ընթացքին։ Եթէ շրջանային տեսուչի կանոնաւոր այցելութեան շաբաթը երկու ամիսներու միջեւ կը զուգադիպի, այն հրատարակիչները որ ռահվիրայութեան կը դիմեն 30 ժամ պահանջով, կրնան այդ երկու ամիսներէն ընտրել ո՛ր մէկը որ կ’ուզեն։ Այս կը նշանակէ որ եթէ 50 ժամով ծառայելը մեզի համար դժուար է, տակաւին կրնանք տարին մինչեւ չորս անգամ՝ 30 ժամով, ‘Եհովան շատ գովաբանել’ որպէս օժանդակ ռահվիրաներ (Սաղ. 109։30, ՆԱ. 119։171)։ Ասկէ զատ, իւրաքանչիւր այցելութեան, շրջանային տեսուչը ժողով մը կ’ունենայ կանոնաւոր ու մասնաւոր ռահվիրաներուն հետ։ Բոլոր օժանդակ ռահվիրաները կրնան այդ ժողովին ամբողջ յայտագրին ներկայ գտնուիլ։
2. Շրջանային տեսուչին այցելութեան ընթացքին օժանդակ ռահվիրայ եղողները ի՞նչ պիտի վայելեն։
2 Շրջանային տեսուչին այցելութեան ընթացքին։ Այժմ շատ աւելի անհատներ պիտի կարենան օժանդակ ռահվիրայ ըլլալ շրջանային տեսուչին այցելութեան ընթացքին, եւ իրեն հետ ծառայելով պիտի վայելեն փոխադարձ քաջալերութիւն (Հռով. 1։11, 12)։ Օժանդակ ռահվիրաներէն շատեր հաւանաբար պիտի ուզեն շաբթուան ընթացքին արձակուրդ առնել, տեսուչին հետ ծառայելու համար։ Անոնք որոնք շաբթուան մէջ կ’աշխատին, կրնան իրեն հարցնել եթէ կրնայ իրենց հետ ծառայել շաբաթ կամ կիրակի օրը։ Ասկէ զատ, օժանդակ ռահվիրաներուն համար որքա՜ն քաջալերական պիտի ըլլայ, կանոնաւոր եւ մասնաւոր ռահվիրաներուն հետ մէկտեղ ռահվիրայական ժողովին ներկայ գտնուիլ։
3. Ինչո՞ւ յիշատակատօնի շրջանը հոյակապ ժամանակ մըն է օժանդակ ռահվիրայ ըլլալու։
3 Մարտ եւ ապրիլ ամիսներուն ընթացքին։ Անոնք որոնք օգտուեցան նախկին կարգադրութենէն՝ մէկ ամիս 30 ժամով ռահվիրայ ըլլալու Յիշատակատօնի շրջանին, այժմ կրնան կրկնապատկել իրենց «օրհնութեան պատարագ»ը (Եբ. 13։15)։ Թէ՛ մարտը եւ թէ ապրիլը հոյակապ ամիսներ են մեր ծառայութիւնը աւելցնելու որպէս օժանդակ ռահվիրաներ։ Ամէն տարի այդ ամիսներուն ընթացքին, հաճոյալի արշաւի մը կը մասնակցինք մարդիկը հրաւիրելու որ Յիշատակատօնին ներկայ գտնուին։ Ասկէ զատ, քանի որ շատեր Յիշատակատօնի շրջանին իրենց ծառայութիւնը կ’աւելցնեն, կրնանք զանազան հրատարակիչներու հետ ծառայել։ Յիշատակատօնէն ետք, ներկայ գտնուած անհատներուն հետաքրքրութիւնը կը հետապնդենք, եւ իրենց մէջ խանդավառութիւն կ’արթնցնենք՝ հանրային մասնաւոր դասախօսութիւնը ունկնդրելու։ Արդեօք պիտի օգտուի՞ս այս յաւելեալ պատեհութիւններէն եւ պիտի մղուի՞ս օժանդակ ռահվիրայ ըլլալու (Ղուկ. 6։45)։