1 | Ekpere—“Na-akọrọnụ Ya Ihe Niile Na-echegbu Unu”

BAỊBỤL KWURU, SỊ: “Na-akọrọnụ [Chineke] ihe niile na-echegbu unu, n’ihi na ihe banyere unu na-emetụ ya n’obi.”—1 PITA 5:7.

Ihe Ọ Pụtara

Jehova Chineke na-agwa anyị ka anyị kọọrọ ya ihe ọ bụla na-echegbu anyị ma ọ bụ na-echu anyị ụra. (Abụ Ọma 55:22) E nweghị nsogbu karịrị akarị ma ọ bụ dị obere ịkọsara ya Jehova. Ọ bụrụhaala na ọ na-enye anyị nsogbu, ọ gaghị eleghara ya anya. Ikpe ekpere kọsara ya Jehova bụ otu ihe dị mkpa ga-eme ka obi ruo anyị ala.—Ndị Filipaị 4:6, 7.

Otú Ihe A Nwere Ike Isi Nyere Anyị Aka

Ọ bụrụ na isi akpakọchaghị anyị ọnụ, o nwere ike ịdị anyị ka e nweghị onye anyị nwere. Ọ bụghị mgbe niile ka ndị ọzọ na-aghọtacha ihe anyị na ya na-alụ. (Ilu 14:10) Ma, ọ bụrụ na anyị ejiri obi anyị niile kpee ekpere gwa Chineke otú o si dịrị anyị, ọ ga-ege anyị ntị nke ọma, ghọtakwa otú obi dị anyị. Jehova na-ahụ anyị, ọ ma nsogbu anyị niile, ọ chọkwara ka anyị kpee ekpere gwa ya ihe ọ bụla na-enye anyị nsogbu n’obi.—2 Ihe E Mere 6:29, 30.

Ịgwa Jehova okwu n’ekpere na-eme ka obi sikwuo anyị ike na ihe banyere anyị na-emetụ ya n’obi. Obi nwere ike ịdị anyị otú ọ dị otu ọbụ abụ, onye kpere ekpere, sị: “Ị hụla otú e si na-emesi m ike. Ị ma na m na-atagbu onwe m n’ahụhụ.” (Abụ Ọma 31:7) Naanị ịmata na Jehova na-ahụ ihe anyị na ya na-alụ nwere ike inyere anyị aka ka anyị ghara ịda mbà n’oge nsogbu. Ma, ihe Jehova na-eme abụghị naanị ịhụ nsogbu anyị. Ọ na-aghọtakwa nsogbu ndị ahụ karịa onye ọ bụla ọzọ ma na-enyere anyị aka ka anyị nweta nkasi obi na agbamume si na Baịbụl.

Otú Baịbụl Si Enyere Julian Aka

Otú Nchegbu Si Akpa M Aka Ọjọọ

“Nsogbu mụ na ya na-alụ bụ na m na-echegbukarị onwe m, ihe ndị m na-achọghị na-abatakarịkwa m n’uche. Ana m amalite ichegbu onwe m mgbe m na-atụghị anya ya. Ahụ́ nwere ike ịdị m mma ugbu a, mana obere oge, mụ echegbuwe onwe m n’enweghị ezigbo ihe kpatara ya. Obi anaghị ezu m ike, karịchaa, ma mụ na ndị ọzọ nọrọ. Obi na-ekoro m n’elu maka ihe ha ga na-eche gbasara m.

“Ndị enyi m ndị ma nsogbu m na-enyere m ezigbo aka. Ma, nke bụ́ eziokwu bụ na mgbe ụfọdụ, ihe ha na-ekwu abụchaghị ihe ahụ́ m chọrọ. Mana, obi dị m ụtọ maka ezigbo mbọ ha na-agba inyere m aka.

“Mgbe ụfọdụ, otú m si echegbu onwe m na otú ihe ndị m na-achọghị si abatakarị m n’uche na-eme ka ọ na-esiri m ike ikpe ekpere. Mbọ m na-agba tupu mụ enwee ike ịkpakọ echiche m ọnụ gwa Jehova okwu n’ekpere abụghị obere ihe. Uche m na-esi n’otu ihe gafee n’ihe ọzọ oké ngwa ngwa nke na ihe niile na-agbagwoju m anya. Ya gbajuo dọrọ otú a, ọ na-esiri m ike ịgwa Jehova ihe dị m n’obi.”

Otú Baịbụl Si Enyere M Aka

“Baịbụl m na-amụ emeela ka m mata na ọ bụghị naanị ekpere dị ogologo na nke e doziri olu kpee ka Chineke na-anụ. Mgbe ụfọdụ, ya siere m ike ịgwa Chineke otú obi dị m, naanị ihe m na-ekpe n’ekpere bụ: ‘Jehova, biko, nyere m aka.’ Ekpere m dịgodị mkpụmkpụ otú a, m na-achọpụta na Jehova na-aghọta ihe m rịọrọ ya, ọ na-emekwara m ihe dị m mkpa n’oge ahụ. E wepụ ekpere m na-ekpe, agaakwala m ụlọ ọgwụ. Obi dị m ụtọ na ihe ndị a enyerela m aka ịkatụ mma. N’eziokwu, mbọ m na-agba ịgwa Nna m nke eluigwe okwu na-abara m ezigbo uru. Ọ na-enyere m aka maka na ọ hụrụ m n’anya.”