Duffunan i Bible Study ira Tapenu Madesisiodda nga Masserbi Kani Jehova

1-2. (a) Ngatta egga ira i Bible study nga marigatan nga maddesision nga mabbalin tu Saksi? (b) Anni i gigiammuattam taw nga artikulo?

NARIGATAKKA kari tagga nga maddesision nga mabbalin tu Saksi ni Jehova? Baka naganassikka nga ikalussaw naka na katrabahum, kokkofummu, onu na kafamiliam. Awayya na gapa tu nanono mu nga ariammu makua i ngamin nga ipakua ni Jehova nikaw. Nu kunnatun, malippawa mu i Bible study ira nga marigatan nga maddesision nga mabbalin tu Saksi.

² Ammu ni Jesus nga makefugag danatun ta desisiottam nga passerbian si Jehova. (Mat. 13:​20-22) Yari tu inuffunan ni Jesus danuri magalangan nga tumuttul nisa. Sinudduan na i disipulos na nu kunnasi da nga moffunan i kunnatun nga totolay. Mawag na disipulos nga (1) ammuan nu ngatta marigatan i tolay nga maddesision nga passerbian si Jehova, (2) uffunan ira nga mas ayatan si Jehova, (3) tudduan ira nga pagolluan si Jehova, anna (4) tudduan ira nu anni i kuadda nu egga i mangontra nira. Usattam i libru nga Magayayya nga Mattolay tu Mannanayun! anna kuattam i nipakua ni Jesus ta disipulos na. Nu kunnatun, moffunattam i Bible study tam ira nga maddesision nga mabbalin tu Saksi ni Jehova.

DUFFUNAN I BIBLE STUDYM NGA AMMUAN NU NGATTA MARIGATAN YAYYA NGA MADDESISION

3. Ngatta narigatan si Nicodemo nga maddesision nga mabbalin tu disipulo ni Jesus?

³ Si Nicodemo ay mammaguray na Judio ira. Narigatan yayya nga mabbalin tu disipulo ni Jesus. Annam nga vulan pagalaman nga mallayyagayya si Jesus ngem nangurug ngana si Nicodemo nga si Jesus i Mesias. (Juan 3:​1, 2) Ngem sinaga-tagu laman i pinakibbida na kani Jesus megafu ta ‘assing na ta Judio ira.’ (Juan 7:13; 12:42) Abbo na gare tu mapawan na i autoridad na anna i kinariku na nu mabbalin yayya tu disipulo ni Jesus.a

4. Kunnasi nga inuffunan ni Jesus si Nicodemo tapenu mammuan na i kayà nga ipakua na Dios ta nisa?

⁴ Kabisadu ni Nicodemo i dorob nga niyawa na Dios ta Israelita ira. Ngem mawag na i uffun tapenu malippawa i kayà ni Jehova nga ipakua nisa. Kunnasi yayya nga inuffunan ni Jesus? Kinibbida yayya ni Jesus maski ta gabi. Kinagi gapa ni Jesus kani Nicodemo i mawag ira tu kuan na tapenu mabbalin tu disipulo. Mawag tu mabbabawi yayya, mappabawtiso ta danum, anna mangurug ta Ana na Dios.—Juan 3:​5, 14-21.

5. Kunnasi tam moffunan i Bible study tam nga ammuan i makefugag ta passerbi na kani Jehova?

⁵ Maski nu aru ngana i ammu na tadday nga Bible study, uffunattam lagapa yayya tapenu mammuan i makefugag nisa ta passerbi kani Jehova. Angngarigan na, baka mas aru i oras na nga mattrabahu onu fugaddan yayya na familia na. Kagitta ni Jesus, egga nakuan i tiempom nga makavulu i Bible studym. Puede kamu nga makkafe onu mallaka-lakag tapenu meyistoria na ta niko i pattolena anna i problema na ira. Pagarammammu yayya nga kuan i mawag ira tu ulian na megafu ta iddukan na si Jehova, ari tu megafu ta kayà naka nga mapagayayya.

