Mata nke Bụ́ Eziokwu

Nsogbu Amaghị nke Bụ́ Eziokwu Nwere Ike Ịkpata

Ọtụtụ mgbe, ihe na-eme ka mmadụ kpọ onye ọzọ asị bụ ihe na-abụghị eziokwu ọ nụrụ gbasara onye ahụ. Legodị ihe atụ ndị a:

Ụfọdụ ndị na-ewe mmadụ n’ọrụ kwetara na ụmụ nwaanyị agaghị arụli ọrụ ndị chọrọ nkà ma ọ bụ ọrụ ndị siri ike.
Na Yurop oge ochie, e boro ndị Juu ebubo na ha tinyere nsí n’olulu mmiri dị iche iche nakwa na ha na-ekesa ọrịa. Mgbe ndị Nazi na-achị, e bokwara ha ebubo ọzọ. E kwuru na ọ bụ ha mere ka ihe isi ike dị na Jamanị. Ebubo abụọ a mere ka a kpọ ndị Juu ezigbo asị. Ruokwa taa, a ka nwere ndị kpọrọ ndị Juu asị n’ihi ebubo ndị ahụ.
Ọtụtụ ndị kweere na onye ọ bụla nwere nkwarụ bụ onye iwe.

Ndị kweere ụdị ụgha ndị a nwere ike inye ihe atụ ndị nwere ike ime ka o yie ka ihe ha na-ekwu ọ̀ bụ eziokwu. Ha na-echekwa na onye ọ bụla na-ekwetaghị na ha amaghị ihe.

Amaokwu Baịbụl Ga-enyere Gị Aka

“Ọ dịghị mma ma ọ bụrụ na mkpụrụ obi enweghị ihe ọmụma.”—ILU 19:2.

Olee ihe amaokwu a na-akụziri anyị? Ọ bụrụ na mmadụ amaghị nke bụ́ eziokwu, o nwere ike ime ka o kweta ihe na-abụghị eziokwu. Anyị kwere ihe na-abụghị eziokwu gbasara ndị mmadụ, anyị ga-ewere ya na ha bụ ndị ajọ mmadụ.

Otú Ịma nke Bụ́ Eziokwu Si Enye Aka

Ọ bụrụ na anyị mata nke bụ́ eziokwu gbasara ndị mmadụ, anyị agaghị ekweta ihe ndị bụ́ ụgha ndị ọzọ nwere ike ịna-ekwu gbasara ha. Ozugbo anyị chọpụtara na ihe anyị nụrụ gbasara otu agbụrụ abụghị eziokwu, o nwere ike ime ka anyị jụọ onwe anyị ma ihe anyị kweere gbasara agbụrụ ndị ọzọ ọ̀ bụ eziokwu.

Akụkọ Mere Eme: Jovica (Yurop)

Mgbe Jovica anyị kwuburu okwu ya na-eto eto, ọ na-anụ ka ndị obodo ha na-ekwu okwu ọjọọ gbasara otu agbụrụ n’obodo ha. Ọ na-anụkwa ya na redio nakwa na tiivi. O kwuru, sị: “M bịara na-ele ndị agbụrụ ahụ anya ọjọọ, kpọkwa ha asị. M chekwara na otú a m si ele ha anya adịghị njọ.

“Ma, mgbe m ghọrọ onye amị, ọ dabara na mụ na ndị amị si n’agbụrụ ahụ bi otu ebe, na-arụkọkwa ọrụ. Ka oge na-aga, m matakwuru ha nke ọma. M malitedịrị ịmụ asụsụ ha, na-egekwa egwú ha. Ihe malitere dabawara mụ na ha, mụ agbanwee otú m si ele ha anya. Ma, ama m na m nwere ike ịmalitekwa lewe ha anya ọjọọ. N’ihi ya, anaghị m ekwe ege akụkọ na-ekwu ihe na-adịghị mma gbasara ndị agbụrụ ahụ. Anaghịkwa m ele fim ma ọ bụ soro m chịa a na-akwa ha emo na ya. Ama m na ile mmadụ anya ọjọọ nwere ike ịkpata iwe na ịkpọasị.”

Ihe I Nwere Ike Ime

E nwere ike inwe otu agbụrụ ndị mmadụ na-ekwu na ha nwere àgwà na-adịghị mma. Ma, cheta na ọ bụghị mmdụ niile si n’agbụrụ ndị ahụ nwere àgwà ọjọọ ahụ.
Cheta na e nwere ike ị machaghị ihe niile gbasara ndị ọzọ.
Gbalịa si n’ebe a tụkwasịrị obi chọpụta nke bụ́ eziokwu.