Ihe Ndị Ga-eme Ka Nzukọ Ozi Ubi Baa Uru

Ọ bụ Jehova haziri ka anyị na-enwe nzukọ ozi ubi otú ahụ ọ haziri ka anyị na-enwe ọmụmụ ihe ọgbakọ. Ọ haziri ya iji mee ka anyị na-ahụrịta ibe anyị n’anya ma na-arụ ezigbo ọrụ. (Hib. 10:​24, 25) O kwesịrị ịna-ewe nkeji ise ruo nkeji asaa. Ịhazi ndị pụtara ozi ọma, ikenye ìgwè nke ọ bụla ebe ha ga-arụ, na ikpe ekpere socha n’ihe a ga-eme n’ime oge ahụ. (Ọ bụrụ na a ga-enwe nzukọ ozi ubi ozugbo a gbasara ọmụmụ ihe, o kwesịdịrị ịdị mkpụmkpụ karịa.) Onye ga-eduzi ya kwesịrị ikwu ihe ndị ga-abara ndị pụtara ozi ọma n’ụbọchị ahụ uru. Dị ka ihe atụ, ọ bụrụ na ọtụtụ n’ime ndị pụtara ozi ọma na Satọdee agabeghị ozi ọma kemgbe izu ahụ, i nwere ike ikwu naanị banyere otú e si amalite mkparịta ụka. Olee isiokwu ndị ọzọ dị mma e nwere ike iji mee nzukọ ozi ubi?

• Ihe gị na mmadụ nwere ike ikwurịta nke na-agba n’Usoro Ihe Omume Ozi Anyị na Otú Anyị Si Ebi Ndụ

• Otú e si eji ihe ndị mere n’oge na-adịbeghị anya ma ọ bụ akụkọ gbara n’akwụkwọ akụkọ amalite mkparịta ụka

• Ihe anyị ga-ekwu ma onye nwe ụlọ kwuo ihe ndị na-achọghị ịnụ ozi ọma na-ekwukarị

• Ihe anyị ga-agwa onye na-ekweghị na Chineke, onye kweere n’evolushọn, onye na-asụ asụsụ ọzọ, ma ọ bụ onye na-ekpe okpukpe a na-amachaghị n’ebe anyị bi

• Otú anyị ga-esi eji ihe dị na jw.org, ihe dị na JW Library^®, ma ọ bụ ihe dị na Baịbụl Nsụgharị Ụwa Ọhụrụ ezi ozi ọma

• Otú anyị ga-esi eji otu ihe dị n’Ihe Ndị Anyị Ji Akụziri Ndị Mmadụ Ihe ezi ozi ọma

• Ikwu banyere otu n’ime ụzọ ndị anyị si ekwusa ozi ọma, dị ka iji ekwentị ma ọ bụ akwụkwọ ozi ezi ozi ọma, ikwusa ozi ọma n’ebe na-ekwo ekwo, ime nletaghachi ma ọ bụkwanụ iduzi ọmụmụ Baịbụl

• Ichetara ụmụnna ihe ndị anyị kwesịrị ịna-eme n’ozi ọma, dị ka ịdị njikere ịgbanwe ihe ụfọdụ n’ozi anyị n’ihi ọnọdụ, izere nsogbu, ịkpa àgwà ọma, ile ndị mmadụ anya otú kwesịrị ekwesị, ma ọ bụkwanụ ihe ọzọ yiri ihe ndị a

• Ịtụle otu ihe ọmụmụ si na broshọ Na-agbalịsi Ike n’Ịgụ Ihe na n’Izi Ihe ma ọ bụkwanụ ile otu vidio ya

• Otú mmadụ nwere ike isi gbaa onye ya na ya na-arụ n’ozi ọma ume ma ọ bụ nyere ya aka

• Ịtụle otu amaokwu Baịbụl nke ga-enye aka n’ozi ọma ma ọ bụkwanụ ịkọ otu akụkọ na-agba ume gbasara ozi ọma