Աստուծոյ մասին կը սորվինք իր մարգարէներէն

ԱԲՐԱՀԱՄ

Աստուած անկողմնակալ է եւ կ’ուզէ բոլոր մարդիկը օրհնել։

Աստուած Աբրահամ մարգարէին խոստացաւ. «Երկրի բոլոր ազգերը քեզմով պիտի օրհնուին» (Ծննդոց 12։3)։

Ի՞նչ կը սորվինք։ Աստուած մեզ շատ կը սիրէ եւ կ’ուզէ օրհնել իրեն հնազանդող բոլոր ընտանիքները,– տղամարդիկ, կիներ եւ երեխաներ։

ՄՈՎՍԷՍ

Աստուած ողորմած է եւ կ’օրհնէ անոնք, որոնք կը ջանան զինք ճանչնալ։

Ամենակարող Աստուած Մովսէս մարգարէին զօրութիւն տուաւ մեծ հրաշքներ կատարելու։ Այսուհանդերձ, Մովսէս աղօթեց. «Ինծի ցուցուր. . . քու ճամբադ՝ որպէս զի ճանչնամ քեզ, այնպէս որ քու առջեւդ շնորհք գտնեմ» (Ելից 33։13)։ Աստուծոյ հաճելի երեւցաւ Մովսէսին խնդրանքը, եւ անոր տուաւ իր ճամբաներուն ու յատկութիւններուն նկատմամբ աւելի գիտութիւն եւ հասկացողութիւն։ Օրինակ, Մովսէս սորվեցաւ որ Ստեղծիչը «ողորմած ու բարերար» Աստուած է (Ելից 34։6, 7)։

Ի՞նչ կը սորվինք։ Աստուած կ’ուզէ բոլորս օրհնել,– տղամարդիկ, կիներ եւ երեխաներ,– եթէ ջանանք զինք աւելի լաւ ճանչնալ։ Ան Սուրբ Գրութիւններուն մէջ կը նշէ, թէ ինչպէ՛ս կ’ուզէ որ զինք պաշտենք եւ թէ ինք շա՜տ կը փափաքի իր հաճութիւնն ու օրհնութիւնը շնորհել մեզի։

ՅԻՍՈՒՍ

Կրնանք Աստուծոյ յաւիտենական օրհնութիւնները վայելել, եթէ սորվինք Յիսուսին մասին, ինչպէս նաեւ իր ըրածներուն ու սորվեցուցածներուն մասին։

Աստուծոյ Խօսքը շատ մանրամասնութիւններ կը բովանդակէ Յիսուսի կեանքին եւ ուսուցումներուն մասին։ Աստուած Յիսուսին զօրութիւն տուաւ բազմաթիւ հրաշքներ ընելու, ինչպէս՝ կոյրերը, խուլերը եւ անդամալոյծները բժշկել։ Յիսուս նոյնիսկ մեռելները ետ կեանքի բերաւ։ Այսպէս ան յայտնեց, թէ Աստուած ապագային ի՛նչ օրհնութիւններ պիտի տեղացնէ ամբողջ մարդկութեան վրայ։ Յիսուս բացատրեց թէ իւրաքանչիւրս ինչպէ՛ս կրնանք այդ օրհնութիւնները վայելել, ըսելով. «Այս է յաւիտենական կեանքը, որ ճանչնան քեզ միմիայն ճշմարիտ Աստուածդ ու Յիսուս Քրիստոսը, որ դուն ղրկեցիր» (Յովհաննէս 17։3)։

Յիսուս կարեկից, քնքուշ ու ազնիւ էր։ Տղամարդիկ ու կիներ, երիտասարդներ ու տարեցներ, իր շուրջ կը հաւաքուէին՝ ընդառաջելով իր ջերմ հրաւէրին. «Ինձմէ սորվեցէք՝ որ հեզ եմ ու սրտով խոնարհ եւ ձեր անձերուն հանգստութիւն պիտի գտնէք» (Մատթէոս 11։29)։ Յիսուսի օրերուն շատեր կիներուն հետ գէշ կերպով կը վարուէին, բայց ինք անոնց հետ ազնուութեամբ, արժանապատուութեամբ եւ յարգանքով վարուեցաւ։

Ի՞նչ կը սորվինք։ Յիսուս մարդիկը խորապէս սիրեց եւ հոյակապ օրինակ ձգեց, թէ իրարու հետ ինչպէ՛ս պէտք է վարուինք։

ՅԻՍՈՒՍ ԱՍՏՈՒԱԾ ՉԷ

Սուրբ Գրութիւնները կը սորվեցնեն, թէ «մենք մէկ Աստուած ունինք» եւ թէ Յիսուս Քրիստոս Աստուծոյ խոնարհ պատգամաւորն էր (Ա. Կորնթացիս 8։6)։ Յիսուս յստակօրէն ըսաւ, թէ Աստուած իրմէ մեծ է եւ թէ Աստուած զինք երկիր ղրկեց (Յովհաննէս 11։41, 42. 14։28)a։