NA-ECHENỤ NCHE

Baịbụl Ọ̀ Kwadoro Otú Okpukpe Si Etinye Aka n’Agha A Na-alụ na Yukren?

Legodị ihe ụfọdụ e kwuru gbasara ndị isi okpukpe a na-anụ aha ha na agha a na-alụ na Yukren:

“E nwebeghị ihe ọ bụla Patriarch Kirill, bụ́ Onyeisi Chọọchị Ọtọdọks dị na Rọshịa, kwuru gosiri na ọ kwadoghị agha ndị Rọshịa na-alụso Yukren. . . . Akụkọ ụgha Chọọchị ya na-akọsa gbasara ndị Yukren ka Putin gbakwasịrị ụkwụ na-asị na agha a ọ na-alụso ha kwesịịrị ha.”—Akụkọ a si n’aka EUobserver, na Mach 7, 2022.
“Patriarch Kirill . . . kwuru na agha a ndị obodo ya na-alụso ndị Yukren bụ otu ụzọ ha si alụso mmehie ọgụ. O si otú a gosi na ọ kwadosiri agha a ike.”—Akụkọ a si n’aka AP News, na Mach 8, 2022.
“Onyeisi Chọọchị Ọtọdọks dị na Yukren, aha ya bụ Metropolitan Epiphanius I nke obodo Kiev, gọziri ndị chọọchị ya na Mọnde ma gwa ha ka ha gaa ‘lụso ndị Rọshịa na-alụso ha ọgụ ọgụ . . . [O] kwukwara na igbu ndị agha Rọshịa abụghị mmehie.”—Akụkọ a si n’aka Jerusalem Post, na Mach 16, 2022.
“Anyị [bụ́ Kansụl Na-ahụ Maka Chọọchị na Okpukpe Ndị Dị na Yukren] kwụ Ndị Agha Yukren na ndị niile na-alụchitere anyị ọgụ n’azụ. Anyị na-asị, ya dịrị ha ná mma maka ọgụ ha na-alụso ndị iro anyị, anyị na-ekpekwara ha ekpere.”—Akụkọ a si n’aka UCCRO,a na Febụwarị 24, 2022.

Gịnị ka i chere? Ndị chọọchị sị na ha na-eso ụzọ Jizọs Kraịst, hà kwesịrị ịgba ndị òtù ha ume ka ha gaa lụwa agha? Gịnị ka Baịbụl kwuru?

Akụkọ gbasara aka ndị chọọchị na-etinye n’agha

E nweela akụkọ ndị mere eme a kọrọ otú ndị chọọchị si akwado agha ndị a na-alụ, otú ha si ekwu na ọ dịghị njọ ịga agha, nakwa na e kwesịrị ịga agha. Ma, ha na-ekwukwa na ha na-agba mbọ ka udo dị. O teela Ndịàmà Jehova gbawara ụdị ihu abụọ a ndị chọọchị na-eme n’anwụ. Legodị ihe ụfọdụ anyị kwurula n’akwụkwọ anyị gbasara okwu a.

Isiokwu bụ́ “Agha Ntụte—‘Ajọ Ihe Mmegharị Anya’” kwuru na ọ bu Chọọchị Roman Katọlik mere e ji gbuo ọtụtụ ndị, sị na ọ bụ ozi a na-ejere Chineke na Kraịst mere e ji gbuo ha.
Isiokwu bụ́ “Udo Adịrịghị Ndị Ozi Ụgha!” kwuru otú okpukpe sirila gbaa ọnyụpa n’igbochi agha agbụrụ na agbụrụ nakwa n’ịhụ na e gbukpọghị otu agbụrụ.
Isiokwu bụ́ “Olee Otú Chineke Si Ele Ofufe Krisendọm Anya?,” “Okpukpe Nile Hà Na-amasị Chineke?,” na “Otú Okpukpe Si Lanarị” kwuru otú ndị ụkọchukwu Katọlik, ndị nke Ọtọdọks, na ndị nke Protestant nọ ná mba abụọ na-alụ agha sirila kwado ndị obodo nke ha n’agha ha na-alụso ndị nke ọzọ. Ha na-eme ihe a n’ọtụtụ agha a na-alụ.

Ndị Kraịst hà kwesịrị ịkwado agha?

Ihe Jizọs kụziri: “Hụ onye agbata obi gị n’anya otú ị hụrụ onwe gị.” (Matiu 22:39) “Unu akwụsịla ịhụ ndị iro unu n’anya.”— Matiu 5:44-47.

Chebagodịrị ihe a echiche: À ga-asi na ndị chọọchị na-eme ihe Jizọs kwuru gbasara ịhụ ndị ọzọ n’anya ma ọ bụrụ na ha na-agwa ndị òtù ha ka ha gaa agha? Ị chọọ ịmata azịza ajụjụ a, gụọ isiokwu bụ́ “Ezigbo Ịhụnanya Anaghị Ada Ada” na “Mmadụ Ọ̀ Ga-ahụli Ndị Iro Ya n’Anya?”

