Pakastan i Abilidad Tam ta Ministerio​—Panguffun ta Bible Study nga Mappange ta Dedikasion Anna Bawtismo

NU NGATTA IMPORTANTE: Tapenu malawàda i fabor ni Jehova, mawag tu maddedika anna mabawtisowan i Bible study ira. (1Pe 3:21) Maprotektan noka ira ta espiritual nu mattolay ira nga mekunnay ta dedikasiodda. (Sal 91:1, 2) Maddedika i tadday nga Cristiano kani Jehova​—ari tu ta tolay, trabahu, onu organisasion. Mawag gafu tu dumakal i pangaya anna pangappresia na estudiante ira ta Dios.​—Ro 14:7, 8.

NU KUNNASI NGA KUAN:

• Ta paggigiammunu, paguvovugan nu anni i kayà kagian na material meyannung kani Jehova. Ipasingan i importansia na pabbibbig tu Biblia kadaggaw anna paddasal kani Jehova ta “ngamin nga tiempo.”​—1Te 5:17; San 4:8

• Pagaramman i estudiantem nga kuanna tu espiritual nga addetan i dedikasion anna bawtismo. Uffunan gapa yaya nga maggawa tu simple ira nga addetan, gitta na pakkomento ta study onu pallayyagayya ta karruba anna katrabahuna. Daddamman nga ari tu fuersan ni Jehova nga masserbi sa i maski sinni. Personal nga desision i paddedika.​—De 30:19, 20

• Paguyuan i estudiantem nga magangngua tu kawagan nga panguli tapenu mapagayayana si Jehova anna makualipika para ta bawtismo. (Pr 27:11) Monag i nikegamu na piga nga ugu-ugali anna nakasanayan na Bible study, yari tu mawagna i tulu-tuloy nga uffun tapenu malsana i dana nga personalidad tapus iyusana i bagu. (Ef 4:22-24) Ipasingammu sa i artikulo ira ta serye na Passifusifutan nga “Pakastan na Biblia i Pattolay”

• Iyistoriam sa i pagayaya nga naekspiriensam ta passerbim kani Jehova.​—Isa 48:17, 18