Wó Tebara Ka Kị Ọkpọnanaowei Karị Wẹrị Ụ Mịẹ Bolouịmbẹlẹ Mịnị A O?

Bụọdẹ ifie wó tolumọ bara mị, karịbụọbosẹ kị Ọkpọnanaowei mịẹ bolouịmbẹlẹmọ mịnị bara fa. Mọabịkpọ, omịnị Ọkpọnanaowei dọụbara akị ụ karị a paa emi. Te “karịbụọ paa kị” Ọkpọnanaowei mịẹ bolouịmbẹlẹmọ mịnị a o? (James 1:27, footnote) Wó wẹrị Bible gbaa bara dii.

1. Omịnị teeki dii wẹrị Ọkpọnanaowei karị agbẹị emi a o?

Omịnị Bible bolou kị dii wẹrị Ọkpọnanaowei karị agbẹị emi. Jesus gbaa Ọkpọnanaowei pịrị mị: “Iné egberi mị gesii emi.” (John 17:17) Zụa karịbụọ-ama Bible bolou bọọ emi gesii bị akị ye diimọgha. Amịnị Ọkpọnanaowei tolumọ yebo a barasin wẹrị, kịmịawọụ tolumọye má kịmịawọụ ye mịẹ mịnị bara ka kị kịmịama tolumọ mịnị. “Ọkpọnanaowei oloko dii seimọ” mịnị otubo Ọkpọnanaowei bolouịmbẹlẹ a pịrịgha. (Mark 7:9 goo.) Anịa, Ọkpọnanaowei dọụ emi bara wó mọ akị wo karị bá Bible tolumọye dii wẹnị dẹ ifiesẹ, omịnị Ọkpọnanaowei mịẹ bolouịmbẹlẹ mịnị.

2. Omịnị tebara ka kị Jehovah karị agbẹị emi a o?

Jehovah kị wó Tẹmẹ duonị, omịnị beinmọ beinmọ bara akị ụ karị agbẹị emi. (Revelation 4:11) Omịnị ụ tarị, ụ bẹtịbị kị karị, bá ye akị ụ tọnmọ karị kụmọ bara kị gbaa mịnị.—Isaiah 42:8 goo.

Omịnị “yalị má agbẹị” bara ka kị Jehovah karị. (Romans 12:1) Omịnị wo olokobo kẹrị wẹnị bara kị gbaa mịnị. Gbaa maba, zọzọ nana egberi paa dẹ ifiesẹ, Jehovah tarị emi kịmịmọ wo dọụbara kị mịẹ mịnị. Amịnị ebigha yeama kịlẹ mịnị, sigarate, kụrọ diri má ẹgbẹịgha bara akị ye bọụgha.a

3. Omịnị tetuu kị duonị Jehovah karị mịnị kịmịotumọ kẹnịsụọmọ ụ kari agbẹị emi a o?

Wikibosẹ omịnị yetolumọyọ a mụ́ mịnị yọmị fomuun akị wó pịrị wẹrị “itu bolou bọọ . . . Jehovah tokoni mịnị.” (Psalm 111:1, 2) Duma tuun Jehovah tokoni mịnị yọ kpọ kẹnị ụwọụ nị omịnị akị bei ye mịẹ mịnị kẹnị ụwọụ. (Psalm 104:33 goo.) Jehovah omịnị yetolumọ yọ ghọ mú gbaa mịnị tuubi. Omịnị wó tarị emi má wó tolumọ mịnị yebo fagha fagha ụndụ akị wó pịrị mịnị. Omịnị yetolumọ yọ a mụ́ daba, omịnị zọzọ kụrọmọ mịnị.

EBIBARA TUUDỌỤ

4. Omịnị ye akị tọnmọ Jehovah karị kụmọ

VIDIO: Omịnị Ye Aki Ọkpọnanaowei Tọnmọ Karị Ụ Dịsẹ Emi A O? (3:26)

• Bible ifie mị zụa kịmịama kara wẹrị emi ye akị Ọkpọnanaowei karị dọụ ifie bị, teeki paa ma o?

