Manipud Managbasatayo

Panagalembong Ti artikulo nga “Agimtuod dagiti Agtutubo . . . Aniat’ Peggad ti Panagal-alembong?” inawisna ti interesko. (Mayo 8, 1991) Adda gayyemko a kanayon nga agal-alembong kadagiti kasungani a sekso, ket kasla masansan a pagragsakanna. Nabang-aranak a makaammo a ‘gagangay laeng ti agtarigagay a maay-ayat.’ Ngem itan mabigbigkon a napeggad ti panagal-alembong, ket iti kasta tarigagayak ketdi nga ipakita ti napudno a panaginteres kadagiti kaaduan a tattao.

S. I., Japan

Tao ken Animal Kayatko nga iyebkas iti naimpusuan a panangapresiarko iti tema nga “Inton ti Tao ken Animal Agkappiadan.” (Abril 8, 1991) Maysaak nga estudiante ti Biblia iti nakatawenen, ket naammuak dagiti pangpanggep ni Jehova a mangaramid iti daga nga agnanayon a paraiso. Ti artikulo pinarang-ayna ti panagayatko ken ni Jehova ken ti tarigagayko nga agbiag a sitatalna a kadua dagiti animal iti baro a lubongna.

A. S., Brazil

Idi pay a managayatakon kadagiti aniamal. Tinarigagayak pay ti sumrek iti unibersidad ket makikaduaak iti programa maipapan iti panangadal iti panagbiag dagiti animal. Ngem ania koma ti nagun-odak, a nangbusbos iti amin a panagbiagko a mangad-adal iti sumagmamano laeng a kita dagiti animal? Iti baro a lubong ni Jehova, mabalinkonton nga adalen dagiti amin nga animal—iti agnanayon! Ti panangbasa kadagiti artikulo pagluaennak iti rag-o, ta pagaammok a dumtengto ti aldaw pumaysonton dayta a tarigagay.

L. M., Estados Unidos

Dakes a Kababalin Ti artikulo a “Pananglapped ti Isusubli ti Dakes a Kababalin” (Abril 8, 1991) ket kasla maysa a surat a naiturong a nangnangruna kaniak. Nupay no ti artikulo dina dinakamat nga espisipiko ti dakes a kababalinko, patiek a dagiti pagalagadan nga intedna makagunggonanto. Babaen iti tulong ni Jehova maparmekkonto daytoy a kababalin a mamimpinsan!

S. M., Estados Unidos

Agarup 11 a tawenen a napalabas, sibaballigi a napukawko ti 36 a kilos, ngem napasublik met laeng. Sipsiputak manen ti kinalukmegko, ket no mangrugin a kumapuyak, basaek manen ti artikulo. Inusarko met dayta kadagiti dua a baro nga estudiante iti Biblia a makidangdangadang iti panagsardeng nga agsigarilio.

E. T., Estados Unidos

Daytat’ nagpintasan nga artikulo ta nakaluaak. Ti nangsair a nangnangruna kaniak isut’ paset a sadiay kunaenna: ‘Diak nagballigi, gapuna sumukoakon.’ Kankanayon a kastat’ panunotko. Ngem ti artikulo tinulongannak a mangmatmat kadagiti bambanag iti naiduma a pamay-an.

S. H. S. N., Brazil

Annak iti Diborsio Ti bilangyo a “Tulongan dagiti Annak iti Diborsio” (Abril 22, 1991) nagsayaatan ti idadatengda. Agdama a sagsagabaek ti diborsio. Ti aldaw sakbay ti isasangpet daytoy nga artikulo, nakaisawangak kadagiti nakas-ang a bambanag iti asawak iti imatang dagiti ubbing. Kalpasanna nagpakawanak kenkuana ket inikkak itoy a bilang iti Agriingkayo! Agyamanak iti tulong ken balakadyo.

C. L., Estados Unidos

Idi siam ti tawenko, nagdiborsio dagiti dadakkelko. Tallo a tawen laeng kalpasanna nagasawada manen. Naragsakanak. Iti nabiit pay, naammuak nga agdiborsioda manen. Ti pannakaammok nga inay-ayatdak ken ti kaadda ni Jehova a pagturongak ti mangtaginayon kaniak a natibker. Dimteng ti artikuloyo iti tiempo a kasapulak unay dayta. Agyamanak iti panangpanunotyo kadagiti ubbing. Kasapulanmi ti amin a tulong a magun-odanmi!

A. J., Estados Unidos

Seksual a Pannakaraut Agyamanak iti artikulo nga “Agimtuod dagiti Agtutubo . . . Kasanot’ Aramidek Tapno Baybay-annak nga Agmaymaysa?” (Mayo 22, 1991) Iti aldaw a panangited ni nanangko iti dayta a magasin, nakaawatak iti maysa a surat iti ayat manipud iti maysa a kaklasek a lalaki. Insuronak ti artikulo a no tarigagayan dagiti lallaki ti di matarigagayan a panangallukoy, mabalin nga ilawlawagtayo ti relihiuso a pammatitayo. Agyamanak iti panangipaayyo iti naayat a tulong kadakami nga agtutubo.

M. K., Japan