Ներկայացումի նմոյշներ
Փետրուար ամսուան առաջին շաբաթ օրը Աստուածաշունչի ուսումնասիրութիւններ սկսելու համար
«Շատեր Աստուածաշունչին մասին տարբեր կարծիքներ ունին։ Ոմանք կը հաւատան, թէ անիկա Աստուծոյ Խօսքն է, մինչ ուրիշներ՝ զայն սովորական գիրք մը կը նկատեն։ Դո՞ւք ինչ կը խորհիք Աստուածաշունչին մասին»։ Թոյլ տուր որ պատասխանէ։ Ցոյց տուր Դիտարան–ի 1 փետրուար թիւին ետեւի կողքը եւ միասնաբար նկատի առէք առաջին հարցումին տակ գտնուող նիւթն ու նշուած համարներէն առնուազն մէկը։ Պարբերաթերթերը առաջարկէ եւ յաջորդ հարցումը քննարկելու համար վերադառնալու կարգադրութիւն ըրէ։
Դիտարան 1 փետրուար
«Մարդոց մեծամասնութիւնը կը ցանկայ որ պատերազմը դադրի։ Կը կարծէ՞ք թէ համաշխարհային խաղաղութիւնը իրապաշտ նպատակակէտ մըն է։ [Թոյլ տուր որ պատասխանէ։] Տեսէք թէ Աստուածաշունչը ի՛նչ կը խոստանայ։ [Կարդա՛ Սաղմոս 46։9։] Հետաքրքրական է որ Ա. Աշխարհամարտին եւ անկէ ետք պատահած դէպքերը մեզ կը վստահեցնեն, թէ շատ շուտով Աստուած այս մարգարէութիւնը պիտի կատարէ եւ յաւիտեան պատերազմին վերջ դնէ։ Իսկ այս պարբերաթերթը այս մէկը կը բացատրէ»։
Զարթի՛ր փետրուար
«Եկած ենք համատարած խնդիր մը քննարկելու համար։ Այնպէս կը թուի, թէ երբեք բաւարար ժամանակ չենք ունենար ամէն բան իրագործելու։ Կը կարծէ՞ք թէ մեր յայտագիրը լեցուն է քանի որ ընելիք շատ բան ունինք, թէ ոչ քանի որ շատ ժամանակ կը կորսնցնենք։ [Թոյլ տուր որ պատասխանէ։] Շատեր չեն գիտեր, թէ Աստուածաշունչը գործնական խրատներ կու տայ օգնելու որ մեր ժամանակը դասաւորենք։ Ահաւասիկ օրինակ մը։ [Կարդա՛ Փիլիպպեցիս 1։10ա։] Այս պարբերաթերթը կը քննարկէ չորս մեթոտներ, որոնք մարդոց օգնած են՝ որ ժամանակը աւելի իմաստութեամբ գործածեն»։