Ịkpọ Ndị Mmadụ Òkù Ka Ha Bịa Mgbakọ Ukwu

1. Olee mgbe anyị ga-ebido ịkpọ ndị mmadụ òkù ka ha bịa mgbakọ ukwu anyị?

¹ Ọ bụrụ na ị chọrọ imere ikwu na ibe gị ma ọ bụ ndị enyi gị oriri nke ga-ewe gị ma oge ma ego, o doro anya na ị ga-eji obi ụtọ na-agwa ha ka ha bịa. A haziela ọtụtụ ihe ka anyị nwee ike ịmụta ihe ná mgbakọ ukwu a ga-enwe n’afọ a. Jehova enyela anyị ọrụ ịkpọ ndị mmadụ òkù ka ha bịa mgbakọ a. Anyị ga-ebido ịkpọ ha mgbe ọ fọrọ izu atọ ka anyị gaa nke e kenyere ọgbakọ anyị. Gịnị ga-enyere anyị aka iji obi ụtọ na-akpọ ndị mmadụ ka ha bịa mgbakọ ukwu ahụ?

2. Gịnị ga-enyere anyị aka iji obi anyị niile kpọọ ndị mmadụ ka ha bịa mgbakọ ukwu anyị?

² Ọ bụrụ na anyị eburu n’obi na e nwere ọtụtụ ihe Jehova na-akụziri anyị ma anyị gaa mgbakọ ukwu, ọ ga-eme ka anyị jiri obi anyị niile kpọọ ọtụtụ ndị ka ha bịa mgbakọ a. (Aịza. 65:13, 14) Anyị kwesịkwara icheta na òkù anyị na-akpọ ndị mmadụ kwa afọ bara uru. (Gụọ ihe dị n’igbe isiokwu ya bụ “Ọ Bara Uru.”) Ụfọdụ ndị anyị kpọrọ òkù ga-abịa. N’agbanyeghị mmadụ ole zara òkù ahụ, ihe anyị kwesịrị ịna-echeta mgbe niile bụ na otú anyị si jiri obi anyị niile kpọọ ndị mmadụ òkù ka ha bịa mgbakọ a na-enye Jehova otuto, na-egosikwa na ọ hụrụ ụmụ mmadụ n’anya.—Ọma 145:3, 7; Mkpu. 22:17.

3. Olee otú a ga-esi kesaa akwụkwọ ịkpọ òkù maka mgbakọ ukwu?

³ Ndị okenye ọgbakọ ọ bụla ga-eji aka ha hazie otú a ga-esi kpọọ mmadụ niile nọ n’ókèala ha òkù. Ha ga-ekpebi ma à ga na-afanye akwụkwọ ịkpọ òkù n’ụzọ ndị na-anọghị n’ụlọ ma ọ bụkwanụ ma à ga na-enye ya ndị mmadụ n’okporo ámá. E nwere ike inyekọta ndị mmadụ magazin na akwụkwọ ịkpọ òkù n’ụbọchị Satọdee na Sọnde. Izu atọ ahụ gachaa, obi ga-adị anyị ụtọ na anyị ji ịnụ ọkụ n’obi kpọọ ndị mmadụ òkù ka ha soro anyị gaa oriri Jehova kpọrọ anyị.

Ọ Bara Uru

Otu nwanna nwaanyị so na-ekesa akwụkwọ ịkpọ òkù maka mgbakọ ukwu n’otu afọ kwuru na ya nọ na-eche ma ò nwere ezigbo ihe ga-esi ná mbọ a ha na-agba apụta, ya bụ, ma ò nwedịrị ndị ga-aza òkù a ha na-akpọ ndị mmadụ. Ma n’ụbọchị Satọdee mgbakọ ahụ, ọ hụrụ otu nwoke nọ ya n’akụkụ, ya ekelee ya. Nwoke ahụ gwara ya na ihe mere ya ji bịa bụ na o nwere onye nyere ya akwụkwọ ịkpọ òkù. Nwanna nwaanyị ahụ zara ya ọtụtụ ajụjụ ọ jụrụ. Nwoke ahụ kwuru na ihe niile e kwuru ná mgbakọ ahụ tọrọ ya ụtọ. Ihe ọzọ o kwuru tọrọ ya ụtọ bụ otú ụmụnna si jie ejiji nakwa otú ha si akpa àgwà. N’ụbọchị ahụkwa, nwanna nwaanyị ahụ hụkwara otu di na nwunye bịara mgbakọ ahụ. O kelere ha, ha na ya akpawa nkata. Ha kwuru na o nwere onye nyere ha akwụkwọ ịkpọ òkù nakwa na ihe ha ji bịa bụ bọs. Ihe omume ụbọchị ahụ tọrọ ha ụtọ nke na ha kwuru na ha ga-abịakwu na Sọnde. Ihe niile a merenụ mere ka nwanna nwaanyị a ghọta na ndị mmadụ na-aza òkù anyị na-akpọ ha ka ha bịa mgbakọ ukwu anyị.
E nwere di na nwunye bịara mgbakọ anyị n’oge na-adịbeghị anya. Mgbe otu di na nwunye bụ́ ndị ọsụ ụzọ hụrụ ha, ha agaa kwusawara ha okwu. Di na nwunye ahụ kwuru na ụbọchị ahụ bụ nke mbụ ha na-abịa mgbakọ. Nwanna ahụ na nwunye ya jụrụ ha onye gwara ha gbasara mgbakọ ahụ. Ha kwuru na o nwere ụbọchị ha lọtara n’ụlọ ha hụ akwụkwọ ịkpọ òkù a fanyere n’ụzọ ha. Ha gụrụ ya ma dejupụta azụ ya iji kwuo na ha chọrọ ka a bịa mụwara ha Baịbụl. Ụmụnna ndị ọzọ bịara mgbakọ ahụ nyekwara di na nwunye a nri ehihie. Ihe ha mụtara n’ụbọchị ahụ tọrọ ha ezigbo ụtọ, ha ekpebie na ha ga-abịakwu echi ya. E mechakwara hazie ka a mụwara ha Baịbụl.