Otú Anyị Ga-esi Na-emekwu Nke Ọma n’Ozi Ọma—Inyere Ndị Malitere Ikwusa Ozi Ọma Ọhụrụ Aka

Ihe Mere O Ji Dị Mkpa: Ndị malitere iso ụzọ Jizọs ọhụrụ kwesịrị idebe “ihe niile” o nyere n’iwu. Otu n’ime ụzọ ha ga-esi eme ya bụ izi ndị ọzọ ozi ọma. (Mat. 28:19, 20) Ọtụtụ n’ime ndị ọhụrụ a edenyela aha ha n’Ụlọ Akwụkwọ Ije Ozi Ọchịchị Chineke, o nwekwara ike ịbụ na ha na-akọrọ ndị ezinụlọ ha ma ọ bụ ndị enyi ha ihe ha na-amụta na Baịbụl. Ma, ka ihe ha na-amụta na Baịbụl na-emekwu ha obi ụtọ, ha aghọtakwa na Jehova chọrọ ka mmadụ niile nụ ozi ọma, ha nwere ike ikwu na ha ga-achọ ịmalite iso ọgbakọ na-aga ozi ọma. (Rom 10:13, 14) Ọ bụrụ na ha aghọọ ndị nkwusa a na-emebeghị baptizim, e kwesịrị inye ha ọzụzụ ka ha nwee ike ịna-ekwusa ozi ọma nke ọma.—Luk 6:40.

Ihe Ị Ga-eme:

Gosi ya ebe ọ ga na-enweta akwụkwọ ndị ọ ga-eji na-aga ozi ọma. Gosikwa ya akwụkwọ ndị ị na-etinye n’akpa ozi ọma gị, kọwakwaara ya otú e si eji akwụkwọ nke ọ bụla ezi ozi ọma.
Jiri aro a tụrụ n’Ozi Alaeze Anyị kụziere onye ọhụrụ ahụ otú o nwere ike isi zie ozi ọma. I nwekwara ike ịgwa ya ka o jiri aro ahụ zie gị ozi ọma. Nyere ya aka ka ọ mụta otú ọ ga-esi kọwaara mmadụ ihe ọ ghọtara ebe ahụ kama iburuwe okwu niile e dere ebe ahụ n’isi. Gaa na peeji nke 82 n’akwụkwọ Ụlọ Akwụkwọ Ije Ozi họrọ aro ụfọdụ ga-adaba n’ókèala unu, gị na ya amụọkwa otú ọ ga-esi jiri ha zie mmadụ ozi ọma. Kụziekwara ya na o kwesịrị ịna-eji ejiji dị mma.—2 Kọr. 6:3, 4.
Kụziere ya ihe ndị ga-enyere ya aka. Gosi ya kaadị na-egosi ebe ndị pụtara ozi ọma ga-arụ. Kụziekwara ya ihe ndị anyị kwesịrị ide n’akwụkwọ gbasara mmadụ ma onye ahụ nwee mmasị. Kụziere ya otú ọ ga-esi jiri akwụkwọ Good News for People of All Nations na jw.org na-ezi ndị mmadụ ozi ọma. Nyekwara ya aka ka ọ mụta otú ọ ga-esi malitere ndị nwere mmasị ọmụmụ Baịbụl.—1 Kọr. 3:6.
Na-enwere ya ndidi, na-ajakwa ya mma. (Ilu 25:11) Na-emekwa ihe ị na-akụziri ya. Jiri ịnụ ọkụ n’obi na-ezi ndị mmadụ ozi ọma, hụkwa ndị ị na-ezi ozi ọma n’anya. Ihe ọ mụtara n’aka gị ga-enyere ya aka n’ozi ya.

Mee Ihe A n’Ọnwa A:

Ị gawa ozi ụlọ n’ụlọ, gị na onye ị na-amụrụ Baịbụl soro gaa. Gị na ya sorokwa ma ị gawa nletaghachi ma ọ bụ ịmụrụ mmadụ ihe. I nwekwara ike ịgwa onye nkwusa ọhụrụ ọzọ na-abụghị onye ị na-amụrụ ihe ka gị na ya rụọ n’ozi ọma.