TOLUMỌYE 34
Omịnị Tebara Ka Kị Jehovah Tarị Wẹrị Emi Bara Mịẹdịa Mịnị A O?
Iné Bible duo tolumọ dẹ yebo, ị́ mịẹ Ọkpọnanaowei mọ naịn dẹịn mịnị a? Ị́mịnị mọkpọ Bible tolumọ bọlọụ a mú dọụ mịnị a? Mọaba sisei ukie, ị́mịnị gesii bara akị Jehovah tarị wẹrị emi aba, omịnị biin tarịama akị ị́ pịrị mịnị. Bá ebibara akị ị́ kekere mịnị. Anịa omịnị tebara ka kị Jehovah tarị wẹrị emi bara mịẹdịa a paa emi a o?
1. Omịnị tebara ka kị Jehovah tarị wẹrị emi bara mịẹdịa a paa emi a o?
Jehovah dọụ yọ wó mọ mịẹ mịnị ifiesẹ, omịnị ụ tarị emi bara kị mịẹdịa mịnị. (1 John 5:3 goo.) Jehovah kịmị penimọgha, anịa kịmịsẹ bẹtịbị angọ paamọ ụ karị kị ụ mọ dọụ emi. Tetuu a o? Omịnị wó “adụdụ kị duo gbaa bara mịẹ” kị Jehovah mọ dọụ emi. (Romans 6:17) Gbaa mịnị bara mị, tarị kị wó dịnịmọ Jehovah dọụye mịẹ, omịnị wó penimọgha. Mị fun bị, dịẹmọyọ 3 mọ 4 mọ baratụa wó pịrị wẹrị Jehovah dịsẹ ye mịẹ bá wo dịsẹgha ye golu mịnị.
2. Jehovah tarị emi bara mịẹdịa mụ yọmị tetuu kị duonị kụrọ wó pịrị emi a o?
“Biin ụya-ama kị kịrịịye mịẹ kịmị laa mịnị.” (Psalm 34:19) Omịnị yalịyalịgha duonị, zụa ifieama omịnị ye mịẹ kiri mịnị. Sịlị bụụdọọnye, kịrịịgha ụgụla, bá zịnị bụụdọọn-yeama kpọ wó laa a paa emi. Zụa ifieama bei bụụdọọn-yebo wó laa daba, omịnị mịẹmụye nimigha duonị Jehovah karị mụ yọmị kụrọ wó pịrị mịnị. Anịa paaye paaye ị́mịnị angọtụa Jehovah dọụ yọ mịẹ mịnị sẹ, ị́mịnị ụ tarị emi bá ụ mọ mọ́ kpẹkpẹrẹẹ emi bara kị mịẹdịa mịnị. Jehovah kpọ ị́ mọ mọ́ kpẹkpẹrẹẹtimi mịnị, omịnị benebene ị́ gbeinmọ koromọgha fa.—Psalm 4:3 goo.
EBIBARA TUUDỌỤ
Omịnị Jehovah gbaa ye pei agbẹị emi tuu mọ má baratụa wó pịrị mụ ye mọ dọụ ẹrị.
3. Ị́ kpọ́ gbele emi egberi
Bible bolou bọọ Job fun dii daba, Satan kẹnị egberi kọn kịmịsẹ gbaịnmọ wẹrị emi. Job 1:1, 6–2:10 goo dá, bei biibịbịbo kẹrị ẹrẹtei:
Job tetuu kị duonị Jehovah karị mịnị bara kị Satan mọ gbaa ma o?—Job 1:9-11 dii.
Satan te ka kị kịmịawọụbosẹ gbaịnmọ ma o?—Job 2:4 dii.
Job 27:5b goo dá, bei biibịbị kẹrị ẹrẹtei:
Job tebara ka kị Jehovah tarị wẹrị emi bara mịẹdịa ma o?
