Ọ Dị Ndị Agbata Obi Anyị Mkpa Ịnụ Ozi Ọma Ahụ
1 Ọ bụ uche Chineke “ka a zọpụta mmadụ nile, ka ha bịaruokwa mmazu nke eziokwu.” (1 Tim. 2:4) “Mmadụ nile” ga-agụnye ndị agbata obi anyị nile. Iji ozi ọma ahụ jekwuru ha na-achọ ka anyị nwee ike iche ihe n’ihu mmadụ n’ụzọ dị iche iche ma nwee nchegbu banyere ihe pụrụ ịmasị onye ọ bụla anyị na-ezute.—1 Kọr. 9:19-23.
2 Nzukọ Jehova ewepụtawo ngwá ọrụ ndị pụrụ inyere anyị aka iru n’obi nke ndị “e doro ịnata ndụ ebighị ebi.” (Ọrụ 13:48) Malite n’ọnwa July ruo September, anyị ga-enyefe ùkwù akwụkwọ dị akwụkwọ abụọ ma ọ bụ anọ n’ụtụ ego e mere ka ọ dị nnọọ ala. Ihe a gụnyere n’akwụkwọ ndị a bụ Akwukwọm nke Akukọ Bible. Akwụkwọ a pụrụ inyere ma nwata ma okenye aka ịmụta ihe Bible na-akụzi. Ka anyị hụ otú anyị pụrụ isi jiri akwụkwọ a mee ihe n’ọnwa July ruo September iji gboo mkpa ime mmụọ nke ndị agbata obi anyị.
3 Unu ga-ahụ aro ndị e depụtara n’okpuru bụ́ ndị pụrụ ịba uru mgbe a na-eche akwụkwọ Akukọ Bible n’ihu mmadụ. Aro nke ọ bụla na-agụnye (1) ajụjụ na-akpali iche echiche maka iji malite nkwurịta okwu, (2) ntụaka ebe a pụrụ ịchọta isi ihe ndị a pụrụ iji nwee nkwurịta okwu n’akwụkwọ ahụ, na (3) akụkụ akwụkwọ nsọ kwesịrị ekwesị a pụrụ ịgụ n’oge nkwurịta okwu ahụ. Ị pụrụ iji okwu nke aka gị mejupụta ụzọ iche ihe n’ihu mmadụ ahụ, dị ka nzaghachi onye ahụ si dị.
Ọ̀ dị mgbe ụwa ga-aghọ paradaịs?—Akụkọ nke 71; Mkpu. 21:3, 4.
Ì chetụwo echiche banyere ụzọ isi kasie onye onye ọ hụrụ n’anya nwụnahụrụ obi?—Akụkọ nke 92; Jọn 5:28, 29.
Olileanya dị aṅaa ka i chere dịnụ maka inyere ndị na-arịa ọrịa aka?—Akụkọ nke 96; Aịsa. 33:24.
Ọ̀ dịtụwo mgbe i chere echiche banyere ihe Jisọs Kraịst na-eme ugbu a?—Akụkọ nke 104; Kọl. 1:13, 14.
Ọ̀ dị mgbe ihe ọjọọ na-agaghị adị n’ụwa?—Akụkọ nke 114; Abụ Ọma 37:9, 10.
Ole ndị ka Chineke ga-echebe ịdị ndụ na Paradaịs?—Akụkọ nke 116; 1 Jọn 2:17.
4 Akwụkwọ Ndị Ọzọ: E nwere akwụkwọ dịgasị iche iche a gụnyere ná nnyefe ahụ pụrụ iche maka July ruo September. Mgbe ọ bụla o kwesịrị ekwesị, a pụrụ inyefe ndị anyị na-ezute akwụkwọ ndị ọzọ so ná nnyefe ahụ pụrụ iche. Ị pụrụ ịtụleghachi aro ndị dị na peji nke 13-16 n’akwụkwọ nta bụ́ Ụzọ Isi Malite ma Na-aga n’Ihu ná Nkwurịta Okwu Bible, kwadookwa ụzọ iche ihe n’ihu mmadụ ndị dị mkpirikpi bụ́ ndị pụrụ ịkpasu mmasị nke ndị a.
5 Nzube anyị n’ozi kwesịrị mgbe nile ịbụ ịmalite ọmụmụ Bible, ma ọ bụ ná nleta mbụ ma ọ bụ ná nletaghachi na-esochi ya. Iji mezuo nke ahụ, ọ bụrụgodị na onye nwe ụlọ anataghị akwụkwọ anyị ọ bụla, anyị pụrụ idokwa ijere ya nletaghachi n’ebumnobi nke ịmalite ọmụmụ Bible. Ọ bụrụ na ị malitebeghị ọmụmụ ihe n’otu n’ime ha, gafee na broshuọ Na-achọ ma ọ bụ n’akwụkwọ Ihe Ọmụma ngwa ngwa o kwere mee.
6 N’ilu Jisọs banyere onye Sameria bụ́ ezi onye agbata obi, o mere ka o doo anya na ezi onye agbata obi bụ onye na-egosi ịhụnanya na obiọma iji nyere onye ọzọ nọ ná nsogbu aka. (Luk 10:27-37) Ndị agbata obi anyị nọ ná nsogbu ime mmụọ. Ọ dị ha mkpa ịnụ ozi ọma ahụ. Ka anyị nakwere ibu ọrụ nke isoro ha kerịta ya, si otú na-egosipụta onwe anyị ịbụ ezi ndị na-eso ụzọ Jisọs Kraịst.—Mat. 24:14; Gal. 5:14.
7 Anyị na-ekele Jehova maka Akwụkwọ Nsọ bụ́ nke ‘onye nke Chineke ga-esi na ya zuo okè, onye e meworo ka o zuo okè ịrụ ezi ọrụ nile ọ bụla.’ (2 Tim. 3:17) Anyị nwekwara ekele maka akwụkwọ ndị dị ka akwụkwọ Akukọ Bible na akwụkwọ ndị ọzọ a gụnyere ná nnyefe anyị pụrụ iche. Anyị ma abamuru ha, obi dịkwa anyị ụtọ na anyị pụrụ inyefe ha n’aka ndị ọzọ n’ọnwa July ruo September.