Ime Nkwadebe—Mkpịsị Ugodi nke Ihe Ịga nke Ọma

¹ Ibu ụzọ mee nkwadebe maka ozi ga-enye aka imeri ịla azụ ọ bụla mmadụ pụrụ inwe banyere ikere òkè n’ozi ubi. Ka ị na-erute n’ọnụ ụzọ, ị ga-ama ihe ị chọrọ ịgwa ndị nwe ụlọ. I kwesịghị ịtụ ụjọ banyere ihe ịma aka ndị a pụrụ izute. Mgbe i si n’ozi lọta, ị ga-enwe mmetụta nke onye a gbara ume, n’ịmara na i tinyere mgbalị dị mma n’ozi. Ee, ime ezi nkwadebe bụ mkpịsị ugodi nke ime ka nkà ime nkwusa na izi ihe anyị dịwanye nkọ.

² Pọl mesiri ike mkpa nke ime nkwadebe site n’ịgwa anyị ka anyị were “nkwadebe nke bụ ozi ọma nke udo yikwasị n’ụkwụ” anyị. (Efe. 6:15) Nke a na-agụnye ịkwadebe uche na obi anyị, tinyekwara inwe echiche ziri ezi na àgwà nke ịdị njikere. Mgbe anyị dị njikere isoro ndị ọzọ kerịta eziokwu ahụ, a ga-eji mkpụrụ Alaeze kwụghachi ndọgbu anyị na-adọgbu onwe anyị n’ọrụ ụgwọ, na-eme anyị obi ụtọ.—Ọrụ 20:35.

³ Otú E Si Eme Nkwadebe Maka Ọrụ Ime Nkwusa: Anyị kwesịrị ịhọrọ ụzọ iche ihe n’ihu mmadụ nke ga-adịrị anyị mfe, ikekwe site ná ndị ahụ a tụrụ aro ha n’akwụkwọ Reasoning ma ọ bụ ndị ahụ a na-achọta na peji ikpeazụ nke Ozi Alaeze Anyị. Jiri nlezianya chebara akụkụ akwụkwọ nsọ ndị ị chọrọ iji mee ihe echiche, na-amata okwu ma ọ bụ nkebi ahịrị okwu ndị ị gaje imesi ike iji mee ka isi ihe ị na-ekwu pụta ìhè. Ọ dịghị mkpa iburu ụzọ iche ihe ahụ n’isi, kama, ọ kasị mma iburu ihe ndị bụ isi n’uche, tinye ya n’okwu nke aka gị, ma kwupụta ya n’ụzọ i chere na ọ ga-amasị onye na-ege gị ntị.

⁴ Nyochaa akwụkwọ i mere atụmatụ inyefe, ma họrọ isi ihe ụfọdụ na-akpali mmasị a pụrụ iji kwuo okwu. Họrọ ihe ị maara na ọ ga-amasị ndị nọ n’ókèala gị. Chee echiche banyere otú ị pụrụ isi dozigharịa ụzọ iche ihe n’ihu gị maka ụdị ndị nwe ụlọ dị iche iche—nwoke, nwanyị, onye metụrụla agadi, ma ọ bụ ntorobịa.

⁵ Ị̀ nwalewo inwe oge mmụgharị ihe? Soro ndị òtù ezinụlọ gị ma ọ bụ ndị nkwusa ndị ọzọ zukọọ iji kwurịta ụzọ iche ihe n’ihu ndị pụrụ ịdị irè, mgbe ahụkwa mụgharịa ha n’olu dara ụda ka mmadụ nile wee buru ha n’uche nke ọma. Gbalịa ime ihe yiri ọnọdụ na okwu mgbochi ndị dị adị n’ezie ndị a pụrụ izute n’ókèala unu. Mmụgharị ihe dị otú ahụ ga-emeziwanye ikwu okwu gị n’ụzọ na-aga were were, mụbawanye ịdị irè gị n’ime nkwusa, wulitekwa obi ike gị.

⁶ Tụkwasị n’ịkwadebe na ịmụgharị ụzọ iche ihe n’ihu gị, i kwesịkwara ịjụ onwe gị, sị, ‘Uwe m chọrọ iyi, ò kwesịrị ekwesị maka ozi ahụ? M̀ nwere ihe ndị dị m mkpa n’ime akpa akwụkwọ m, tinyekwara akwụkwọ nke m na-eme atụmatụ iji mee ihe? Ọ̀ dị mma n’anya? M̀ ji akwụkwọ Reasoning, traktị, ihe ndekọ ụlọ n’ụlọ, na pensịl?’ Iji iche echiche mee atụmatụ tupu oge eruo ga-eme ka e nwee ụbọchị ka na-arụpụta ihe n’ozi.

⁷ Mgbe anyị mesịrị ihe kasị mma anyị pụrụ ime iji kwadebe onwe anyị, anyị kwesịrị ikpe ekpere maka mmụọ Jehova inyere anyị aka inwe ihe ịga nke ọma. (1 Jọn 5:14, 15) Iji nlezianya chebara ime nkwadebe echiche ga-eme ka anyị nweta ọṅụ ka ukwuu n’ọrụ anyị, ka anyị ‘na-ejezu ozi anyị.’—2 Tim. 4:5.