Ajụjụ Ndị Na-agụ Akwụkwọ Anyị Na-ajụ

Ọ̀ bụ nanị mbadamba nkume abụọ ahụ dị n’ime igbe ọgbụgba ndụ ahụ, ka è nwere ihe ndị ọzọ dịrị n’ime ya?

N’oge a raara ụlọ nsọ ahụ Solomọn wuru nye n’afọ 1026 T.O.A., “ọ dịghị ihe dị n’igbe ahụ, ọ bụ nanị mbadamba nkume abụọ nke Mozis tinyere n’ime ha na Horeb, mgbe Jehova na ụmụ Izrel gbara ndụ, mgbe ha siri n’Ijipt pụta.” (2 Ihe E Mere 5:10) Otú ọ dị, ọ dị mgbe ihe ndị ọzọ dịkwa n’ime ya.

“N’ọnwa nke atọ mgbe ụmụ Izrel pụtasịrị n’ala Ijipt,” ha banyere n’ọzara Saịnaị. (Ọpụpụ 19:1, 2) Mgbe nke ahụ gasịrị, Mozis rịgooro n’Ugwu Saịnaị ma weta mbadamba nkume abụọ ahụ ndị e dekwasịrị Iwu ahụ na ha. Mozis kọrọ, sị: “M wee chigharịa si n’ugwu ahụ rịda, tinye mbadamba nkume ahụ n’ime igbe ahụ nke m mererịị; ha dịkwa n’ebe ahụ, dị ka Jehova nyere m iwu.” (Deuterọnọmi 10:5) Nke a bụ igbe ma ọ bụ ihe a ga-eji tinye ihe ruo nwa oge, nke Jehova gwara Mozis ka ọ rụọ iji tinye mbadamba nkume abụọ ahụ e dekwasịrị Iwu ahụ na ha. (Deuterọnọmi 10:1) A rụchara igbe ọgbụgba ndụ ahụ ná ngwụsị afọ 1513 T.O.A.

Ntakịrị oge ka a napụtasịrị ndị Izrel n’Ijipt, ha malitere ime mkpesa banyere nri. N’ihi ya, Jehova nyere ha mana. (Ọpụpụ 12:17, 18; 16:1-5) N’oge ahụ, Mozis nyere Erọn ntụziaka, sị: “Were otu ite, tinye nju omer nke mana n’ime ya, dọba ya n’ihu Jehova ka ọ bụrụ ihe ndebe a na-edebere ọgbọ nile unu.” Ihe ndekọ ahụ kwuru, sị: “Dị ka Jehova nyere Mozis iwu, otú a ka Erọn dọbara ya n’ihu Ihe Àmà, [ebe a na-echekwa ihe odide ndị dị mkpa] ka ọ bụrụ ihe ndebe.” (Ọpụpụ 16:33, 34) Ọ bu ezie na Erọn tinyere mana a n’ime ite ahụ, ma e debeghị ya n’ihu Ihe Àmà ahụ ruo mgbe Mozis rụchara Igbe ahụ ma tinye mbadamba nkume abụọ ahụ n’ime ya.

Dị ka anyị kwurula, a rụrụ igbe ọgbụgba ndụ ahụ ná ngwụsị afọ 1513 T.O.A. E tinyere mkpanaka Erọn n’ime ya ogologo oge ka e mesịrị, mgbe Kora na ndị ọzọ nupụchara isi. Pọl onyeozi kwuru banyere igbe ọgbụgba ndụ . . . bụ́ nke ite ọlaedo mana dị n’ime ya na mkpanaka Erọn nke mara ifuru na mbadamba ide ihe nke ọgbụgba ndụ ahụ dị na ya.”—Ndị Hibru 9:4.

Mana bụ ihe Chineke nyere ụmụ Izrel n’ime afọ 40 ahụ ha nọrọ n’ọzara. A kwụsịrị inye ha mana mgbe ‘ha malitere iri ụfọdụ n’ime ihe mịrị n’ala ahụ’ e kwere ha ná nkwa. (Joshua 5:11, 12) O nwere ihe mere e ji tinye mkpanaka Erọn n’ime igbe ọgbụgba ndụ ahụ—ka ọ bụrụ ihe ịrịba ama nye ma ọ bụ ihe àmà megide ọgbọ ahụ na-enupụ isi. Nke a na-egosi na ọ pụrụ ịbụ na mkpanaka ahụ nọgidere ebe ahụ ya dịkarịa ala n’oge nile ha nọrọ n’ọzara. Ya mere, ọ ga-abụ ihe ezi uche dị na ya ikwubi na n’agbata oge ndị Izrel banyere n’Ala Nkwa ahụ na tupu a rara ụlọ nsọ ahụ Solomọn wuru nye, e wepụrụ mkpanaka Erọn na ite ọlaedo ahụ nke mana dị n’ime ya site n’igbe ọgbụgba ndụ ahụ.