Պահէ՛

Արեան կոտորակները եւ արիւնս պարփակող բժշկական գործընթացները ի՞նչպէս կը նկատեմ

Աստուածաշունչը Քրիստոնեաներուն կը պատուիրէ որ ‘արիւնէ ետ կենան’։ (Գործք 15։20) Ուստի Եհովայի Վկաները չեն ընդունիր թէ՛ ամբողջական արեան ներարկումը եւ թէ արեան չորս գլխաւոր բաղկացուցիչներուն ներարկումը,– այսինքն՝ կարմիր գնդիկներ, ճերմակ գնդիկներ, թիթեղիկներ եւ ջրարիւն։ Անոնք նաեւ չեն նուիրեր իրենց արիւնը, ո՛չ ալ զայն կը մթերեն ներարկման համար։—Ղեւտ. 17։13, 14. Գործք 15։28, 29

Արիւնէն հանուած կոտորակները ի՞նչ են եւ անոնց գործածութիւնը ինչո՞ւ իւրաքանչիւր Քրիստոնեայի ձգուած հարց է

Արեան կոտորակները տարրեր են, որոնք կոտորակում կոչուած գործողութեամբ արիւնէ կը հանուին։ Օրինակ, արեան չորս գլխաւոր բաղկացուցիչներէն մէկը՝ ջրարիւնը, կարելի է կոտորակել հետեւեալ կերպով. ջուր (շուրջ 91%). փրոթէիններ, ինչպէս՝ բնասպիտներ, կլոպուլիններ ու նեարդինածին (շուրջ 7%). եւ այլ նիւթեր, ինչպէս՝ սնուցիչներ, մղօններ, կազեր, կենսանիւթեր, ելեկտրալոյծեր ու անգործածելի տարրեր (շուրջ 1,5%)։

Արիւնէ ետ կենալու պատուէրը արեան կոտորակներն ալ կը պարփակէ՞։ Որոշ պատասխան չունինք։ Աստուածաշունչը կոտորակներուն վերաբերեալ մասնայատուկ ուղղութիւն չի տար։a Անշուշտ, բժշկական նպատակներու համար նուիրուած արիւնէն բազմաթիւ կոտորակներ կը հանուին։ Իւրաքանչիւր Քրիստոնեայ խղճմտօրէն որոշում պէտք է կայացնէ թէ այս նիւթերուն բժշկական գործածութիւնը պիտի ընդունի՞ թէ պիտի մերժէ։

Երբ այսպիսի որոշումներ պիտի կայացնես, հետեւեալ հարցումները նկատի առ. կը գիտակցի՞մ թէ արեան բոլոր կոտորակները մերժելը կը նշանակէ թէ կարգ մը դեղեր պիտի չընդունիմ, ինչպէս՝ ժահրերու եւ հիւանդութիւններու դէմ պայքարող դեղեր, կամ արիւնահոսութիւնը կասեցնելու նպաստող դեղեր։ Կրնա՞մ բժիշկին բացատրել թէ ինչո՛ւ արեան որոշ կոտորակի մը գործածութիւնը կ’ընդունիմ կամ կը մերժեմ։

Ինչո՞ւ արեանս բժշկական գործածութիւնը պարփակող կարգ մը գործընթացներ անձնական որոշում են

Թէեւ Քրիստոնեաները ներարկումի համար իրենց արիւնը ո՛չ կը նուիրեն, ո՛չ ալ կը մթերեն, բայց արեան վերաբերեալ կարգ մը գործընթացներ կամ քննութիւններ յստակօրէն չեն հակասեր Աստուածաշունչի սկզբունքներուն։ Հետեւաբար, իւրաքանչիւր անհատ խղճմտօրէն պէտք է որոշէ թէ իր արեան գործածութիւնը պարփակող կարգ մը բժշկական գործընթացներ պիտի մերժէ՞ թէ ընդունի։

Երբ այսպիսի որոշումներ պիտի կայացնես, դուն քեզի հարց տուր. եթէ արիւնէս մաս մը մարմինէս դուրս պիտի ուղղուի եւ թերեւս անոր հոսքը նոյնիսկ ժամանակ մը ընդհատուի, իմ խիղճս թոյլ պիտի տա՞յ որ այս արիւնը նկատեմ տակաւին իմ մէկ մասս եւ ո՛չ թէ՝ ‘գետին թափուելիք’։ (Բ. Օր. 12։23, 24) Աստուածաշունչով մարզուած խղճմտանքս պիտի տանջուի՞, եթէ բժշկական գործընթացի մը ընթացքին արիւնէս մաս մը քաշուի, բարեփոխուի եւ վերադարձուի մարմնիս մէջ։ Կը գիտակցի՞մ թէ արեանս գործածութիւնը պարփակող բոլոր բժշկական գործընթացները մերժելը կը նշանակէ թէ չեմ ընդունիր արհեստական երիկամունքի կամ սիրտ–թոքի մեքենային գործածութիւնը։ Որոշում մը կայացնելէ առաջ, այս հարցը ջերմեռանդ աղօթքով նկատի առա՞ծ եմ։b

Անձնական որոշումներս ի՞նչ են

Յաջորդ էջերու երկու հարցացուցակները նկատի առ։ Հարցացուցակ 1 ցոյց կու տայ արիւնէն հանուած կարգ մը կոտորակներ եւ անոնց գործածութիւնը բժշկութեան մէջ։ Հարցացուցակին մէջ նշէ որոշումդ թէ ո՛ր կոտորակի գործածութիւնը պիտի ընդունիս կամ մերժես։ Հարցացուցակ 2 ցոյց կու տայ արիւնդ պարփակող կարգ մը բժշկական գործընթացներ։ Հարցացուցակին մէջ նշէ որոշումդ թէ ո՛ր գործընթացը պիտի ընդունիս կամ մերժես։ Այս հարցացուցակները օրինական փաստաթուղթեր չեն, բայց նշած պատասխաններդ կրնաս գործածել Մնայուն Փոխանորդագիրդ ամբողջացնելու համար։

Որոշումներդ անձամբ պէտք է կայացնես եւ զանոնք պէտք չէ հիմնես ուրիշի մը խղճմտանքին վրայ։ Նաեւ, ո՛չ ոք ուրիշ Քրիստոնեայի մը որոշումները պէտք է քննադատէ։ Այս հարցերուն մէջ, «ամէն մէկը իր [պատասխանատուութեան] բեռը պիտի կրէ»։—Գաղ. 6։4, 5

[Ստորանիշներ]