Na-egosi Mmasị n’Ebe Ndị Ọzọ Nọ—Site n’Ime Nkwadebe

¹ Anyị ịkwadebe nke ọma tupu anyị agawa ozi ọma na-enyere anyị aka igosi mmasị n’ebe ndị ọzọ nọ. N’ụzọ dị aṅaa? Ọ bụrụ na anyị akwadebe nke ọma, anyị agaghị na-eche nanị ihe anyị ga-ekwu, nke a ga-emekwa ka anyị nwee ike ige onye nwe ụlọ ntị na ịma ihe ndị na-enye ya nsogbu n’obi. Ọzọkwa, ọ na-eme ka ụjọ ghara ijide anyị, na-emekwa ka anyị nwee ike ikwu okwu site n’obi anyị. Ma, olee otú anyị pụrụ isi kwadebe iji nwee ike inwe ihe ịga nke ọma?

² Jiri Okwu Ndị Dabara Adaba n’Ókèala Unu Mee Ihe: N’ụzọ ndị a pụrụ isi zie ozi ọma bụ́ ndị e depụtara n’Ozi Alaeze Anyị nke January 2005, họrọ otu n’ime ndị dabara adaba n’ókèala unu ma tụlee otú ị pụrụ isi kwuo ya n’okwu nke aka gị. Mee ka o kwekọọ n’ọnọdụ e nwere n’ókèala unu. Dị ka ihe atụ, ọ bụrụ na ị na-ezutekarị ndị na-ekpe otu ụdị okpukpe ma ọ bụ ndị si n’otu agbụrụ, chee echiche banyere otú ị ga-esi zie ozi ọma ka o wee nwee ike ịmasị ha. Ime ka okwu gị kwekọọ n’ọnọdụ ndị ị na-agwa okwu na-egosi na i nwere ezi mmasị n’ebe ha nọ.—1 Kọr. 9:22.

³ Ọ bụrụ na ị malite iji ụzọ ahụ na-ezi ozi ọma, nọgide na-eme ka ọ ka mma. Ebe ọ bụ na okwu mmalite na-adịkarị nnọọ mkpa, rịba ama otú ndị mmadụ si emeghachi omume n’ihe mbụ i kwuru. Ihe ị na-agwa ha maka ya ọ̀ na-amasị ha? Hà na-aza ajụjụ ndị ị na-ajụ ha? Ọ bụrụ na ọ dịghị otú ahụ, nọgide na-agbanwe ụzọ i si ezi ozi ọma ruo mgbe ị chọtara nke ga-amasị ha.

⁴ Ihe Ndị Ga-enyere Gị Aka Icheta Ihe: Ọ na-esiri ọtụtụ ndị ike icheta ihe ha ga-ekwu mgbe ha rutere na nke onye nwe ụlọ. Ọ bụrụ na ọ na-adị gị otú ahụ, ị̀ nwaleela ịmụgharị ihe ndị ị ga-ekwu site n’ikwupụta ya ekwupụta n’ihu onye i weere dị ka onye nwe ụlọ? Ime nke a pụrụ inyere gị aka iburu ihe ndị ị ga-ekwu n’uche ma kwuo ya n’ụzọ dị mfe ma doo anya. Ọ pụkwara ime ka ị mara otú ị ga-esi zaa ajụjụ dịgasị iche iche onye nwe ụlọ ga-ajụ gị.

⁵ Ihe ọzọ pụrụ inyere gị aka icheta ihe ị ga-ekwu bụ idetu isi ihe ndị ị chọrọ ikwu ná mpempe akwụkwọ ma nyobatụ ya anya mgbe i rutewere na nke onye nwe ụlọ. Ụfọdụ achọpụtala na ihe ncheta ndị a dị nkenke na-enye aka eme ka ahụ́ rukwuo ha ala, na-emekwa ka ha nwekwuo ike isoro ndị mmadụ kwurịta okwu. Anyị ime ezi nkwadebe n’ụzọ ndị dị otú a pụrụ inyere anyị aka igosi mmasị n’ebe ndị ọzọ nọ, nke a ga-emekwa ka otú anyị si ezi ozi ọma ka mma.