Ndị Mụrụ Ụmụ—Setịpụrụnụ Ụmụ Unu Ezi Ihe Nlereanya
1 Okwu Chineke na-agwa anyị na “nna [na nne] nke onye ezi omume ga-etegharị egwú ọṅụ nke ukwuu.” (Ilu 23:24, 25) Lee ihe ngọzi ọ bụụrụ ndị nne na nna setịpụwooro ụmụ ha ezi ihe nlereanya! Otu onye so n’otu Kọmitii Alaka kwuru banyere ndị mụrụ ya, sị: “Eziokwu ahụ bụ ndụ ha dum, achọkwara m ime ka ọ bụrụ ndụ m dum.” Gịnị ka ụmụaka kwesịrị ịhụ n’ahụ ndị mụrụ ha?
2 Ezi Àgwà na Nkwanye Ùgwù Dị Omimi: Ọ bụ ọrụ ndị mụrụ ụmụ ịkụbanye àgwà ndị dị mma n’ime ụmụ ha. A na-amụta ezi àgwà, ọ bụghị nanị site ná ntụziaka ndị e kwuru n’ọnụ, kama site n’ịhụ ihe na-emenụ na iṅomi ihe. Ya mere, olee ụdị àgwà ị na-egosipụta? Ụmụ gị hà na-anụ ka ị na-asị “gbaghara m,” “biko,” na “i meela”? N’ime ezinụlọ, ùnu ji nkwanye ùgwù dị omimi na-emeso ibe unu? Ị̀ na-aṅa ntị mgbe ndị ọzọ na-ekwu okwu? Ị̀ na-ege ntị mgbe ụmụ gị na-agwa gị okwu? À na-egosipụta àgwà ọma ndị a ma n’Ụlọ Nzukọ Alaeze ma mgbe unu nọ nanị unu n’ụlọ?
3 Ọnọdụ Ime Mmụọ Siri Ike na Ọrụ E Ji Ịnụ Ọkụ n’Obi Na-arụ: Otu nwanna nwoke nke tinyeworo ihe karịrị afọ 50 n’ozi oge nile na-echeta, sị: “Nne m na nna m bụkwa ezi ihe nlereanya ná nghọta ha nwere maka ịdị mkpa nke nzukọ dị iche iche a na-enwe na n’ịnụ ọkụ n’obi maka ije ozi ahụ.” Olee otú i si egosi ụmụ gị na ị na-enwe nchegbu banyere ichebe ọnọdụ ime mmụọ nke ndị ezinụlọ gị? Ùnu na-atụlekọ ihe mmụta dịịrị ụbọchị ọnụ? Ùnu na-enwechi ọmụmụ ihe ezinụlọ anya? Ụmụ gị hà na-ahụ gị ka ị na-agụ Bible na mbipụta dị iche iche nke Society? Gịnị ka ha na-anụ mgbe ị na-ekpe ekpere maka ezinụlọ unu? Gị na ụmụ gị ùnu na-enwe mkparịta ụka na-ewuli elu banyere ihe ime mmụọ, na-ekwurịta ihe ndị dị mma banyere eziokwu ahụ na ọgbakọ? Ọ̀ na-adị unu ọkụ n’obi ịga nzukọ nile na ikere òkè n’ozi ubi dị ka ezinụlọ?
4 Ndị mụrụ ụmụ, tụgharịanụ uche n’ihe nlereanya unu na-esetịpụrụ ụmụ unu. Meenụ ka ọ bụrụ nke magburu onwe ya, ha ga-ejikwa ya kpọrọ ihe ná ndụ ha nile. Nwunye otu onye nlekọta na-ejegharị ejegharị, nke dị afọ 70 na ụma ugbu a, kwuru, sị: “M ka na-eritekwa uru n’ezi ihe nlereanya nke nne na nna m na-ahụ n’anya bụ́ ndị Kraịst. Ọ bụkwa ekpere m si n’ala ala obi na m ga-egosipụta ekele m zuru ezu maka ihe nketa nke a site n’iji ya mee ihe n’ọgbọ nile na-abịanụ.”