Ծառայութեան մէջ հմտութիւնդ բարելաւէ. Պարբերաթերթերը կանոնաւորաբար տալ
Ինչո՛ւ կարեւոր է։ Շատեր, որոնք մեր պարբերաթերթերը հաճոյքով կը կարդան, չեն փափաքիր մեզի հետ Աստուածաշունչը սերտել։ Թերեւս անոնք իրենց կրօնքով բաւարարուած են, կամ ալ կը զգան թէ ուսումնասիրելու ժամանակ չունին։ Բայց մինչ կանոնաւորաբար մեր պարբերաթերթերը կը կարդան, թերեւս Աստուծոյ Խօսքին հանդէպ սէր մշակեն (Ա. Պետ. 2։2)։ Թերեւս որոշ յօդուած մը իրենց սրտին դպչի, կամ իրենց պարագաները փոխուին։ Կանոնաւոր եւ կարճ այցելութիւնները թոյլ պիտի տան, որ անոնք մեզի հետ աւելի հանգիստ զգան, ինչպէս նաեւ մեզի պիտի օգնեն, որ անոնց հետաքրքրութիւններն ու մտահոգութիւնները գիտնանք։ Ի վերջոյ, կարելի է Աստուածաշունչի ուսումնասիրութիւն մը սկսիլ։
Ինչպէ՛ս վկայել։
• Ամէն ամիս ժամանակ յատկացուր անհատին տանելու Դիտարան–ի եւ Զարթի՛ր–ի վերջին թիւերը։ Կրնաս ամսուան ընթացքին ուրիշ ատեններ ալ այցելել՝ պարբերաթերթերուն մէկ յօդուածը կարդալու իր փափաքը աւելցնելու կամ այդ ամսուան հրատարակութիւնը առաջարկելու համար։ Նոթագրէ (տե՛ս Մեր Թագաւորութեան ծառայութիւնը թերթիկին յունուար 2014 թիւը, էջ 3)։
• Իւրաքանչիւր այցելութեան պատրաստուէ։ Փոխանակ պարզապէս պարբերաթերթերը տալու, տանտիրոջ հետ խօսակցէ եւ բարեկամական եղիր որ կարենաս իր հետաքրքրութիւնը մշակել։
• Պատեհութիւնները օգտագործէ ուսումնասիրութիւն մը սկսելու։ Եթէ կանոնաւորաբար պարբերաթերթ ստացող անհատը քեզի հարցնէ թէ որոշ նիւթի մը նկատմամբ Աստուածաշունչը ի՛նչ կ’ըսէ, իրեն տար ուսումնասիրութեան հրատարակութիւն մը, որուն մէջ իր հարցումին պատասխանը կայ եւ զայն միասին քննարկեցէք։ Մեկնելէ առաջ, հարցում մը ուղղէ եւ յաջորդ այցելութեան զայն քննարկէ։ Եթէ կանոնաւորաբար եւ նիւթ առ նիւթ հակիրճ քննարկութիւններ կ’ընես՝ գործածելով Աստուածաշունչը կամ այլ ուսումնասիրութեան հրատարակութիւններ, այս կը նշանակէ թէ Աստուածաշունչի ուսումնասիրութիւն մը կը վարես։ Տանտիրոջ առաջարկա՞ծ ես Ուրախ լուրեր գրքոյկը եւ Աստուածաշունչի կարճ ուսումնասիրութիւն մը ցուցադրա՞ծ ես։ Իրեն ցոյց տուա՞ծ ես Ինչո՞ւ Աստուածաշունչը ուսումնասիրել եւ Աստուածաշունչի ուսումնասիրութիւնը ինչպէ՞ս կ’ըլլայ տեսաերիզները։ Նոյնիսկ եթէ անհատը անցեալին չէր ուզեր ուսումնասիրել, պարագաները կրնան փոխուիլ։ Անոր համար լաւ կ’ըլլայ որ դարձեալ փորձես ուսումնասիրութիւն առաջարկել։
Այս ամսուան ընթացքին, հետեւեալը փորձէ.
• Պարբերաթերթերը կանոնաւորաբար առնողներուն անուններու ցանկ մը պատրաստէ։ Անոնց առաջարկէ պարբերաթերթերուն ընթացիկ թիւերը եւ ըսէ որ յաջորդ թիւն ալ իրենց պիտի տանիս։