Aniat’ Adda iti Nagan?
AMMOYO kadi no apay a pinanaganandakayo dagiti dadakkelyo iti naganyo? Idi tiempo ti Biblia ti nagnagan dagiti tao masansan nga iparangarangda ti pammati iti Dios ken kadagiti karkarina. Kas pangarigan, ti nagan nga Abraham, nga inted ti Dios kenkuana, kaipapananna ti “Ama ti Bunggoy (Umariwekwek).” Ti Ismael kaipapananna ti “Dumngeg ti Dios (Umimdeng).” Ket ti Jesus kaipapananna ti “Ni Jehova Mangisalakan.”
Kadagiti dagdaga idiay Africa itatta, ti panangited kadagiti nagan masansan nga iparangarangna dagiti pammati ken ipatpateg. Pudno daytoy kadagiti adu nga Africano a Saksi ni Jehova.
Idiay Nigeria isalaysay ti maysa nga agtutubo a babai: “Naammuan ni tatangko ti kinapudno iti Biblia manipud kadagiti Saksi ni Jehova makatawen sakbay a naipasngayak. Iti dayta met laeng a tawen, nairuar ti libro a Ti Kinapudno a Mangiturong iti Biag nga Awan Inggana iti Ingles. Kamaudiananna, idi tiempo ti pannakaipasngayko, rimmuar ti libro a Kinapudno iti pagsasao nga Yoruba. Gapu iti dayta, pinanunot ni tatangko a maiparbeng a panaganannak iti Truth (Kinapudno).”
Sabali pay a saksi ni Jehova, maysa a lalaki, kunana: “Nagbalin a Saksi ni tatangko makatawen sakbay a naipasngayak. Isut’ agtartrabaho iti maysa a lugar nga imatmatonan dagiti napeklan a Katoliko, ket gapu iti pammatina, napukawna ti trabahona. Idi naipasngayakon, awan ti trabahona ken nagbassit ti kuartana. Ngem saan a naupay. ‘Agsagsagabaak iti kinaawan ti trabaho gaput’ panangitandudo iti Pagarian ti Dios,’ kinunana. Gapuna pinanaganannak iti Kingdom (Pagarian).”
“Pinanaganandak dagiti dadakkelko iti Ifeanyichukwu, maysa a nagan nga Igbo,” kinuna ti sabali nga agtutubo a lalaki. “Daytat’ sangkasakmol kadagidiay di agsasao iti Igbo, gapuna tarigagayak ti nalaklaka a nagan. Kayatko met ti agserbi idiay Bethel [ti lokal a sanga nga opisina ti Watch Tower Society], ket adda gayyemko nga agnagan iti Bethel (Balay ti Dios). Gapuna dinawatko kadagiti dadakkelko no mabalin a ti naganko ket ‘Bethel.’ Immanamongda.”
“Payunir dagiti dadakkelko [amin-tiempo a ministro],” insalaysay ti sabali pay a lalaki a taga Nigeria. “Kayat a panaganan ni tatangko ti maysa kadagiti annakda a maipasurot iti bokasionda. Kastat’ pannakapanaganko iti Pioneer (Payunir). Inanamaenda a sagrapekto met dagiti nabaknang a bendision iti amin-tiempo a panagserbi.”
Idi adda idiay Côte d’Ivoire ti maysa a miembro iti Bagi a Manarawidwid dagiti Saksi ni Jehova idi Disiembre 1978, nasabetna ti maysa a kabsat a babai nga addaan iti anak a managan Victorious Faith (Naballigi a Pammati) agsipud ta ti ubing a babai naipasngay idi tumabtabuno ti ina iti “Naballigi a Pammati” a Kumbension.
Da Truth, Kingdom, Bethel, ken Pioneer agtartrabahoda amin idiay sanga nga opisina ti Watch Tower Society idiay Nigeria. Agserserbi met sadiay dagiti Saksi nga agnagan iti Bible (Biblia), Wisdom (Sirib), Christian (Kristiano), Love (Ayat), Innocent (Inosente), Genesis (Punganay), ken Blessing (Bendision). Amin dagitoy a Kristiano a ministro kasta unay ti panangikagumaanda a mangtaginayon iti nasayaat a pakasarsaritaan, wenno nagan, ken Jehova a Dios, isu a nakautangan ti tunggal pamilia idiay langit ken ditoy daga iti naganna.—Idiligyo ti Efeso 3:14, 15.