6. Kunnasim moffunan i Bible studym tapenu makua na i ituttuddum? (1 Corinto 16:13)

⁶ Nu kumbinsidu i Bible studym nga uffunan yayya ni Jehova tapenu kuan i fustu, massikan i nono na nga kuan i nagigiammu na ira. (Bibbigan i 1 Corinto 16:13.) Nonopammu yaw. I manuddu tu Biblia ay megitta ta tadday nga mestra. Turi ta estudiante ka, sinni i mestra nga kakayà mu? Siguradu tu yari i mapasensia nga nanguffun niko nga kuan i mawag mu ira nga kuan. Kunnatun gapa i mapia nga manuddu tu Biblia. Ari na laman nga ikagi ta Bible study na nu anni i kayà na Dios nga kuan na. Ipasiguradu na gapa ta nisa nga uffunan yayya ni Jehova nga kuan i mawag na ira nga ulian. Kunnasim nga makua yatun?

DUFFUNAN I BIBLE STUDYM NGA MAS AYATAN SI JEHOVA

7. Kunnasi nga inuffunan ni Jesus danuri nagginna nisa tapenu mas ayatadda si Jehova?

⁷ Ammu ni Jesus nga nu ayatan na disipulos na i Dios, kuadda i nagigiammu da ira. Yari tu nituddu na ta disipulos na i makoffun nira tapenu mas ayatadda i Dios. Angngarigan na, nikumpara ni Jesus si Jehova ta yama nga mangiyawa tu makasta ira nga gannug ta ána na. (Mat. 7:​9-11) Ngem egga ira i nagginna kani Jesus nga ari tu minaggiddu i yama da. Anni tamma i natageno da turi ta niyistoria nira ni Jesus i tadday nga minangngikabbi nga yama nga inalawa na lapa uli i ana na maski nu marake i kinikkingngua na? Tatudda nga nalippawa nga minaggallallo si Jehova ta ána na ta davvun.—Luc. 15:​20-24.

8. Kunnasim moffunan i Bible studym nga mas ayatan si Jehova?

⁸ Moffunammu gapa i Bible studym nga mas ayatan si Jehova nu ipasigo mu nisa i makasta ira nga kualidad na. Ta kada pab-Bible study nu, uffunammu yayya nga malippawa nga iddeddu yayya ni Jehova. Angngarigan na, nu meyannung ta tavvu i gigiammuan nu, uffunammu i Bible studym nga malippawa nga kingngua yatun ni Jehova megafu ta pangiddu na nisa. (Roma 5:8; 1 Juan 4:10) Nu malippawa garay na Bible study nga iddeddu yayya mismu ni Jehova, mas paga nga iddukan na si Jehova.—Gal. 2:20.

9. Anni i nakoffun kani Michael tapenu manguli?

⁹ Nonopan i ekspiriensa ni Michael nga taga-Indonesia. Ta kabbinna, ammu na ngana i kinakurug. Ngem ari yayya nga nappabawtismo. Turi ta 18 anios yayya, nagabroad yayya tapenu mattrabahu bilang truck driver. Tapus nangatawa yayya anna nagabroad mana yayya. Tatun nga tiempo, nappa-Bible study anna napprogreso i mattena na. Limibbe si Michael turi ta natay i yena na tapenu tangngawan na i yama na. Tatun nga tiempo, nappa-Bible study ngana gapa yayya. Natukkal i futu na turi ta pabbiridadda i seksion nga “Gigiammuan i Aru Paga” ta leksion 27 na libru nga Magayayya nga Mattolay tu Mannanayun! Nakatangi yayya turi ta ninono na nu kunnasi kataki i natageno ni Jehova ta pakasingan na nga ziga-rigatadda si Jesus. Megafu tatun, mas nalippawa na nga iddeddu yayya ni Jesus anna ni Jehova. Yatutta nanguli yayya anna nappabawtiso.

