August Ọ̀ Ga-abụ Ọnwa Pụrụ Iche?

¹ N’afọ 1948 ọnụ ọgụgụ ndị nkwusa gburugburu ụwa gafere 226,000. Ọ bụrụ na ị nọ n’eziokwu mgbe ahụ, ị pụrụ icheta ụdị obi ụtọ anyị nwere n’inwe ọtụtụ ndị na-ekwusa ozi Alaeze ahụ! Ugbu a, nanị ná mba a e nwere ọnụ ọgụgụ ndị nkwusa hà otú ahụ. Otú ọ dị, kwa ọnwa, ná nkezi, 20,000 n’ime anyị adịghị enye akụkọ na ha keere òkè ụfọdụ n’ozi.

² Nakwere Ihe Ịma Aka Ahụ: N’August anyị na-agbalị iru ọnụ ọgụgụ kasị elu e nwetụrụla bụ́ ndị nkwusa 215,000 na Nigeria. Ọ bụrụ na mgbalị anyị agaa nke ọma, August ga-abụ ọnwa pụrụ iche n’ezie! Anyị pụrụ ime nke a ma ọ bụrụ na anyị nile emee òkè anyị.

³ Ndị na-eme atụmatụ ịga ezumike pụrụ iji oge ụfọdụ gaa ozi tupu ha agawa. Chịrị traktị, broshuọ, ma ọ bụ magazin ka i wee nwee ike ịgbara ndị ị na-ezute n’ụzọ àmà. Ọzọkwa, ị pụrụ iso ndị nkwusa nọ n’ebe ị na-aga kere òkè n’ozi.

⁴ Ọ bụrụ na i nwere nkwarụ, ị ka pụkwara ikere òkè n’ozi. Ị pụrụ inwe ike ịgbara ndị dọkịta, ndị nọọsụ, ma ọ bụ ndị na-eleta gị àmà. Ikekwe ị pụrụ iji akwụkwọ ozi ma ọ bụ telifon gbaa àmà.

⁵ Obi abụọ adịghị ya na ụfọdụ ga-enwe ekele inweta enyemaka iji kere òkè n’ozi ubi n’August. Ndị okenye, ndị ohu na-eje ozi, na ndị na-eduzi ọmụmụ akwụkwọ kwesịrị ime ndokwa maka inye enyemaka a. N’ụzọ nile o kwere mee, echezọla inye akụkọ ozi ubi gị ozugbo ọnwa gwụrụ ka e wee gụọ gị dị ka onye nkwusa n’August.

⁶ Jiri Ihe Ùgwù ahụ Kpọrọ Ihe: Ozi ahụ bụ ‘ihe ọma nke e nyere anyị n’aka idebe.’ (2 Tim. 1:14) Anyị nwere ekele maka ihe ùgwù e nyeworo anyị ikwusa ozi ọma ahụ. (1 Tesa. 2:4) Mgbe anyị tụlere ihe nile Jehova mewooro anyị, anyị kwesịrị ịbụ ndị a kwaliri ịnọgide na-ekere òkè n’ọrụ a kasị mkpa ruo ná ngwụsị afọ. Ọ dịghị ihe e kwesịrị ikwe ka o gbochie anyị ime nkwusa mgbe nile. Ka anyị mee August a ọnwa pụrụ iche n’ozi Jehova ma kpebisie ike ịgba àmà banyere ya kwa ọnwa mgbe ọ gasịrị!—Abụ Ọma 34:1.