Ṅomie Okwukwe Ha
1. Olee akwụkwọ anyị ga-ebido ịmụ n’Ọmụmụ Baịbụl Ọgbakọ n’izu na-amalite n’Ọktoba 19?
1 N’izu na-amalite n’Ọktoba 19, 2015, anyị ga-ebido ịmụ akwụkwọ Ṅomie Okwukwe Ha n’Ọmụmụ Baịbụl Ọgbakọ. N’akwụkwọ a, a kọrọ akụkọ mmadụ iri na anọ nwere okwukwe na Chineke. A kọrọ akụkọ ha otú anyị ga-echebara ha echiche, hụkwa otú ha si fee Jehova n’agbanyeghị ụdị nsogbu ndị ha nwere. Akwụkwọ a ga-enyekwara anyị aka ịmụta ihe bara uru n’aka ha.—Hib. 6:12.
2. Gịnị na gịnị dị n’akwụkwọ Ṅomie Okwukwe Ha?
2 Ihe Ndị Dị n’Akwụkwọ A: N’akwụkwọ a, e sere ihe ga-enyere anyị aka ịmata mgbe onye a na-akọ akụkọ ya biri ndụ nakwa ebe o bi n’oge ahụ. E nwere ajụjụ ndị dị ná ngwụcha isiokwu nke ọ bụla. A na-akpọ ha “Ajụjụ Ndị Ị Ga-echebara Echiche.” Ha ga-enyere anyị aka ịtụgharị uche n’ihe anyị mụrụ n’isiokwu nke ọ bụla, nyekwara anyị aka ime ihe anyị mụtara. Ihe ọzọ dị́ n’akwụkwọ a bụ ihe osise ndị mara mma. Ha ga-enyere anyị aka ịghọtakwu ihe a na-akọ n’isiokwu nke ọ bụla.
3. Gịnị ka anyị kwesịrị ime ka anyị nwee ike ịmụta ihe n’akwụkwọ a?
3 Otú Anyị Ga-esi Mụta Ihe na Ya: Òtù Na-achị Isi gwara anyị n’isimbido akwụkwọ ahụ, sị: “Were ya na ị nọ mgbe ihe ị na-agụ na-eme. Mee ka obi gị dịrị n’ihe ị na-agụ. Gbalịa ka ihe metụrụ ndị ị na-agụ akụkọ ha n’obi metụkwa gị n’obi. Gbalịakwa ka ị hụ ihe ha hụrụ. Jiri ihe ha mere mgbe ihe ụfọdụ mere ha tụnyere ihe ị gaara eme ma ọ bụrụ gịnwa ka ihe ndị ahụ mere.” Ihe a na-ekwu ebe a bụ na anyị kwesịrị ịghọta ihe a na-akọ gbasara onye nke ọ bụla, ghọtakwa otú ihe si dịrị ya. Ka anyị nwee ike ime ya, anyị ga-ewepụta oge tụgharịa uche n’ihe anyị na-amụ. (Nehe. 8:8) N’izu ọ bụla a na-agaghị amalite na paragraf nke mbụ n’isiokwu, onye ga-eduzi Ọmụmụ Baịbụl Ọgbakọ ga-eji otu nkeji ma ọ bụ ihe na-erughị ya chetara ụmụnna ihe a mụrụ n’izu gara aga. Ọ bụrụkwa na ebe a ga-amụ enweghị “Ajụjụ Ndị Ị Ga-echebara Echiche,” onye ga-eduzi ya ga-ajụ ụmụnna otu ajụjụ ma ọ bụ abụọ iji tụleghachi ihe a mụrụ ụbọchị ahụ.
4. Olee uru dị́ n’ịmụ akwụkwọ Ṅomie Okwukwe Ha?
4 Ọtụtụ ihe ndị dị n’ụwa a nwere ike ime ka okwukwe anyị nwere na Chineke ghara isi ike. Ma, Jehova enyela anyị ihe ndị ga-eme ka okwukwe anyị sikwuo ike. Abụọ n’ime ha bụ akwụkwọ Ṅomie Okwukwe Ha na isiokwu a na-akpọ “Ṅomie Okwukwe Ha” nke na-agba n’Ụlọ Nche. (Jems 1:17) Anyị kwesịrị ịgba mbọ na-agachi ọmụmụ ihe anya n’oge a ga na-amụ akwụkwọ a ma na-aza ajụjụ ka anyị nwee ike ịmụta ihe na ya.