Ị̀ Maara Ihe Ndị I Nwere Ike Ịhọrọ?

Ọnụ ọgụgụ ndị dọkịta na-awazi ndị mmadụ ahụ́ n’ejighị ọbara na Nigeria na-amụba amụba. Ị̀ maara ụzọ dị iche iche e nwere ike isi gwọọ onye na-achọghị ka a mịnye ya ọbara? Ọ dị mkpa ka ị mara ka i wee nwee ike ime mkpebi dị mma mgbe a bịara n’ihe metụtara ọgwụgwọ na ịwa ahụ́. Kirie vidio bụ́ No Blood—Medicine Meets the Challenge. I kirichaa ya, kpee ekpere banyere ihe ndị ị mụtara ma jiri ajụjụ ndị dị n’okpuru ebe a tụleghachi ihe ndị i kpebiri ime.—Ihe Ị Ga-eburu n’Uche: Ebe ọ bụ na e gosiri ụfọdụ ebe a na-awa ahụ́ na vidio ahụ, ndị mụrụ ụmụ kwesịrị ịma ihe ha ga-eme mgbe ha na ụmụ ha ndị obere na-ekiri ya.

(1) Olee ihe bụ́ isi mere Ndịàmà Jehova anaghị ekwe ka a mịnye ha ọbara? (2) A bịa n’ihe metụtara ịgwọ ọrịa, gịnị ka Ndịàmà Jehova na-achọ? (3) Olee ikike bụ́ isi ndị ọrịa nwere? (4) Gịnị mere mmadụ ịhọrọ ọgwụ ndị e ji edochi anya ọbara kama ikwe ka a mịnye ya ọbara ji kwesị ekwesị? (5) Ọ bụrụ na ọbara gbara mmadụ nnukwu, olee ihe abụọ ọ dị mkpa ka ndị dọkịta buru ụzọ mee ozugbo? (6) Olee ihe anọ a na-eme iji hụ na a gwọrọ onye ọbara kọrọ n’ahụ́ ọrịa n’amịnyeghị ya ọbara? (7) Olee otú ndị dọkịta pụrụ isi mee (a) ka ọbara kwụsịlata ịgba mmadụ, (b) ka mkpụrụ ndụ na-acha uhie uhie nke na-adị n’ọbara ghara ịgwụ mmadụ n’ahụ́, (ch) ka ahụ́ mmadụ mepụtawakwuo ọbara, na (d) ka e nwetaghachi ọbara gbapụrụ mmadụ n’ahụ́? (8) Kọwaa ihe a na-eme n’ụdị ọgwụgwọ ndị Bekee na-akpọ (a) hemodilution na (b) cell salvage. (9) Gịnị ka ị ga-achọ ka a kọwaara gị banyere ụdị ọgwụ ndị e nwere ike iji dochie anya ọbara? (10) È nwere ike ịwa mmadụ ahụ́ maka ọrịa siri ike ọ na-arịa n’amịnyeghị onye ahụ ọbara? (11) Olee mgbanwe ndị dị mma ndị dọkịta na-emezi?

Ọ dịịrị onye ọ bụla iji akọ na uche ya e ji Baịbụl zụọ họrọ otú ọ ga-achọ ka e si gwọọ ya site n’ụdị ọgwụgwọ ndị e gosiri na vidio a. Ì kpebiela kpọmkwem ụzọ ndị e si agwọ ọrịa n’amịnyeghị ọbara, bụ́ ndị ị ga-ekwe ka e jiri gwọọ ma gị ma ụmụ gị ma dejupụtazie kaadị DPA gị? Ị chọọ ebe a tụlere okwu a nke ọma, jiri nlezianya tụleghachi “Ajụjụ Ndị Na-agụ Akwụkwọ Anyị Na-ajụ” nke dị n’Ụlọ Nche June 15, 2004, na nke October 15, 2000. Leruzie anya n’ihe ndị a kọwara n’ihe ntinye Ozi Alaeze Anyị nke December 2006, nke isiokwu ya bụ, “Olee Ihe M Kwesịrị Ikpebi Ma A Chọọ Iji Ọbara M Gwọọ M Ọrịa Nakwa Ma A Chọọ Iji Ihe E Si n’Ihe Ndị Bụ́ Isi Mejupụtara Ọbara Nweta, Gwọọ M Ọrịa?,” ma kpebie ihe ndị ị ga-anabata na ihe ndị ị ga-ajụ. Mgbe i mesịrị, hụ na i debara ihe niile ị họọrọ na kaadị DPA gị. I kwesịrị ime ka ndị ọ bụla ị họọrọ ịhụ maka ahụ́ ike gị na ndị òtù ezinụlọ gị na-abụghị Ndịàmà ghọta ihe ndị i kpebiri nke ọma.

Igbe dị na peeji nke 2]

• Ì kpebiela otú ị ga-achọ ka e si gwọọ ma gị ma ụmụ gị?

• Ị̀ na-eji kaadị DPA e dejupụtara edejupụta aga ebe ọ bụla ị na-aga maka a dịghị ama ama?