AJỤJỤ NDỊ BAỊBỤL ZARA

Olee otú ihe ga-adịrị ụmụ mmadụ n’ọdịnihu?

Ebe otu ezinụlọ gara ileta otu agadi nwaanyị bụ́ onye agbụrụ ọzọ — Olee otú ọnwụ Jizọs ga-esi eme ka mmadụ niile hụ ibe ha n’anya?

O doro anya na ndị sayensị ga na-emepụtakwu ọtụtụ ihe ndị e ji enyere ndụ aka. Ma, hà ga-emeli ka mmadụ niile hụ ibe ha n’anya? Mba. Ọtụtụ ndị nọ n’ụwa taa na-achọ naanị ọdịmma onwe ha, bụrụkwa ndị anyaukwu. Ma, ihe ọma Chineke bu n’obi imere anyị n’ọdịnihu enweghị atụ.—Gụọ 2 Pita 3:13.

Baịbụl kwuru na oge na-abịa mgbe mmadụ niile nọ n’ụwa a ga-ahụ ibe ha n’anya. Obi ga-eru onye ọ bụla ala, o nweghịkwa onye ga-akpatara ha nsogbu.—Gụọ Maịka 4:3, 4.

Olee otú ụmụ mmadụ ga-esi kwụsị ịchọ naanị ọdịmma onwe ha?

Chineke ekeghị mmadụ ka ọ na-achọ naanị ọdịmma onwe ya. Ma, mgbe nwoke mbụ Chineke kere nupụụrụ ya isi, ọ ghọziri onye na-ezughị okè. Ọ bụ ya bufeere anyị ịchọ ọdịmma onwe anyị naanị. Ma, Chineke ga-esi n’aka Jizọs mee ka ụmụ mmadụ zuokwa okè ọzọ.—Gụọ Ndị Rom 7:21, 24, 25.

Iji mezuo ihe a Chineke chọrọ, Jizọs ji ndụ ya chụọ àjà ka o nwee ike mezie ihe nnupụisi nwoke mbụ ahụ kpataara anyị. (Ndị Rom 5:19) Jizọs si otú ahụ mee ka ụmụ mmadụ nwee olileanya na o nweghịzi ndị ga na-achọ naanị ọdịmma onwe ha n’ọdịnihu, ọ gaghịkwa na-agụ ndị mmadụ agụụ ime ihe ọjọọ.—Gụọ Abụ Ọma 37:9-11.

Ọ bụrụ na ị chọrọ ịmatakwu ihe ndị a kọrọ n’isiokwu a, gụọ isi nke 5 n’akwụkwọ Gịnị n’Ezie Ka Bible Na-akụzi? Ọ bụ Ndịàmà Jehova bipụtara ya

I nwekwara ike inweta ya na www.jw.org/ig