Ծառայութեան մէջ հմտութիւնդ բարելաւէ. Աստուածաշունչի աշակերտները մարզել որ ուսումնասիրելու լաւ սովորութիւն զարգացնեն
Ինչո՛ւ կարեւոր է։ Հոգեւոր հասունութեան հասնելու համար, հարկ է որ Աստուածաշունչի աշակերտները Աստուծոյ Խօսքին հիմնական ուսուցումներով սնուցանուելէն զատ իրենց միտքն ու սիրտը սնուցանեն այլ բաներով (Եբ. 5։12–6։1)։ Ուսումնասիրելը ջանք կը պահանջէ։ Անիկա կը պարփակէ նոր տեղեկութիւն մը կապել մեր արդէն իսկ գիտցած տեղեկութիւններուն հետ եւ ատոր գործնական արժէքը զատորոշել (Առ. 2։1-6)։ Անձնական պրպտում ընելը աշակերտներուն պիտի օգնէ որ Աստուածաշունչի վրայ հիմնուած հարցումներու պատասխանեն՝ մեր քրիստոնէական հրատարակութիւնները գործածելով։ Իրենց սորվածը կիրարկելու անկեղծ ջանքը զիրենք պիտի պատրաստէ գալիք փորձութիւններուն տոկալու (Ղուկ. 6։47, 48)։
Ինչպէ՛ս մարզել։
• Շեշտէ թէ որքա՛ն կարեւոր է որ նախքան իւրաքանչիւր ուսումնասիրութեան սկսիլը, աշակերտը աղօթքի միջոցաւ Եհովային օգնութիւնը խնդրէ (Յովհ. 14։26. Ա. Կոր. 2։10)։
• Սկիզբէն իսկ աշակերտը քաջալերէ որ Աստուածաշունչի ուսումնասիրութեան նախապատրաստուի։ Իրեն ցոյց տուր քու հրատարակութիւնդ, եւ սորվեցուր ինչպէ՛ս ընդգծել միայն բանալի բառերը կամ արտայայտութիւնները։
• Թող աշակերտդ իր բառերով հարցումներուն պատասխանէ։ Ուսումնասիրութիւնը թող չըլլայ միայն հարց–պատասխանի նիստ մը, ուր աշակերտը պարզապէս պատասխանները գրքէն կը կարդայ։
• Աշակերտդ քաջալերէ որ ամէն օր Աստուծոյ Խօսքէն հատուած մը կարդայ։ Իրեն ցոյց տուր jw.org կայքին մէջ գտնուող Աստուածաշունչի ընթերցանութեան յայտագիրը, որ ասիկա ընելու գործնական կերպը ցոյց կու տայ։ Ամէն օր Աստուածաշունչը կարդալու սովորութիւնը վճռականութիւն կը պահանջէ, բայց կ’արժէ՛ ջանք թափել (Սաղ. 1։2, 3)։
• Աշակերտիդ ցոյց տուր թէ ինչպէ՛ս կրնայ Աստուածաշունչի վրայ հիմնուած հարցումներու պատասխանները գտնել գործածելով Դիտարանի գրադարան–ը եւ Դիտարանի ԱՌՑԱՆՑ ԳՐԱԴԱՐԱՆ–ը։ Իրեն օգնէ որ զատորոշէ մեր ժողովքային հանդիպումներուն մէջ սովորաբար գործածուող հրատարակութիւններուն նշանները (զոր օրինակ՝ bh, lv, jl եւ այլն)։
Այս ամսուան ընթացքին, հետեւեալը փորձէ.
• Գլուխի մը կամ ենթավերնագրի մը վերջաւորութեան, Աստուածաշունչի աշակերտէդ խնդրէ որ քանի մը նախադասութիւնով ամփոփէ թէ ի՛նչ սորվեցաւ։ Եթէ աշակերտ չունիս, փորձէ քանի մը նախադասութիւնով Աստուածաշունչէն հատուած մը կամ Դիտարան–էն պարբերութիւն մը ամփոփել, կարդալու ըմբռնումդ բարելաւելու համար։