Otú Anyị Ga-esi Na-emekwu nke Ọma n’Ozi Ọma—Ikwulite Ihe Ị Ga-eji Zie Mmadụ Ozi Ọma

Ihe Mere O ji Dị Mkpa: Anyị gaa ozi ọma ụlọ n’ụlọ, anyị anaghị ahụ ọtụtụ ndị. Ma, anyị nwere ike ịhụ ha mgbe anyị bara ụgbọala, mgbe anyị gara ụlọ ọgwụ, mgbe anyị gara ụlọ akwụkwọ, mgbe anyị gara ọrụ ma ọ bụ mgbe anyị gara ebe ndị ọzọ. Ị manụ na Jehova chọrọ ka mmadụ niile nụ ozi ọma Alaeze ya. (1 Tim. 2:3, 4) N’ihi ya, anyị kwesịrị izi ha ozi ọma n’ebe ọ bụla anyị hụrụ ha. Ma, anyị ga-ebu ụzọ kwulite otu ihe ka anyị nwee ike izi ha ya.

Ihe Anyị Ga-eme:

Leruo anya ala ka ị mara onye ị ga-agwa okwu. Onye ị chọrọ ịgwa okwu ò nyere gị ihu? Ebe ahụ unu nọ ọ̀ bụ ebe ị ga-anọ gwawa ya okwu? Ndị nkwusa ụfọdụ na-ebu ụzọ amụmụrụ onye ha chọrọ ịgwa okwu ọnụ ọchị. Ọ bụrụ na onye ahụ mụmụọkwa ọnụ ọchị, ha amalite ịgwa ya okwu.
Ọ bụrụ na obi akaghị gị ịgwa mmadụ okwu, buru ụzọ kpee ekpere.—Nehe. 2:4; Ọrụ 4:29.
Buru ụzọ kelee onye ahụ ma ọ bụ gị ekwuo obere ihe ga-eme onye ahụ obi ụtọ. Cheta na ihe mbụ Jizọs gwara nwaanyị Sameria ọ hụrụ n’akụkụ olulu mmiri abụghị okwu Alaeze Chineke. (Jọn 4:7) Ka anyị nwee ike ikwulite ihe anyị ga-eji zie mmadụ ozi ọma, anyị nwere ike ibu ụzọ jaa onye ahụ mma. Anyị nwere ike ịsị ya: “Ahụrụ m na ị na-azụ ụmụ gị nke ọma.” Anyị nwekwara ike ịjụ onye ahụ ajụjụ dị ka: “Ị̀ nụrụ ihe mere ụnyaahụ?”
Gị na onye ahụ malite ikwu okwu, chọzie otú ị ga-esi jiri nwayọọ nwayọọ webata okwu Alaeze Chineke. Etinyela ya okwu n’ọnụ. I nwere ike ikwu ihe ga-eme ka ọ jụọ gị ajụjụ ma ọ bụ chọọ ịghọtakwu ihe i kwuru. Dị ka ihe atụ, ọ bụrụ na gị na ya na-ekwu banyere ezinụlọ, i nwere ike ịsị ya, “E nwere ihe na-enyere m aka ịzụ ụmụ m.” Ọ bụrụ na unu na-ekwu banyere ihe merenụ, i nwere ike ịsị, “E nwere ihe m gụrụ mere m obi ụtọ.” Ya ewutela gị ma ọ bụrụ na unu malitere ikwu okwu ma unu ekwughị ihe ọ bụla gbasara Alaeze Chineke tupu onye ahụ apụwa.
Na-eji traktị ma ọ bụ akwụkwọ ndị ọzọ i nwere ike inye mmadụ.

Mee Ihe A n’Ọnwa A:

Kwa izu, gbalịa kwulite ihe ga-eme ka i zie mmadụ ozi ọma mgbe ị na-anọghị n’ozi ọma.