Mmadụ Nile Aghaghị ‘Ịnara Okwu ahụ Nke Ọma’!
1 Ọtụtụ nde mmadụ so Ndịàmà Jehova na-amụ Bible. Iji ruo eru inweta ndụ ebighị ebi, ha aghaghị ‘ịnara okwu ahụ nke ọma,’ dị ka mmadụ 3,000 ahụ chegharịrịnụ, e mekwara baptism n’ụbọchị Pentikọst 33 O.A., mere. (Ọrụ 2:41) Ibu ọrụ dị aṅaa ka nke a na-eme ka anyị nwee taa?
2 Ọ dị anyị mkpa inyere ndị anyị na-amụrụ Bible aka ịzụlite nsọpụrụ Jehova. (1 Tim. 4:7-10) Iji mee nke ahụ, ihe ntinye Ozi Alaeze Anyị nke June 1996 paragraf nke 20, na-atụ aro, sị: “N’oge ọmụmụ ihe ahụ nile, chọọ ohere iji wulite ekele maka àgwà dị iche iche nke Jehova. Kwupụta mmetụta dị omimi nke gị nye Chineke. Nyere onye mmụta ahụ aka iche echiche banyere iwulite mmekọrịta onwe onye na-ekpo ọkụ n’ebe Jehova nọ.”
3 Ihe Ịma Aka Anyị Na-eche Ihu: Ihe ka ọtụtụ ná ndị mmadụ, n’ịbụ ndị okpukpe ụgha metụtara, na-enwe afọ ojuju n’ụdị ofufe na-achọ ntakịrị oge na mgbalị, nke na-achọghị ezi mgbanwe ọ bụla n’ụzọ ndụ ha. (2 Tim. 3:5) Ihe ịma aka na-eche anyị ihu bụ inyere ndị anyị na-amụrụ Bible aka ịhụ na ezi ofufe na-agụnye ihe karịrị nanị ịbụ ndị na-anụ okwu Chineke. Ha aghaghị itinye ihe ha na-amụta n’ọrụ ná ndụ ha. (Jes. 1:22-25) Ọ bụrụ na ọ dị ihe metụtara àgwà ha nke Chineke na-enweghị mmasị na ya, ọ dị ha mkpa ịmata ibu ọrụ ha nwere ‘ichigharị’ ma mee ihe ziri ezi iji mee ihe ga-amasị ya. (Ọrụ 3:19) Iji nweta ndụ ebighị ebi, ha aghaghị ‘ijisi ike’ ma were nguzo siri ike maka eziokwu ahụ.—Luk 13:24, 25.
4 Mgbe unu na-atụle akụkụ dị iche iche nke omume ọma, jụọ onye ị na-amụrụ Bible otú o si ele ihe ndị a anya n’ezie na ihe o kwesịrị ime ma o bụrụ na ọ hụ na ọ dị mkpa ime mgbanwe ná ndụ ya. Dọrọ uche ya gaa ná nzukọ bụ́ ebe o si na-amụta eziokwu ahụ, gbaakwa ya ume ịgachi nzukọ ọgbakọ anya.—Hib. 10:25.
5 Ka anyị mee ya ihe mgbaru ọsọ anyị ime ka izi ihe anyị ruo n’obi nke onye mmụta ahụ. Anyị ga-enwe ọṅụ ka anyị na-akwali ndị ọhụrụ ịnara okwu Chineke nke ọma ma bụrụ ndị e mere baptism!—1 Tesa. 2:13.