Ծառայութեան մէջ jw.org կայքը գործածէ
Մեր կայքը արժէքաւոր գործիք մըն է, որ մեզի կ’օգնէ բարի լուրը տարածելու «մինչեւ երկրին ծայրերը» (Գործք 1։8)։ Տանտէրերուն մեծամասնութիւնը չի գիտեր jw.org կայքի մասին, մինչեւ որ հրատարակիչ մը զիրենք դէպի մեր կայքը չուղղէ։
Շրջագայող տեսուչ մը իր հեռախօսիկին մէջ բեռնած է Ինչո՞ւ Աստուածաշունչը ուսումնասիրել տեսաերիզը, եւ ամէն անգամ որ առիթ ունենայ զայն մարդոց ցոյց կու տայ։ Օրինակ, տունէ տուն ծառայութեան ընթացքին, ան տանտիրոջ կ’ըսէ. «Մեր կարճ այցելութեան նպատակն է՝ մարդոց օգնել որ երեք կարեւոր հարցումներու պատասխանները առնեն. աշխարհի մէջ ինչո՞ւ ա՛յսքան խնդիրներ կան։ Աստուած ինչպէ՞ս պիտի լուծէ զանոնք։ Եւ ինչպէ՞ս կրնանք հիմա անոնց հետ գլուխ ելլել։ Այս կարճ տեսաերիզը այդ հարցումներուն կը պատասխանէ»։ Ապա ան տեսաերիզը կ’աշխատցնէ եւ տանտիրոջ հակազդեցութեան կը նայի։ Տեսաերիզը ա՛յնքան գրաւիչ է, որ մարդոց մեծամասնութիւնը զայն ուշի–ուշով մինչեւ վերջ կը դիտէ։ Ապա շրջագայող տեսուչը կ’ըսէ. «Լսեցիք թէ կրնաք Աստուածաշունչի առցանց ուսումնասիրութիւն մը խնդրել։ Քանի որ հոս եմ, կրնամ ձեզի արագօրէն ցոյց տալ թէ ինչպէ՛ս կրնաք այդ մէկը ընել»։ Եթէ տանտէրը ընդունի, ան ուսումնասիրութիւնը վարելու կերպը կը ցուցադրէ, գործածելով՝ Ուրախ լուրեր գրքոյկը։ Իսկ եթէ տանտէրը ժամանակ չունենայ, ան կարգադրութիւն կ’ընէ որ յաջորդ այցելութեան այս մէկը ընէ։ Երբ տեսուչը սրճարան մտնէ դադար մը առնելու, իրեն մօտ նստող անհատին հետ նոյն մօտեցումը կը գործածէ, ընկերային խօսակցութիւն մը ունենալէ ետք։ Ի՞նչ կարելի է ըսել քու մասիդ։ Ծառայութեան մէջ jw.org կայքը կը գործածե՞ս։