Zụa kịmịama Ọkpọnanaowei mọ naịn dọụ emi duonị, yeama akị tọnmọ ụ karị mịnị. Anịa bei bara mịẹ emi yọbị wó mịẹ Ọkpọnanaowei mọ naịn mịnị a? Exodus 20:4-6 má Psalm 106:35, 36 goo dá, bei biibịbịmọ kẹrị ẹrẹtei:

• Kịmịama te kara wẹrị emi yeama anịghakpọ fotoama ka kị Ọkpọnanaowei karịtimi ị́ pịrị ẹrị dẹ a o?

• Jehovah tebara ka kị mịẹtịẹmọ wẹrị emi ye akị ụ karịmụ yọ diimọ wẹrị emi a o?

• Ị́mịnị tebara ka kị mịẹtịẹmọ wẹrị emi ye akị Ọkpọnanaowei karịmụ yọ diimọ wẹrị emi a o?

5. Jehovah bẹtịbị kị karị mịnị yọbị ikpé tolumọ yeama duo wó mịẹ peree mịnị

VIDIO: Gesii Pịrị Mịẹ Peree Dẹ (5:16)

Psalm 91:14 goo dá, bei biibịbị kẹrị ẹrẹtei:

• Omịnị adụdụ duo bo bara akị Jehovah karị daba, omịnị teeki mịẹ wó pịrị mịnị bara kị gbaa wẹrị emi a o?

6. Omịnị wó yetolumọ yọmọ kọọ Jehovah karị mịnị

Omịnị wó yetolumọyọ bọọ numu tuun má biibịbị paraị mịnị yọ ka kị Jehovah tokoni má wó bịna-otubo kụrọmọ mịnị. Psalm 22:22 goo dá, mị biibịbịmọ kẹrị ẹrẹtei:

• Wó yetolumọyọ ghọ paraị mịnị biibịbịmọ iné angọ duo sụọ mịnị?

• Ị́ kpọ angọ tọlọmọ wẹrị biibịbị paraị dịsẹ emi a?

7. Wó tolumọ dẹ yemọ wó mọ gbaa zini-otu pịrị mịnị yọmị Jehovah mịẹ bolouịmbẹlẹmọ mịnị

Omịnị biin ụwọụama ka kị Bible gesii akị kịmị-otumọ tolumọ a paa emi. Psalms 9:1 má 34:1 goo dá, mị biibịbị kẹrị ẹrẹtei:

• Ị́mịnị Bible duo tolumọ wẹrị emi ye nị ị́ gbaa kịmị pịrị dọụ mịnị ye emi a?

KỊLỌỌBARA

Omịnị Ọkpọnanaowei bẹtịbị karị, wó yetolumọ yọ bọọ ụ tokoni má wó tolumọ dẹ yebo gbaa zịnị otu pịrị mịnị yọbị, ụ mịẹ bolouịmbẹlẹ mịnị.

Waị diitụa

• Omịnị teyọ kọọ gesii bara akị Ọkpọnanaowei karị mụ bara tolumọ nimi mịnị a o?

• Tetuu kị duonị omịnị Jehovah bẹtịbị kị karị agbẹị emi a o?

• Tetuu kị duonị omịnị Ọkpọnanaowei mịẹ bolouịmbẹlẹmọ dọụ emi otumọ gbelei ụ karị agbẹị emi a o?

DIITỤA

“I No Longer Slave for Idols,” egberi goo dá, kẹnị ere karatịẹmọ wẹrị emi yeama karị inyenrin bọọ barasin bara bị dọụ ẹrị.

“The Bible Changes Lives” (The Watchtower, July 1, 2011)

Baratụa ị́ pịrị laa yetolumọyọ a biibịbị parụ mịnị ye dii.

“Praise Jehovah in the Congregation” (The Watchtower, January 2019)

Yetolumọyọ a mú emi yọbị bọụbọụ kẹnị kịmị pịrịgha kpọ, ụ laa mú yetolumọyọ ghọ paa wẹrị arere nana bara dii.

Jehovah Ị Kekere Mị (3:07)

Biin-otu ịmgbịsẹtịịn gesii Christtuuduo-otu kọọ tịbịtịẹmọ wẹrị emi bara kị biberin wẹrị emi, omịnị kpọ ịmgbịsẹtịịn akị Jehovah karị agbẹị emi a o?

“Why Don’t Jehovah’s Witnesses Use the Cross in Their Worship?” (Web article)