Ծառայութեան մէջ հմտութիւնդ բարելաւէ. Վերայցելել

ԻՆՉՈ՞Ւ ԿԱՐԵՒՈՐ Է։ Շատեր՝ որոնք Թագաւորութեան պատգամով կը հետաքրքրուին, Աստուծոյ մասին ճշմարտութիւնը կը փնտռեն (Եսա. 55։6)։ Որպէսզի կարենանք անոնց աստիճանաբար սորվեցնել, պէտք է կրկին անգամ վերայցելենք։ Մարդիկ տարբեր տեսակի դժուարութիւններ ունին, անոր համար անոնց հետաքրքրութիւնը աւելցնելու կերպը անձէ անձ կը տարբերի։ Բայց մենք պատգամը աւելի ազդու կերպով պիտի փոխանցենք, եթէ լաւ պատրաստուինք եւ ամէն մէկ այցելութեան համար նպատակ մը դնենք. եւ անշուշտ մեր գլխաւոր նպատակը պէտք է ըլլայ Աստուածաշունչի ուսումնասիրութիւն սկսիլ։

ԻՆՉՊԷ՞Ս ՎԵՐԱՅՑԵԼԵԼ

• Ջանք թափէ որ շուտով վերայցելես, թերեւս քանի մը օրուան մէջ (Մատ. 13։19)։

• Ընկերային եղիր եւ յարգանքով վարուէ։ Փորձէ ջղագրգիռ չըլլալ։

• Նախ ջերմ բարեւ մը տուր։ Յետոյ անհատին հետ խօսէ իր անունը յիշելով։ Իրեն յիշեցուր որ ինչո՛ւ ետ եկար. թերեւս եկար որ հարցումի մը պատասխանես, ամէնէն վերջին պարբերաթերթը բերես, մեր կայքը ցոյց տաս, վիտէօ մը ցոյց տաս կամ Աստուածաշունչի ուսումնասիրութիւն մը ցուցադրես։ Եթէ տեսնես որ տանտէրը ուրիշ նիւթով մը հետաքրքրուած է, ա՛յդ նիւթին մասին խօսէ (Փլպ. 2։4)։

• Իր սրտին մէջի ցանուած ճշմարտութիւնը ջրէ՝ Սուրբ Գիրքէն կէտի մը մասին խօսելով եւ թերեւս հրատարակութիւն մը տալով (Ա. Կոր. 3։6)։ Փորձէ իրեն հետ լաւ կապ հաստատել։

• Յաջորդ վերայցելութեան ճամբայ հարթէ։