Ihe I Nwere Ike Ikwu

Ịmalite Ọmụmụ Baịbụl na Satọdee Mbụ n’Ọnwa Ọktoba

“N’oge a ihe siri ike, o nweghị ezinụlọ ga-asị na ha anaghị enwe nsogbu. Olee ihe i chere ga-enyere anyị aka ịma ihe anyị ga-eme ka ezinụlọ anyị na-enwe obi ụtọ?” Chere ka ọ zaa. Nyezie onye nwe ụlọ Ụlọ Nche Ọktoba 1, gị na ya tụleekwa ihe e dere n’okpuru otu n’ime ajụjụ ndị dị na peeji nke 16 na nke 17. Gụọkwanụ, ma ọ́ dịghị ihe ọzọ, otu amaokwu Baịbụl e dere ebe ahụ. Unu mechazie, nyekwuo ya otu Teta!, gị na ya yiekwa mgbe ị ga-abịaghachi ka unu tụlee ajụjụ ndị nke ọzọ.

Ụlọ Nche Ọktoba 1

Gosi onye nwe ụlọ ihu magazin ahụ ma jụọ ya, sị: “Olee otú obi ga-adị gị ma ị chọpụta na ihe ndị a kụziiri gị gbasara Chineke abụghị eziokwu? [Chere ka ọ zaa.] Legodị ihe Jizọs kwuru na ọ bụ ya ga-enyere anyị aka ịma ihe bụ́ eziokwu na ihe na-abụghị eziokwu. [Gụọ Jọn 17:17.] Ebe a na-ekwu na ọ bụ naanị Baịbụl ga-agwa anyị eziokwu gbasara Chineke. Magazin a kwuru ụzọ ụgha ise a na-aghagide Chineke. Ma, Baịbụl gwara anyị nke bụ́ eziokwu.”

Teta! Ọktoba–Disemba

“Anyị na-agakwuru ezinụlọ dị iche iche taa na-agwa ha ihe ndị ga-abara ha uru. Ka m jụgodị gị: Olee nsogbu ị ga-asị na ọ bụ ya kacha nsogbu niile ndị nne na nna na-enwe ma a bịa n’ịzụ ụmụ? [Chere ka ọ zaa.] Ọtụtụ ndị nne na nna na-agba mbọ ime ihe Baịbụl kwuru. Dị ka ihe atụ, ihe a Baịbụl kwuru ebe a na-enyere ndị nne na nna aka ịma otú ha ga-esi na-adọ ụmụ ha aka ná ntị. [Gụọ Ndị Efesọs 4:31.] Magazin a kọwara ihe Baịbụl kwuru gbasara otú ndị nne na nna ga-esi zụọ ụmụ ha malite mgbe e ku ha n’aka ruokwa mgbe ha ghọrọ dimkpa.”