Igbe Ajụjụ

◼ Gịnị ka e kwesịrị iburu n’uche banyere ịgụpụta paragraf ná nzukọ?

A na-eji ihe dị ukwuu n’oge e kenyere maka Ọmụmụ Ihe Ụlọ Nche na Ọmụmụ Akwụkwọ Ọgbakọ agụpụta paragraf. Nke a pụtara na nwanna nwoke e kenyere dị ka onye na-agụ ihe nwere ibu ọrụ dị arọ dị ka onye nkụzi. Ọ ghaghị ịgụ ihe n’ụzọ ‘a ga-amata isi ihe’ dị n’ihe ọgụgụ ahụ ka ọ ghara ịbụ nanị na ndị na-ege ntị ghọtara ya kamakwa na a ga-akwali ha ime ihe. (Neh. 8:8) N’ihi ya, ọ dị onye ahụ na-agụ ihe mkpa ịkwadebe nke ọma maka ihe omume ya. (1 Tim. 4:13; lee ihe ọmụmụ nke 6 n’Akwukwọ-nduzi Ulo-akwukwọ.) Ndị a bụ ụfọdụ ihe ndị dị mkpa maka ịgụ ihe bara uru n’ihu ọha.

Mesie Echiche Okwu Ike n’Ụzọ Kwesịrị Ekwesị: Buru ụzọ chọpụta okwu ma ọ bụ nkebi okwu ndị ọ dị mkpa ka e mesie ike iji wee nye nghọta ziri ezi.

Kpọpụta Okwu n’Ụzọ Ziri Ezi: Mkpọpụta okwu kwesịrị ekwesị na nke doro anya dị mkpa ma ọ bụrụ na ndị na-ege ntị ga-aghọta okwu ndị pụtara ná mbipụta ahụ. Chọọ okwu ndị a na-amaghị ma ọ bụ ndị a na-adịghị ejikarị eme ihe n’akwụkwọ ọkọwa okwu, ma ọ bụ gee ntị na kaseti Society.

Jiri Olu Dara Ụda na Ikpo Ọkụ Kwuo Okwu: Ikwusi okwu ike n’ụzọ na-ekpo ọkụ na-eme ka e nwee mmasị, na-akpali mmetụta uche, na-akwalikwa onye na-ege ntị.

Na-ekpo Ọkụ ma Na-ekwu Okwu n’Ụzọ Mkparịta Ụka: Ikwu okwu otú mmadụ si ekwu na okwu ịga were were n’ọnụ na-agakọ. Site n’ime nkwadebe na ịmụgharị ihe, onye ahụ na-agụ ihe pụrụ ịtụsara ahụ, ihe ọ ga-arụpụtakwa ga na-adọrọ adọrọ kama ịbụ nanị n’otu olu na nke na-agwụ ike.—Hab. 2:2.

Gụọ Ihe ahụ Dị Ka E Si Bie Ya: A na-agụpụtakarị nkọwa ala ala peji nakwa ihe ọmụma dị n’ime akara ngebichi ma ọ bụ braket ma ọ bụrụ na ha na-eme ka ihe ahụ e biri ebi doo anya. Nanị ebe dị iche bụ ntụaka ndị na-akọwa nanị ebe e si nweta ihe ọmụma. E kwesịrị ịgụpụta nkọwa ala ala peji mgbe e zoro aka na ya n’ime paragraf, na-ekwu tupu a gụpụta ya, sị: “Nkọwa ala ala peji na-agụ . . .” Mgbe a gụsịrị ya, maliteghachi n’ebe fọrọ na paragraf ahụ.

Mgbe a gụrụ ọgụgụ ihe n’ihu ọha nke ọma, ọ bụ otu n’ime ụzọ ndị dị mkpa anyị pụrụ isi ‘zie ndị ọzọ idebe ihe nile e nyere n’iwu’ site n’aka Onye Ozizi Ukwu anyị.—Mat. 28:20.