Ị̀ Pụrụ Imeghe Ụlọ Gị?

¹ Na narị afọ mbụ, ọtụtụ Ndị Kraịst wepụtara ụlọ ha maka nzukọ ọgbakọ. (1 Kọr. 16:19; Kọl. 4:15; Fil. 1, 2) N’ọgbakọ ụfọdụ taa, e nweghị ebe zuru ezu maka ìgwè Ọmụmụ Akwụkwọ Ọgbakọ nakwa maka nzukọ ozi ubi. Nke a pụrụ ime ka ìgwè ọmụmụ akwụkwọ ọgbakọ ụfọdụ na-enwe mmadụ 30 ma ọ bụ karịa na-aga ha, bụ́ nke karịrị nnọọ ọnụ ọgụgụ a chọrọ bụ́ ihe dị ka mmadụ 15.

² Ihe Ùgwù Magburu Onwe Ya: Ì chewo echiche imeghe ụlọ gị maka Ọmụmụ Akwụkwọ Ọgbakọ? Ime ụlọ buru ibu otú o kwesịrị, bụ́ nke dị ọcha, nke nwere ìhè nke ọma, ma nwee ebe ndị ikuku si abata na ya nke ọma, ga-adị mma maka nzube a. Ebe ọ bụ na ọmụmụ akwụkwọ bụ nzukọ ọgbakọ ma sorokwa ná ndokwa Jehova mere izi ndị ya ihe, inwe ọmụmụ akwụkwọ n’ụlọ gị bụ ihe ùgwù magburu onwe ya. Ọtụtụ ndị na-akọ na ha eritewo uru n’ụzọ ime mmụọ site n’imeghe ụlọ ha n’ụzọ dị otú a.

³ Ọ bụrụ na i chee na ụlọ gị kwesịrị ekwesị, biko mee ka ndị okenye mara banyere ya. Ọ pụrụ ịbụ na ha na-achọ inwetakwu ebe ndị a ga-anọ na-enwe ọmụmụ akwụkwọ ọgbakọ. Ọ bụrụ na ọ gaghị ekwe omume inwe ọmụmụ akwụkwọ n’ụlọ gị, à pụrụ inwe nzukọ maka ozi ubi na ya? Ọ bụrụgodị na e nweghị mkpa maka ya ugbu a, ndị okenye ga-enwe ekele ịmata na a pụrụ iji ụlọ gị mee ihe. Ị pụrụ inwe ihe ùgwù ahụ n’ọdịnihu.

⁴ Ịkpa Ezi Àgwà: Mgbe a na-ezukọ n’ụlọ mmadụ, ọ ga-adị mkpa ka ndị nile bịaranụ na-egosi nkwanye ùgwù maka ihe onwunwe nke onye nwe ụlọ. Ndị mụrụ ụmụ kwesịrị ijide n’aka na ụmụ ha na-anọ nanị n’ebe e wepụtara maka ọmụmụ ihe ahụ, ọ bụghị ịdị na-abanye n’ebe ụfọdụ n’ụlọ ahụ bụ́ ndị dịịrị nanị onye nwe ụlọ. E kwesịkwara ichebara ndị agbata obi echiche, na-akpachara anya izere inye ha nsogbu.—2 Kọr. 6:3, 4; 1 Pita 2:12.

⁵ Ndị Hibru 13:16 na-agba anyị ume ka anyị ghara ichefu “ime ihe ọma na iso ndị ọzọ na-ekerịta ihe, n’ihi na àjà ndị dị otú ahụ na-adị Chineke ezi mma.” Imeghe ụlọ gị maka nzukọ ọgbakọ bụ ụzọ magburu onwe ya isi soro ndị ọzọ kerịta ihe ọma na isi “sọpụrụ Jehova site n’akụ̀ gị.”—Ilu 3:9.