Unu Bụ “Ihe Nkiri”!

¹ Pọl onyeozi dere, sị: “E mere anyị ihe nkiri nye ụwa na ndị mmụọ ozi na mmadụ.” (1 Kọr. 4:9) Gịnị ka nke a pụtara, oleekwa otú o kwesịrị isi metụta anyị n’ozi anyị taa?

² Nye onye Kọrint, okwu bụ́ “ihe nkiri” ma eleghị anya ga-echetara ya ihe omume e ji eweta asọmpi iji mma alụ ọgụ nke ndị Rom ná njedebe, bụ́ ebe a na-akpụpụta ndị a mara ikpe ọnwụ n’ihu ọtụtụ puku ndị nkiri tupu e gbuo ha n’ụzọ obi ọjọọ. N’otu aka ahụ, ọnụ ọgụgụ bara ụba nke ndị nkiri—ma ndị mmadụ ma ndị mmụọ ozi—hụrụ ahụhụ a tara ndị Kraịst nke narị afọ mbụ maka ịgba àmà banyere Alaeze ahụ. (Hib. 10:32, 33) Omume iguzosi ike n’ezi ihe ha nwere mmetụta n’ahụ ọtụtụ ndị na-ekiri ihe na-emenụ, dịkwa ka ntachi obi anyị na-eme n’ọgbọ egwuregwu nke oge a. Olee ndị anyị bụụrụ ihe nkiri?

³ Nye Ụwa na Mmadụ: Mgbe ụfọdụ, usoro mgbasa ozi na-agbasa akụkọ banyere ọrụ ndị Jehova. Ka anyị na-enwe ekele maka akụkọ ọma ndị mere eme ma zie ezie n’ịkọ banyere ọrụ anyị, anyị na-atụkwa anya na ndị na-ekwutọ anyị ga na-agbasa akụkọ ọjọọ site n’oge ruo n’oge. Ka o sina dị, anyị aghaghị ịnọgide na-eme ka a mara anyị dị ka ndị ozi Chineke site “ná nhota ọjọọ na nhota ọma.” (2 Kọr. 6:4, 8) Nye ndị na-ekiri ihe na-emenụ bụ́ ndị nwere obi eziokwu, o doro anya na anyị bụ ezi ndị na-eso ụzọ Jisọs Kraịst.

⁴ Nye Ndị Mmụọ Ozi: Ndị mmụọ e kere eke na-ahụkwa anyị. Ekwensu na ndị mmụọ ọjọọ ya na-ele anya—kama ha ji “oké ọnụma” na-ele anya, na-achọ ịkwụsị ‘ọrụ ịgba àmà nke Jisọs.’ (Mkpu. 12:9, 12, 17) Ndị mmụọ ozi na-ekwesị ntụkwasị obi nke Chineke na-ele anya ma na-aṅụrị ọṅụ mgbe ọbụna otu onye mmehie chegharịrị. (Luk 15:10) O kwesịrị iwusi anyị ike ịmara na ndị mmụọ ozi na-ele ozi anyị anya dị ka ọrụ kasị ngwa, nke kasị baa uru a na-arụ n’ụwa taa!—Mkpu. 14:6, 7.

⁵ Mgbe i zutere mmegide ma ọ bụ chee na ozi gị anaghị arụpụta ihe, cheta na ndị nile nọ n’eluigwe na ala na-ele gị anya. Ntachi obi i ji ikwesị ntụkwasị obi na-enwe na-ekpughe ọtụtụ ihe. N’ikpeazụ, ‘mgba ọma gị nke okwukwe’ ga-enyere gị aka ‘ijidesi ndụ ebighị ebi aka ike.’—1 Tim. 6:12.