Jehova Zigara Jeremaya Ka O Kwusaa Okwu Ya

Jehova họọrọ Jeremaya ka ọ bụrụ onye amụma na Juda. Ọ gwara ya ka o kwusaara ndị Juda okwu ya ma dọọ ha aka ná ntị ka ha kwụsị ihe ọjọọ ha na-eme. Ma Jeremaya gwara ya, sị: ‘Jehova, abụ m nwata. Amaghị m ihe m ga-agwa ha agwa.’ Jehova gwara ya, sị: ‘Ụjọ atụla gị. M ga-agwa gị ihe ị ga-ekwu. M ga-enyere gị aka.’

Jehova gwara Jeremaya ka ọ kpọkọta ndị okenye Juda, nọrọkwa n’ihu ha kụwaa ite ụrọ ma kwuo, sị: ‘A ga-ebibi Jeruselem otú a m si kụwaa ite ụrọ a.’ Mgbe Jeremaya mere ihe ahụ Jehova gwara ya, ezigbo iwe were ndị okenye ahụ. Otu onye nchụàjà aha ya bụ Pash-họ tiri Jeremaya ihe ma tinye ya n’ọtọsị. Jeremaya nọgidere n’ọtọsị ahụ chi abọọ. Mgbe chi bọrọ, Pash-họ hapụrụ Jeremaya. Jeremaya kwuru, sị: ‘Ihe a akarịala. M ga-akwụsị ikwu gbasara Jehova.’ Ma, ọ̀ kwụsịrị ikwu gbasara ya? Mba. Jeremaya chebakwuuru ozi ya echiche ma kwuo, sị: ‘Okwu Jehova dị ka ọkụ na-ere m n’ime ahụ́. Agaghị m akwụsị ikwusa okwu ya.’ Jeremaya nọgidere na-adọ ndị Juda aka ná ntị.

Mgbe ọtụtụ afọ gachara, e nwere eze ọhụrụ na Juda. Ozi Jeremaya nọ na-ekwusa adịghị ndị nchụàjà na ndị amụma ụgha mma. Ha gwara ndị isi, sị: “E kwesịrị igbu nwoke a.” Jeremaya gwara ha, sị: ‘Ọ bụrụ na unu egbuo m, unu gburu onye aka ya dị ọcha. Ihe m na-agwa unu bụ ihe Jehova kwuru, ọ bụghị okwu nke m.’ Mgbe ndị isi nụrụ ihe a o kwuru, ha sịrị: “E kwesịghị igbu nwoke a.”

Jeremaya akwụsịghị ikwusa okwu Chineke. Ihe a were ndị isi Juda ezigbo iwe. Ha gwara eze ka o gbuo Jeremaya. Eze gwara ha ka ha mee Jeremaya ihe ọ bụla masịrị ha. Ha kpọọrọ Jeremaya tụba n’olulu miri emi nke pọtọpọtọ juru, chee na ọ ga-anọ ebe ahụ nwụọ. Jeremaya bidoro imikpu n’ime pọtọpọtọ ahụ.

Otu nwoke na-eje ozi n’obí eze, onye aha ya bụ Ibed-melek, gaziri gwa eze, sị: ‘Ndị isi atụbala Jeremaya n’olulu. Anyị hapụ ya ebe ahụ, ọ ga-anwụ.’ Eze gwara Ibed-melek ka ọ kpọrọ ụmụ nwoke iri atọ gaa kpọpụta Jeremaya n’olulu ahụ. Jeremaya ekweghị ka ihe ọ bụla mee ka ọ kwụsị ikwusa okwu Jehova. Ọ̀ bụ na anyị ekwesịghị ịna-eme ka Jeremaya?