Ịkpọ Ndị Mmadụ Òkù Maka Mgbakọ Ukwu
1. Olee mgbe anyị ga-amalite ịkpọ ndị mmadụ òkù ka ha soro gaa mgbakọ n’afọ a?
1 Ọ bụrụ na ị chọrọ imere ikwu na ibe gị ma ọ bụ ndị enyi gị oriri nke ga-ewe gị ma oge ma ego, o doro anya na ị ga-eji obi ụtọ gwa ha ka ha bịa. Jehova na-akpọ anyị oriri ná mgbakọ ukwu nakwa mgbakọ mba niile a ga-enwe n’afọ a. E meekwala ọtụtụ ihe iji kwadebe ihe a ga-eme ná mgbakọ ndị ahụ. Izu atọ tupu anyị agaa mgbakọ nke e kenyere anyị, anyị ga-amalite ịkpọ ndị mmadụ òkù ka ha soro anyị gaa mgbakọ a. Gịnị ga-enyere anyị aka iji obi ụtọ na ịnụ ọkụ n’obi kpọọ ndị mmadụ òkù maka mgbakọ a?
2. Gịnị ga-enyere anyị aka iji ịnụ ọkụ n’obi kpọọ ndị mmadụ òkù ka ha bịa mgbakọ?
2 Ọ bụrụ na anyị echeta uru anyị na-erite n’ihe omume ndị a na-eme ná mgbakọ, anyị ga-eji obi anyị niile soro kpọọ ndị mmadụ òkù ka ha bịa mgbakọ a. (Aịza. 65:13, 14) Anyị kwesịkwara icheta na òkù anyị na-akpọ ndị mmadụ kwa afọ anaghị ala n’iyi. Ụfọdụ anyị kpọrọ na-eso anyị aga mgbakọ. Ma, ndị anyị kpọrọ òkù hà bịara ma ọ bụ na ha abịaghị, mbọ anyị ga-agba ga-ewetara Jehova otuto, gosikwa na ọ hụrụ mmadụ niile n’anya.—Ọma 145:3, 7; Mkpu. 22:17.
3. Olee otú anyị ga-esi nye ndị mmadụ akwụkwọ ịkpọ òkù?
3 Ndị okenye ọgbakọ ọ bụla ga-eji aka ha hazie otú a ga-esi kpọọ mmadụ niile nọ n’ókèala ha òkù. Ha ga-ekpebi ebe ndị a ga-aga nye ndị mmadụ akwụkwọ ịkpọ òkù, kpebiekwa ma à ga-afanye ya n’ọnụ ụzọ ndị na-anọghị n’ụlọ. E nwere ike inyekọta ndị mmadụ magazin na akwụkwọ ịkpọ òkù n’ụbọchị Satọdee nakwa na Sọnde. Ọ bụrụ na Satọdee mbụ n’ọnwa adanye n’oge a na-enye ndị mmadụ akwụkwọ ịkpọ òkù, ọ bụ akwụkwọ ịkpọ òkù ka anyị ga-enye ndị mmadụ kama ịmalitere ha ọmụmụ Baịbụl. Izu atọ ahụ gachaa, obi ga-adị anyị ụtọ na anyị ji ịnụ ọkụ n’obi kpọọ ndị mmadụ òkù ka ha soro anyị gaa oriri Jehova kpọrọ anyị.