OTÚ NDỊ KRAỊST SI EBI NDỤ

Gị na Ndị Hụrụ Jehova n’Anya Na-anọrị

Gịnị mere anyị na ndị hụrụ Jehova n’anya kwesịrị iji na-anọrị? Ọ bụ n’ihi na ụdị ndị anyị na ha na-akpa nwere ike ime ka anyị na-akpa àgwà ọma ma ọ bụ àgwà ọjọọ. (Ilu 13:20) Dị ka ihe atụ, Eze Jehoash mere “ihe ziri ezi n’anya Jehova” n’oge niile ya na Jehoyada, Nnukwu Onye Nchụàjà, nọ. (2 Ihe 24:2) Ma mgbe Jehoyada nwụrụ, Jehoash na ndị ọjọọ bidoro na-akpa. Ihe a mere ka ọ hapụ Jehova.—2 Ihe 24:17-19.

N’oge ndịozi Jizọs, Pọl onyeozi ji ọgbakọ Ndị Kraịst tụnyere “ụlọ buru ibu,” jirikwa ndị nọ n’ime ya tụnyere “arịa dị iche iche” na-adị n’ụlọ. Anyị ga na-abụ “arịa bụ́ maka nzube kwesịrị nsọpụrụ” ma anyị zere onye ọ bụla na-eme ihe Jehova kpọrọ asị, ma onye ahụ ọ̀ bụ onye ezinụlọ anyị ma ọ̀ bụ onye nọ n’ọgbakọ. (2 Tim. 2:20, 21) N’ihi ya, ka ndị anyị ga na-emeta enyi bụrụ ndị hụrụ Jehova n’anya na ndị ga na-agba anyị ume ịna-efe Jehova.

LEENỤ VIDIO BỤ́ MỤTA ỊJỤ MKPAKỌRỊTA ỌJỌỌ, ZAAKWANỤ AJỤJỤ NDỊ A:

Olee otú anyị nwere ike isi bido iso ndị ọjọọ na-akpa n’amaghị ama?
Na vidio ahụ, olee ihe nyeere ụmụnna atọ ahụ aka ịkwụsị mkpakọrịta ọjọọ?
Olee ihe ụfọdụ Baịbụl kwuru ga-enyere gị aka imeta ezigbo ndị enyi?

Ebe John na-agbanyere ndị ọrụ ha mmanya n’ebe a na-ere nri; Ebe Kristin ji ekwentị ya gaa n’ebe ya na ndị enyi ya na-ekwurịta okwu n’Ịntanet; Ebe Jayden na ndị ọzọ na-eme egwuruegwu n’Ịntanet; Ebe John na ezinụlọ ya, Kristin, na Jayden nọ n’ọmụmụ ihe — Àbụ m “arịa bụ́ maka nzube kwesịrị nsọpụrụ”?—2 Tim. 2:21