DUFFUNAN I BIBLE STUDYM NGA PAGOLLUAN SI JEHOVA

10. Kunnasi nga inuffunan ni Jesus i disipulos na tapenu pagolluan i ministerio da? (Lucas 5:​5-11) (Innan gapa i letratu.)

¹⁰ Mabi laman nga nalippawa na disipulos ni Jesus nga yayya i nepromesa nga Mesias. Ngem kawagadda i uffun tapenu mepoppollu da i ministerio da. Kunnatun si Pedro anna si Andres. Piga nga tiempo ngana gapa ira nga disipulos ni Jesus turi ta inimbita na ira nga tumuttul nisa ta ngamin nga tiempo. (Mat. 4:​18, 19) Kavulu da gapa si Santiago anna si Juan ta pagimmanango da anna dakal i aleg da tatun. (Mar. 1:​16-20) Turi ta ‘pinanawan ni Pedro anna ni Andres i iko da,’ siniguradu da nga meyawa da lagapa i kawagan na familia da maski nu mevulu ngana ira kani Jesus ta ngamin nga tiempo. Anni i namaguyu nira nga pagolluan i ministerio? Nammilagro si Jesus tapenu ipasingan ta nira nga mawayya ni Jehova nga iyawa i kawagadda maski anni paga i mesimmu. Gafu tatun, nattalo ira nga kanayun nga iyawa ni Jehova i kawagadda nu ipoppollu da yayya.—Bibbigan i Lucas 5:​5-11.

11. Kunnasim meyusa i ekspiriensam tapenu malladda i pangurug na Bible studym?

¹¹ Ariattam makapammilagro kagitta na kingngua ni Jesus. Ngem awayya tam iyistoria ta Bible study tam nu kunnasi nga uuffunan ni Jehova danuri ipoppollu da yayya ta pattoleda. Angngarigan na, manono mu kari nu kunnasi naka nga inuffunan ni Jehova turi ta gafu pagalaman nga magatende ka ta study? Awayya na tu mawag mu paga i mappakannammu ta boss mu anna iyesplika nisa nu ngatta ariammu magovertime ta aggaw na study. Iyistoriam gafu ta Bible studym nu kunnasi nga nalladda i pangurug mu turi ta inuffunan naka ni Jehova ta desisiommu nga ipoppollu yayya.

12. (a) Ngatta makasta nu mangivulu ittam tu nadduruma nga wawwaragi ta Bible study tam? (b) Kunnasim meyusa i video ira tapenu moffunan i Bible studym nga pagolluan si Jehova?

¹² Makasta gapa nu mangivulu ka tu nadduruma nga wawwaragi ta Bible studym. Ipeyistoriam ta nira nu kunnasi da nakannammuan i kinakurug anna nu anni i kingngua da tapenu mapagollu si Jehova ta pattoleda. Girawan nu gapa i video ira ta seksion nga “Gigiammuan i Aru Paga” onu ta “I Awayyam Paga Kuan” ta libru nga Magayayya nga Mattolay tu Mannanayun! Angngarigan na, nu egga kamu ngana ta leksion 37, pabbidan nu i video nga Iyawa ni Jehova i Pakawagattam Ira. Duffunammu yayya nga masingan nu anni i mawag tu kuan na tapenu mapagollu si Jehova.