Job zigeigha peibolou bị omịnị Jehovah tarị emi bara mịẹdịa mị
Jehovah dọụyọ wó mọ mịẹ mịnị ifiesẹ, omịnị ụ tarị wẹrị emi bara kị mịẹdịa mịnị
4. Jehovah adụdụ mịẹ pọwẹị
Proverbs 27:11 goo dá bei biibịbịmọ kẹrị ẹrẹtei:
Jehovah tebara ka kị ị́mịnị wo gbaay pei mịnị yọ diimọ wẹrị emi a o? Tetuu a?
5. Ị́ kpọ laa Jehovah mọ kpẹkpẹrẹẹtimi mịnị
Omịnị Jehovah tarị emi duonị, bụụdọọnye kị wó laa kpọ, omịnị wó tolumọdẹ yebo gbaa kịmịotu pịrị mịnị. VIDIO farị dá, biibịbịmọ kẹrị ẹrẹtei.
Jehovah gbelemọ egberi gbaa kịmịotu pịrịmụ yọmị ị́ mịẹ malafa mịnị a o?
Vidio bolou mị, teeki baratụa Grayson pịrị wẹrị malafa yọ dẹịnmọ ma o?
Omịnị Jehovah dịsẹye mịẹ bá wo dịsẹghaye golu daba, Jehovah mọ wẹnị mịnị yọmị bọụ wó pịrị dẹịn mịnị. Psalm 97:10 goo dá, bei biibịbịbo kẹrị ẹrẹtei:
Iné tolumọ dẹ yebo dii daba, Jehovah te yeama kị dịsẹ emi a o? Te yeama kị ụ dịsẹgha o?
Ị́mịnị tebara ka kị ebiye tarị má seiye golu inyenrinbụọ tolumọ nimi mịnị a o?
6. Jehovah dịsẹye mịẹ mịnị yọmị arereama emi
Jehovah gbaa bara mịẹ mịnị yọ kị ebidẹịn emi. Isaiah 48:17, 18 goo dá, bei biibịbịbo kẹrị ẹrẹtei:
Jehovah kị ifiebosẹ ebi wó pịrị mụ yebo nimi wẹrị emi bara ị́ kpọ mọ pei wẹrị emi? Tuugbaa?
Ị́mịnị Bible tolumọ mịnị, bá Jehovah nimi dẹ yọ mị, tebara ka kị baratụa ị́ pịrị dẹ a o?
ZỤA KỊMỊAMA GBAA MỊNỊ: “Ine mịẹ mịnị ye Ọkpọnanaowei gbelegha.”
Ị́mịnị te Bible yọ ka kị wó mịẹ mịnị yebo Jehovah gbele emi bara mịẹ gaan a paa emi a o?
KỊLỌỌBARA
Bụụdọọn yeama kị ị́ laa emi kpọ, ị́mịnị laa Jehovah dọụyọ mịẹ a paa emi bara nimi.
Waị diitụa
Ị́mịnị Job paamọ yebo duo teeki tolumọ akị ma o?
Ị́mịnị tebara ka kị Jehovah tarị wẹrị emi bara mịẹdịa mịnị a o?
Teeki baratụa ị́ pịrị wẹrị Jehovah mọ kpẹkpẹrẹẹtimi mịnị a o?
DIITỤA
Ị́mịnị ebibara itu mọ wẹnị gbelei bá laa Jehovah mọ kpẹkpẹrẹẹtimi mụ bara dọụ ẹrị.
“Ị́ Mọ Mọ́ Kpẹkpẹrẹẹ Emi Kịmị Bị, Ị́ Kpọ́ Ụ Bọ Mọ Kpẹkpẹrẹẹtimi Mịnị” (16:49)
Mọkpọ Satan gbaa mịnị ikpé egberibo diitụa.
“Job Keeps His Integrity” (The Bible—What Is Its Message? section 6)
Kala ọwọụama kpọ laa Ọkpọnanaowei tarị mụ bara dọụ ẹrị.
Penimọye bolou k’emi kpọ, teeki baratụa asịyaịpesi-otu pịrị wẹrị Jehovah mọ naịntimi mịnị a o?