TOLUMỌYE 12
Teeki Baratụa Ị́ Pịrị Pẹlẹgha Bara Bible Tolumọ A Paa Emi A O?
Bible tolumọ bolou bi arere emi kị gbaa kpọ, ifiemọsẹ bọụbọụgha. Zụa ifieama, Bible tolumọ mịnị yọbị ị́ dẹịn kpọ paa emi. Tetuu kị duonị ịmbalị tolumọ bọlọụ ghọ mú agbẹị emi a o? Bụụdọọn yeama k’emi kpọ, teeki baratụa ị́ pịrị mịnị a o?
1. Bible tolumọ tetuu kị duonị yelaa emi a o?
“Ọkpọnanaowei egberi bị ụndụ emi bá kụrọ nana wẹrị emi.” (Hebrews 4:12) Bible mị Ọkpọnanaowei akị ị́ dii wẹrị emi bara mịẹ gaan wẹrị emi. Anị duonị Bible mị yelaa fun. Ị́mịnị nimiye bẹtịbị nanagha fa, anịa ị́ mịẹ kịlịkịlị má ukiemọye nana mịnị. Yelaa dẹịn yemị, Bible mị baratụa wó pịrị Jehovah ikie ụbọ a paa mịnị. Bible tolumọye, iné ụndụ mịẹ ebimọ a paa emi.
2. Tetuu kị duonị omịnị Bible gesii yelaa emi tuu nimi agbẹị emi a o?
Bible bolou bọọ emi gesiibo yelaa kụrọmọ yeama mọ kị lei emi. Anị kị duonị Bible wó kụrọmọ mị, “gesii fịị dá ụ yerị kụmọ.” (Proverbs 23:23) Bible bolou bọọ emi gesii mị yelaa emi bara wó mọ nimi wẹrị emi sẹ, bụụdọọn yeama kị wó paamọ mịnị kị gbaa kpọ—omịnị mọkpọ Bible bị akị bọlọụ tolumọ mịnị.—Proverbs 2:4, 5 goo.
3. Jehovah tebara ka kị baratụa ị́ pịrị Bible tolumọ bọlọụ a mú mịnị a o?
Jehovah wó Tẹmẹ-owei má wó Ikie-owei duonị, omịnị baratụa wó pịrị wo emi bara nimi dọụ emi. Omịnị “dịsẹ mọ má kụrọ mọ akị ị́ pịrị wẹrị fịrị wẹnị mịnị.” (Philippians 2:13 goo.) Anị duonị, ị́mịnị Bible tolumọ má iné tolumọ dẹ yemọ akị tụa inyenrin mụ yọmị, zụa ifieama baratụa pịrịye dọụ emi sẹ, omịnị baratụa ị́ pịrị mịnị. Bụụdọọnye má penimọye dẹịnmọ kụrọ kị ị́ mọ dọụ mịnị kpọ, omịnị akị ị́ pịrị mịnị. Ifiemọsẹ Jehovah baratụa ị́ pịrị wẹrị pẹlẹgha bara akị Bible tolumọ bara tẹẹ.—1 Thessalonians 5:17.
EBIBARA TUUDỌỤ
Penimọye má mịẹmụ yeama kị biin kpọ, Jehovah baratụa ị́ pịrị wẹrị Bible bị akị bọlọụ tolumọ mịnị bara dii ẹrị.
4. Iné Bible tolumọ yemị akị yelaa ye diimọ
Zụa ifieama omịnị fomuun nana wẹrị Bible tolumọgha bara iroro mịnị. Teeki baratụa wó pịrị mịnị a o? Philippians 1:10 goo dá, mị biibịbịmọ kẹrị ẹrẹtei:
Te yeama kị wó ụndụ bọọ “yelaa dẹịn emi” bara kị ị́ mọ tọn ma o?
Ị́mịnị tebara ka kị iné Bible tolumọ yebị akị yelaa ye diimọ mịnị a o?
If you fill a bucket with sand and try to add rocks, the rocks will not fit
If you put the rocks in first, you will have room to add most of the sand. Similarly, if you put “the more important things” first in your life, you will be able to accomplish them and still have time for other things
Bible tolumọye baratụa wó pịrị Ọkpọnanaowei nimi má ụ karị mịnị. Matthew 5:3 goo dá, mị biibịbị kẹrị ẹrẹtei:
Omịnị Bible tolumọye akị yelaa ye diimọ daba, te arere-ama kị wó laa mịnị a o?