Jizọs sịrị: “Alaeze m abụghị nke ụwa a. A sị na Alaeze m bụ nke ụwa a, ndị na-ejere m ozi gaara alụ ọgụ ka a ghara inyefe m n’aka ndị Juu.” (Jọn 18:36) “Ndị niile na-egbu ndị ọzọ mma agha ga-esi ná mma agha laa n’iyi.”—Matiu 26:47-52.

Chebagodịrị ihe a echiche: Ọ bụrụ na Ndị Kraịst ekwesịghịdị ịlụ ọgụ ka a ghara igbu Jizọs, è nwere ihe ọ bụla ọzọ kwesịrị ime ka ha lụọ ọgụ? Gụọ isiokwu bụ́ “Ịlụ Agha Ò Kwekọrọ n’Ozizi Ndị Kraịst?” ka ị hụ otú Ndị Kraịst oge mbụ si mee ka Jizọs ma mee ihe ndị ọ kụziri n’eleghị anya n’azụ.

Gịnị ga-eme okpukpe na-akwado agha?

Baịbụl kwuru na Chineke anaghị eji anya ọma ele chọọchị ọ bụla na-ekwu na ha na-anọchite anya Jizọs, mana, ha anaghị eme ihe ndị ọ sị ha mee.—Matiu 7:21-23; Taịtọs 1:16.

Akwụkwọ Mkpughe kwuru ihe gosiri na n’anya Chineke, ọ bụ chọọchị ndị na-akwado agha gburu “ndị niile e gburu n’ụwa.” (Mkpughe 18:21, 24) Ị chọọ ịma ihe mere o ji bụrụ eziokwu, gụọ isiokwu bụ́ “Gịnị Bụ Babịlọn Ukwu Ahụ?”
Jizọs kwuru ihe gosiri na a ga-ebibi chọọchị niile ihe ha na-anaghị amasị Chineke n’ihi ọrụ ọjọọ ha na-arụ, otú ahụ e si ‘egbutu’ osisi rere ure nke na-amị mkpụrụ rere ure “ma tụba ya n’ọkụ.” (Matiu 7:15-20) Gụọ isiokwu bụ́ “A Ga-ebibi Okpukpe Ụgha n’Oge Na-adịghị Anya!” ka ị mata otú ihe a ga-esi eme.

Ndịàmà Jehova Dị Iche

Ma na Rọshịa ma na Yukren ma n’ebe niile n’ụwa, Ndịàmà Jehova na-eme ihe Jizọs kwuru. N’ihi ya, anyị anaghị etinye aka n’ọchịchị ụwa, anyị anaghịkwa alụ agha. Ọ bụ ya mere na anyị akwadoghị agha a ma ọ bụ agha ọ bụla ọzọ a na-alụ. Aka anyị na ụkwụ anyị adịghịkwa n’agha a a na-alụ. E jirila maka otú a anyị si agbasi mbọ ike na-eme ihe Baịbụl kwuru na-echi ụfọdụ n’ime anyị ọnụ n’ala. (Jọn 15:19, 20; 2 Timoti 3:12) Dị ka ihe atụ, gọọmentị ndị Rọshịa atụọla ọtụtụ Ndịàmà Jehova mkpọrọ, chiedị ụfọdụ n’ime ha ọnụ n’ala. Ha ewegharala ebe ndị anyị na-anọ efe Jehova. Ị chọọ ịmatakwu gbasara ihe a, gaa na www.jw-russia.org.

Lee vidio a na-ewe nkeji anọ aha ya bụ Jehovah’s Witnesses in Irkutsk Remain Faithful Despite Brutal Home Raids, ka ị hụ otú e si akpagbu Ndịàmà Jehova nọ na Rọshịa n’ihi ihe ha kweere.
Kemgbe ụwa, a ma Ndịàmà Jehova ama ka ndị na-anaghị etinye aka n’agha ma ọ bụ n’ọchịchị. Lee vidio a aha ya bụ Ha Tachiri Obi Mgbe A Na-akpagbu Ha ka ị hụ otú ha si jụ itinye aka n’agha n’agbanyeghị na ndị ọchịchị Nazi nke Jamani na ndị bụ́bu Sọviet Yuniọn nọ na-ata ha ezigbo ahụhụ.

Biko, gaa n’ebe anyị na-etinye ihe n’Ịntanet ka ị matakwuo ihe ndị anyị kweere. Otu n’ime ha bụ nkwa Chineke kwere na Baịbụl na oge na-abịa mgbe a na-agaghịzi alụ agha. (Aịzaya 2:4; Jeremaya 29:11) Gbalịa kpọtụrụ anyị ka anyị kọkwuoro gị gbasara ihe ndị dị na Baịbụl.

Ebe Ndị E Si Nweta Foto, si n’aka ekpe gaa n’aka nri: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images

a Ndị so na Kansụl Na-ahụ Maka Chọọchị na Okpukpe Ndị Dị na Yukren bụ chọọchị iri na ise nọchiri anya ndị Ọtọdọks, ndị Grik na ndị Roman Katọlik, ndị Protestant, na chọọchị ndị a na-akpọ ndị Ivanjelịkal nakwa okpukpe ndị Juu na ndị Alakụba.