À Ga-alụ Agha Ụwa Ọzọ?—Gịnị Ka Baịbụl Kwuru?

Kemgbe iri afọ atọ gara aga, ọtụtụ ndị na-eche na mba dị iche iche na ibe ha anaghịzi esekarị okwu nakwa na ha na-adịkwu ná mma. Ma, ihe ndị na-eme na nso nso a na-egosi na ihe a ha na-eche abụghị eziokwu.

N’abalị isii n’ọnwa Jenụwarị afọ 2024, ụlọ ọrụ mgbasa ozi a na-akpọ Reuters kwuru, sị: “Ndị mmadụ na-atụ ụjọ na agha a na-alụ na Gaza nwere ike iru n’obodo ndị ọzọ dị ha nso n’ihi na Izrel na òtù a na-akpọ Hezbọla akwarịtawala mgbọ n’ókè Izrel na Lebanon.”
N’abalị asaa n’ọnwa Jenụwarị afọ 2024, akwụkwọ akụkọ The New York Times dere, sị: “Òtù dị iche iche Ịran na-akwado amalitela ọgụ n’ebe dị iche iche. Ịran ebidoghachikwala ịrụ ngwá agha ọgwụrụ mba. Rọshịa na Chaịna na-akwadokwa ha. Ihe a niile bụụrụ Amerịka na mba ndị na-akwado Amerịka nsogbu.”
N’abalị iri na otu n’ọnwa Jenụwarị afọ 2024, akwụkwọ akụkọ Òtù Mba Ụwa bipụtara kwuru, sị: “Mgbọ Rọshịa na-akwa na Yukren ka na-akpa Yukren ezigbo aka ọjọọ.”
N’abalị itoolu n’ọnwa Jenụwarị afọ 2024, akwụkwọ akụkọ bụ́ The Japan Times dere, sị: “Chaịna na-abakwu ọgaranya ka chi na-abọ, ndị amị ha ana-esikwukwa ike. Ndị Taịwan na-ahụkwu mba ha n’anya n’ike n’ike, Chaịna na Amerịka ejighịkwa anya ahụ ibe ha. Ihe a niile pụtara na obere ihe nwere ike ime ka agha daa.”

È nwere ihe Baịbụl kwuru banyere ihe ndị a niile na-eme n’ụwa taa? Ihe a niile hà nwere ike ime ka a lụọ agha ụwa ọzọ?

Baịbụl kwuru na ihe ndị na-eme n’ụwa taa ga-eme

Baịbụl ekwughị kpọmkwem agha ndị a ga na-alụ n’oge a. Kama, o kwuru na a ga na-alụ agha aghara aghara otú a na-alụ ya taa, agha ndị a ‘na-ewepụkwa udo n’ụwa.’—Mkpughe 6:4.

Akwụkwọ Daniel kwuru na “n’oge ikpeazụ,” ọchịchị ndị na-ama aka “ga-enurịta ibe ha aka,” ya bụ, ha ga na-azọ onye ka ibe ya ike. Otu ụzọ ha ga-esi na-eme ya bụ iji ngwá agha ha na-akpa ike dị egwu, na-emefukwa nnukwu ego ma ọ bụ “akụ̀” n’ihe dị iche iche.—Daniel 11:40, 42, 43.

Agha a ga-alụ n’ọdịnihu

Baịbụl gosiri na ihe ga-akakwu njọ n’ụwa tupu ihe adị mma. Jizọs kwuru na “a ga-enwe oké mkpagbu nke a na-enwetụbeghị ụdị ya kemgbe ụwa malitere.” (Matiu 24:21) A ga-alụ agha a na-akpọ agha Amagedọn ná ngwụcha oge “oké mkpagbu” ahụ. Baịbụl kwuru na agha a bụ “agha a ga-alụ n’oké ụbọchị Chineke, Onye Pụrụ Ime Ihe Niile.”—Mkpughe 16:14, 16.

Ma, agha Amagedọn agaghị emebiri ụmụ mmadụ ihe, kama ọ ga-azọpụta ha. Chineke ga-eji agha a kpochapụ ọchịchị ụmụ mmadụ, n’ihi na ha akpatala agha dị iche iche kpara mkpamkpa n’ụwa. Iji chọpụta otú agha Amagedọn ga-esi eme ka udo dịrị ruo mgbe ebighị ebi, gụọ isiokwu ndị a:

“Gịnị Bụ Agha Amagedọn?”
“Amagedọn Bụ Ihe Ọma”