Otú Anyị Ga-esi Na-emekwu nke Ọma n’Ozi Ọma—Ihe Anyị Ga-eme ma Ọ Bụrụ na A Nabataghị Anyị

Ihe Mere O Ji Dị Mkpa: Ọtụtụ ndị anyị na-aga ozi ọma na nke ha na-anabata anyị. Ma, echefukwala na Jizọs kwuru na ụfọdụ ndị ga-akpọ anyị asị. (Jọn 17:14) N’ihi ya, ọ gaghị eju anyị anya ma anyị gaa ozi ọma na nke mmadụ, ya ajụ ịnabata anyị. Ọ bụrụ na onye anyị gara izi ozi ọma anabataghị anyị, anyị kwesịrị ime ihe ga-atọ Jehova ụtọ, bụ́ onye nwee ozi ọma a anyị na-ezi. (Rom 12:17-21; 1 Pita 3:15) Ime otú ahụ ga-eme ka ihe ghara ịka njọ. Ọ ga-emekwa ka onye ahụ ma ọ bụ ndị ọzọ hụrụ àgwà ọ kpasoro anyị mara na ọ bụ Jehova ka anyị na-ejere ozi. Ha nwekwara ike iji maka otú anyị si kpaa àgwà gee ụmụnna anyị ntị n’oge ọzọ.—2 Kọr. 6:3.

Ihe Anyị Ga-eme:

Na-emesapụrụ ndị mmadụ ihu, a sịgodị na ha anabataghị gị. Ime otú ahụ nwere ike ịgbanwe obi onye na-achọbughị ịnabata anyị. Ekwela ka àgwà onye ị gara izi ozi ọma kpara kpasuo gị iwe. (Ekli. 7:9) O nwere ike ịbụ na obi adịghị ya mma n’ihi ihe ya na ya na-alụ, ma ọ bụkwanụ ya abụrụ na ị bịara na nke ya mgbe o ji ihe n’aka. Ọ bụrụgodị na o nweghị mmasị n’ozi anyị, o nwere ike ịbụ ihe na-abụghị eziokwu a kụziiri ya kpatara ya.—2 Kọr. 4:4.
Agwala ya okwu ọjọọ. (Ilu 15:1) Anyị ekwesịghị ịgwa ndị mmadụ ka ha ghara iwe iwe na anyị bịara ozi ọma na nke ha. Ma, ọ bụrụ na i metere onye ị bịara na nke ya n’ụra ma ọ bụ bịa mgbe ọ na-eme ihe, sị ya ewela iwe. Ọ bụrụ na ọ bụ ihe a gwara ya gbasara anyị mere na ọ chọghị ige gị ntị, i nwere ike ịsị ya: “Aghọtara m ihe mere o ji na-ewe gị iwe. Ma, o yiri ka ihe ị nụrụ gbasara anyị abụghị eziokwu. Nyetụ m ohere ka m gwa gị nke bụ́ eziokwu.” Ọ bụrụ na ihe mere na obi adịghị ya mma bụ na anyị anaghị ekwe ka a mịnye anyị ọbara ma ọ bụ na anyị na-achụ mmadụ n’ọgbakọ ma ọ bụkwanụ n’ihi ihe ndị ọzọ anyị kweere, i nwere ike ikele ya ma gwa ya na ọ bụghị naanị ya ka ụdị ihe ahụ na-ewute. Gwa ya na ị ga-achọ igosi ya ihe Baịbụl kwuru gbasara ihe ahụ.
Ọ bụrụ na o nweghị otú ị ga-esi gwa onye ị chọrọ izi ozi ọma okwu n’ihi na ezigbo iwe ji ya, ọ ga-aka mma ịhapụ ya n’asaghị ya okwu. Ọ bụrụkwa na o kwuru na ya achọghị ka Ndịàmà Jehova na-abịa na nke ya, gwa ya na anyị ga-eme ihe o kwuru.

Mee Ihe A n’Ọnwa A:

Unu na-enwe ofufe ezinụlọ, mụgharịanụ ihe unu ga na-agwa ndị na-achọghị ka e zie ha ozi ọma.
Ọ bụrụ na mmadụ ekweghị ka unu zie ya ozi ọma, unu pụta na nke ya, kwurịtanụ otú ka mma unu gaara esi agwa ya okwu.