TUDDUAN I BIBLE STUDYM TA KUAN NA NU EGGA I MANGONTRA NISA

13. Kunnasi nga inuffunan ni Jesus i disipulos na tapenu preparadu ira nu egga i mangontra nira?

¹³ Namippiga nga kinagi ni Jesus ta disipulos na nga kontran saw ira na tanakuan maski paga na mismu nga kafamilia da. (Mat. 5:11; 10:​22, 36) Turi ta aranni ngana nga matay si Jesus, kinagi na ta disipulos na nga posible nga patayadda ira megafu ta paddayoda kani Jehova. (Mat. 24:9; Juan 15:20; 16:2) Yari tu kinagi na nira nga magimmugug ira ta pamministerio da. Kinagi na gapa nga ariadda makipporfia turi ira ta kumokkontra anna magimmugug ira ta kukukuan anna kakkagiadda tapenu makapallayyagayya lagapa ira.

14. Kunnasi tam moffunan i Bible study tapenu preparadu yayya nu egga i mangontra nisa? (2 Timoteo 3:12)

¹⁴ Kagitta ni Jesus, awayya tam gapa nga iyesplika ta Bible study tam i posible nga kuan na katrabahu, kofun, onu kafamilia na megafu ta pab-Bible study na. (Bibbigan i 2 Timoteo 3:12.) Awayya na garay nga kanchawan yayya na katrabahu na megafu ta tuttulan na ngana i kagian na Biblia. Awayya na gapa nga kontran yayya na familia na megafu ta nanguli ngana yayya. Yari tu ta gafu pagalaman, ikagi tam ngana nga posible nga mesimmu yatun. Nu kunnatun, ari ngana ira malannakan nu egga i mangontra nira anna ammu da ngana saw i kuadda onu kagiadda.

15. Anni i makasta nga ipanono tam ta Bible study tam nu kokkontran yayya na kafamilia na?

¹⁵ Nu i Bible studym ay kokkontran na kafamilia na, ipanono mu nisa nu ngatta ikalussoda i pab-Bible study na. Awayya na nga nonopadda nga nelogo yayya onu baka marake i paningadda ta Saksi ira ni Jehova. Maski gapa si Jesus kinokkontra na kafamilia na. (Mar. 3:21; Juan 7:5) Uffunammu gafu i Bible studym nga mabbalin tu mapasensia anna masippo ta pakibbida na ta kafamilia na anna ta tanakuan.

16. Kunnasi tam moffunan i Bible study nga masippo nga ipakanawag ta tanakuan i pangurug na?

¹⁶ Maski nu maginteres i kafamilia na Bible studym, mas makasta nu ari na labbi ikagi nira i ngamin nga nagigiammu na. Awayya na gare tu ariadda ngana saw kayà i makibbida uli megafu ta karu na nekagi nira. Yari tu pagarammammu i Bible studym nga baddi laman i ikagi na tapenu kayà da mana saw i magginna nisa. (Col. 4:6) Awayya na gapa nga ikagi ta kafamilia na nga innadda i jw.org. Tatudda nga masingan nu egga i kayà da nga mammuan meyannung ta Saksi ira ni Jehova.

17. Kunnasim moffunan i Bible study nga tubbag ta pakkiavu ira meyannung ta Saksi ira? (Innan gapa i letratu.)

¹⁷ Kunnasim moffunan i Bible studym nga mapprepara tu simple ira nga tabbag ta posible ira nga iyavu na kafamilia onu na katrabahu na? Usammu i serye nga “Gagangay ira nga Pakkiavu” ta jw.org. (2 Tim. 2:​24, 25) Ta kada ultimu gapa na Bible study nu, pabbidan nu i seksion nga “I Kagian na Karuan” ta libru nga Magayayya nga Mattolay tu Mannanayun! Mappraktis kamu nu kunnasi yayya nga tubbag tatun. Nu kawagan, uffunammu yayya nga pakastan paga i tabbag na. Makoffun yatun nisa tapenu massikan i nono na nga iyesplika ta tanakuan i kuru-kurugan na.

