Ihe A Ga-ekwu Banyere Magazin Ndị A

Ụlọ Nche Feb. 15

“Ụfọdụ na-ekwu na ndị mmadụ na-ebibi ụwa. Ò nwetụla mgbe nke ahụ nyere gị nsogbu n’obi? [Chere ka ọ zaa.] Legodị nkwa na-emesi obi ike e kwere ebe a. [Gụọ Mkpughe 11:18.] Magazin a kwuru ihe ndị mere mbara ụwa anyị a ji pụọ iche. Ọ kọwakwara ihe Bible kwuru banyere ọdịnihu ụwa.”

Ụlọ Nche Mar. 1

“Ọtụtụ mmadụ na-ekwu na okpukpe nile na-eduga n’ebe Chineke nọ. Ì chere na o nwere ihe okpukpe mmadụ họọrọ ikpe mere? [Chere ka ọ zaa.] Legodị aro a tụrụ ebe a. [Gụọ 1 Jọn 4:1.] Magazin a kwuru otú anyị ga-esi nwalee ozizi nile iji hụ ma hà sitere n’aka Chineke. O kwukwara otú okpukpe dịgasị iche iche si malite.”

Teta! Jan.-Mar.

“Ọtụtụ mmadụ na-eche na ha ga-enwere onwe ha pụọ n’ihe mgbu na ọrịa ma ha nwụọ gaa eluigwe. Ọ̀ dịtụla mgbe i chere otú ahụ? [Chere ka ọ zaa.] Obi dị m ụtọ ime ka ị mara na olileanya Bible na-enye ụmụ mmadụ n’ezie bụ olileanya nke ịdị ndụ n’ụwa e mere ka ọ ghọọ paradaịs, ọ bụghị nke ịga eluigwe dị ka ọtụtụ mmadụ chere.” [Gụọ Abụ Ọma 37:11.] Ị gụsịa ya, i jiri isiokwu ahụ dị na peeji nke 10 nyefee ya.

“N’echiche nke gị, olee ụfọdụ n’ime ihe ịma aka ndị na-eto eto na-enwe taa? [Chere ka ọ zaa.] Magazin a kwuru otu n’ime ha—ya bụ, ha inwe mmekọahụ mgbe ha na-alụbeghị di ma ọ bụ nwunye. [Gụọ 1 Ndị Kọrint 6:9, 10.] Omume ahụ bụ ịkwa iko! E wezụga ire ùgwù mmadụ, ọ pụrụ ime ka mmadụ bute ọrịa, tụrụ ime ọkwà, ọ pụkwara ịkpata obi mgbawa. Nke kachasịnụ bụ na onye ahụ emebiela ụkpụrụ ezi omume Chineke. Magazin a na-egosi ihe mere na e kwesịghị ile ya anya dị ka ihe na-egosi na nwoke na nwanyị hụrụ ibe ha n’anya.” Jiri isiokwu ahụ dị na peeji nke 22 nyefee ya.