Jiri Akwụkwọ Na-enwe Obi Ụtọ Ruo Mgbe Ebighị Ebi Na-akụzi Ihe n’Ozi Ọma

Obi dị anyị ezigbo ụtọ inweta broshọ na akwụkwọ ọhụrụ anyị ga-eji na-amụrụ ndị mmadụ Baịbụl. Ekpere anyị bụ ka Jehova gọzie mbọ anyị na-agba imekwu ka ọtụtụ ndị ghọọ ndị na-eso ụzọ. (Mat. 28:​18-20; 1 Kọr. 3:​6-9) Olee otú anyị ga-esi jiri akwụkwọ ọhụrụ ndị a na-amụrụ ndị mmadụ Baịbụl?

E nwere ụzọ ọhụrụ a ga-esi jiri akwụkwọ Na-enwe Obi Ụtọ Ruo Mgbe Ebighị Ebi na-amụrụ ndị mmadụ Baịbụl. Lee ihe ndị ị ga-eme ma ị kwadebewe ịmụrụ mmadụ Baịbụl nakwa ma ị mụwara onye ahụ Baịbụl.a

• Gụọ paragraf ndị dị na ya ma leba anya n’ajụjụ ha

• Gụọ amaokwu Baịbụl ndị e dere “gụọ” ma nyere onye ị na-amụrụ ihe aka ịghọta ihe ha pụtara

• Lee vidio dị n’ebe unu na-amụ ma jiri ajụjụ ndị e depụtara tụlee ya

• Gbalịanụ na-amụcha otu isi otu mgbe

Ị nọrọ n’ozi ọma, buru ụzọ nye mmadụ nke broshọ iji mara ma ò nwere mmasị ịmụ Baịbụl. (Gụọ igbe isiokwu ya bụ, “Otú E Si Enye Mmadụ Broshọ Na-enwe Obi Ụtọ Ruo Mgbe Ebighị Ebi ná Mkparịta Ụka nke Mbụ.”) Unu mụchaa nke broshọ ahụ, ya abụrụ na ọ ka nwere mmasị ịmụrụ na-aga, nyezie ya nke akwụkwọ ya ma malitenụ n’isi nke 04 mụrụ gawa. Ọ bụrụ na o nwere onye gị na ya na-amụ akwụkwọ Baịbụl Na-akụziri Anyị ma ọ bụ akwụkwọ Nọrọnụ n’Ịhụnanya Chineke, gafeenụ n’akwụkwọ Na-enwe Obi Ụtọ Ruo Mgbe Ebighị Ebi ma kpebie isi nke unu ga-eji malite.

LEENỤ VIDIO BỤ́ OBI DỊ ANYỊ ỤTỌ NA Ị CHỌRỌ ỊMỤ BAỊBỤL, ZAAKWANỤ AJỤJỤ NDỊ A:

• Gịnị ka ndị ị na-amụrụ ihe ga-amụta n’akwụkwọ ọhụrụ a?

• Gịnị mere i kwesịrị iji gosi ndị chọrọ ịmụ Baịbụl vidio a?

• Ka unu na-amụ ihe na-aga, olee ihe ndị i kwesịrị ịgba onye ị na-amụrụ ihe ume ka o kpebie ime ma gbaakwa mbọ mee?​—Lee chaatị bụ́ “Ihe E Kwuru ná Nkebi nke Ọ Bụla na Ihe Onye A Na-amụrụ Baịbụl Ga-eme”