Pakastan i Abilidad Tam ta Ministerio​—Panguffun Turi ira ta “Mepangngo nga Mangalawa” nga Mabbalin tu Disipulos

NU NGATTA IMPORTANTE: Padakallan ni Jehova i vukal na kinakurug ta giffutuan danuri “mepangngo nga mangalawa tu mannanayun nga inango.” (King 13:48, NW; 1Co 3:7) Makipattrabahu ittam kani Jehova gukaban na paffokus ta totolay nga maya mangiyaplika ta magiggigiammuda. (1Co 9:26) Mawag tu malippawa na Bible study ira nga importante i bawtismo tapenu mapaliag. (1Pe 3:21) Moffunattam ira nga mabbalin tu disipulos nu tudduattam ira nga manguli, mallayyagayya anna mattuddu, anna maddedika kani Jehova.​—Mt 28:19, 20.

NU KUNNASI NGA KUAN:

• Iperaddam ta Bible study ira nga gakkag na paggigiammuda nga mammammu anna mapagayayyada si Jehova.—Jn 17:3

• Uffunan ira nga mapprogreso ta espiritual gukaban na pallillida ta makefugag ira nga gannug, kagitta na marake nga annangngua anna kuestionable nga pakikavulu

• Pasikannan anna pagaramman ira nige anna kabalin na bawtismoda.—King 14:22

GIRAWAN I VIDEO NGA UFFUNAN NAKA NI JEHOVA NGA DIOS, KABALINNA, TABBAGAN I TUMUNUG IRA NGA PAKKIAVU:

• Anni ira i awayyana nga paganassingan na tadday nga makefugag sa nga maddedika anna mappabawtiso?

• Kunnasi nga moffunan na elder ira i Bible study ira nga mapprogreso ta espiritual?

• Anni i ituddu nittam na Isaias 41:10 meyannung kani Jehova?

• Anni ira nga kualidad i makoffun nittam tapenu alawatan ni Jehova i passerbi tam, maski nu imperfekto ittam?