18. Kunnasim nga moffunan i Bible studym nga mabbalin tu unbaptized publisher? (Mateo 10:27)

¹⁸ Zinog ni Jesus i disipulos na nga ilayyagayya i mapia nga dumug ta totolay. (Bibbigan i Mateo 10:27.) Mas mattalo saw i Bible studym kani Jehova nu mapurueban na ngana i ma-house-to-house. Kunnasim yayya nga moffunan tapenu kuan na tu goal yatun? Nu meyanunsio ta kongregasion nga egga i kampania ta pallayyagayya, ikagim ta Bible studym nga puede yayya nga mevulu tatun nu unbaptized publisher ngana yayya. Tapus ipa-intindim nisa nu anni i mawag tu kuan na tapenu makualipika yayya. Ikagim nisa nga mas mabi i mallayyagayya ta tiempo na kampania. Awayya na gapa i magasayment ta midweek study tapenu masanay yayya nga makibbida ta aru nga totolay. Nu kuan na yatun, mas massikan i nono na nga ikagi ta tanakuan i kuru-kurugan na.

MATTALO KA NGA KAYÀ NA BIBLE STUDYM NGA MAPAGAYAYYA SI JEHOVA

19. Kunnasi nipasingan ni Jesus nga mattalo yayya ta disipulos na, anna kunnasi tam yayya maparigan?

¹⁹ Nige nga nappalangi si Jesus, kinagi na ta disipulos na nga makavulu da saw uli yayya. Ari da nalippawa nga i paggangay da ta langi i kayà kagian ni Jesus tatun. Ngem nattalo lapa si Jesus nga kayà da nga mapagayayya si Jehova. (Juan 14:​1-5, 8) Ammu ni Jesus nga kawagadda laman i tiempo tapenu malippawa i karuan nga gannug, kasali tatun i pattoleda saw ta langi. (Juan 16:12) Parigattam si Jesus. Mattalo ittam nakuan nga kayà na Bible study tam nga mapagayayya si Jehova.

20. Kunnasi nga nattalo si Sister Chifundo ta Bible study na?

²⁰ Mattalo ittam nakuan nga kayà nga kuan na Bible study tam i fustu. Kunnatun si Sister Chifundo nga taga-Malawi. Bible study na i Katoliko nga si Alinafe. Inusa da i libru nga Magayayya nga Mattolay tu Mannanayun! Turi ta nabalidda ngana i leksion 14, niyavu ni Chifundo kani Alinafe nu anni i makagi na ta pangusa tu imahen ta paddayaw. Nakaporay si Alinafe anna kinagi na, “Para nio, okay lapa i mangusa tu imahen!” Abbo ni Chifundo nga baka iyemmang ngana ni Alinafe i pappa-Bible study na. Ngem pinasensian na nga inistudy si Alinafe. Nattalo yayya nga malippawa lapa saw ni Alinafe nga marake i pangusa tu imahen. Pappasa na piga vulan, niyavu na kani Alinafe i pakkiavu ta leksion 34: “Anni ngana ira i neyuffun nikaw na nammuammu ta Biblia anna ta kurug nga Dios nga si Jehova?” Istorian ni Chifundo: “Aru i makasta nga kinagi ni Alinafe. Kinagi na nga ari nga kuan na Saksi ira i ikagi na Biblia tu marake.” Ari nabbayag, niyemmang ni Alinafe i pangusa tu imahen anna nabawtisowan yayya.

21. Kunnasi tam moffunan i Bible study tam nga maddesision nga passerbian si Jehova?

²¹ Maski nu si Jehova i “mamadakal ta mula,” moffunattam lapa i Bible study tam nga mapprogreso. (1 Cor. 3:7) Ariattam laman nga ituddu i kayà na Dios nga kuan na. Uffunattam yayya nga mas ayatan si Jehova. Pagarammattam gapa yayya nga pagolluan si Jehova tapenu mepasingan na nga ayatan na si Jehova. Tudduattam gapa yayya nga mattalo kani Jehova nu egga i mangontra nisa. Nu mattalo ittam ta Bible study tam, massikan i nono na nga maddesision nga passerbian si Jehova.