5. Penimọ yeama k’emi kpọ tolumọ bọlọụ ghọ mú
Zụa ifie-ama, kịmị-ama ị́ mịẹ iné Bible tolumọye tịẹmọ kpọ paa emi. Francesco mịẹdịaye dii. VIDIO farị dá, kirianga bọọ emi biibịbịmọ kẹrị ẹrẹtei.
Vidio bolou mị, Francesco wo peibolou gbaa akị wo ikie otubo mọ bá wo warịbolou-otu pịrị ifie mị, tebara kị amịnị mọ mịẹ ma o?
Francesco pẹlẹgha bara Bible tolumọ yọmị, te arere kị ụ laa ma o?
Wó 2 Timothy 2:24, 25 goo dá, mị biibịbịmọ kẹrị ẹrẹtei:
Iné warịbolou-otu mọ bá iné ikie-otu mọ tebara ka kị iné Bible tolumọye diimọ wẹrị emi a o?
Bei goo yọ dii daba, kịmị iné Bible tolumọ mịnị yọmị dịsẹgha abá, teeki ị́ mọ mịẹ agbẹị emi a o? Tetuu a o?
6. Jehovah ka sẹsẹrẹị
Omịnị Jehovah mọ naịn mịnị mị, ụ mịẹ bolouịmbẹlẹmọ dịsẹ wó mọ nana dẹịn mịnị. Mọabịkpọ, wó ụndụ bọọ deiyọ mịẹ mụ yọmị kụrọ wó pịrị a paa emi. Bịsẹ bara kị paa ị́ pịrị emi kpọ, dẹịn sụọ kụmọ. Jehovah baratụa ị́ pịrị mịnị. VIDIO farị dá, kirianga bọọ emi biibịbịmọ kẹrị ẹrẹtei.
Vidio bolou mị, Jim Jehovah mịẹ bolouịmbẹlẹmọ mụ duonị, te deiyọama kị mịẹ ma o?
Teeki wo mịẹdịaye bọọ iné ọngọ sụọ ma o?
Hebrews 11:6 goo dá, mị biibịbịmọ kẹrị ẹrẹtei:
“Angọ tụa Jehovah nimi” bá wo dọụ yọ mịẹ mịnị kịmịbo, Jehovah teeki mịẹ—a pịrị mịnị a o?
Jehovah tebara ka kị iné angọ tụa Bible tolumọ mịnị yọ diimọ wẹrị emi bara kị ị́ mọ tọn ma o?
KỊMỊ BII A PAA EMI: “Tetuu kị duonị ị́mịnị Bible tolumọ mịnị a o?”
Ị́mịnị tebara kị paraị mịnị a?
KỊLỌỌBARA
Bible tolumọ fịrị mị bọụbọụgha kị gbaa kpọ, ị́mịnị angọ tụa laa tolumọ daba imbẹlẹ má fagha fagha ụndụ nana mịnị. Ifiemọsẹ Jehovah ka sẹsẹrẹị, omịnị baratụa ị́ pịrị mịnị.
Waị diitụa
Bible bolou bọọ emi gesii bị tetuu kị duonị yelaa ị́ pịrị emi a o?
Ị́mịnị tebara ka kị “iné ụndụ bọọ yelaa dẹịn yemọ mịẹ mịnị a o”?
Bible tolumọ bọlọụ a mú mịnị yọmị tetuu kị duonị ị́mịnị Jehovah baratụa pịrịye bii agbẹị emi a o?
DIITỤA
Baratụa kịmịotu pịrị wẹrị laa ebibara akị Bible tolumọ dẹ nia yeama, wó mọ diitụa.
Kẹnị yei pịrị penimọ mịnị ere Jehovah baratụa akị a pịrị bara dii.
Kẹnị kịmị taa Jehovah karị gbelemọ yọ bọọ ye-ine duonị laa arereama akị bara dii.
Zụa ifieama Jehovah Iseriotu warị kị dịẹ mịnị kịmịama bara kị kịmịotu mọ gbaa mịnị. Anị gesii egberi bara ị́ mọ tọn ma?
“Do Jehovah’s Witnesses Break Up Families or Build Them Up?” (Web article)