Dagiti Tumultulong iti Satanismo—Droga ken Musika a Heavy-Metal
NAGSURAT ni Carl A. Raschke, direktor iti University of Denver Institute of Humanities: “Mainanama a dagiti droga, ti [musika a] heavy metal, kinauyong, ken ti awan asina a kinaranggas nagbalindan a nakaam-amak a bandera a naiwagayway iti ngatuen ti nadadaelen a sangatauan bayat nga agturongtayo iti maikatlo a dekada iti Panawen ni Satanas.” Kinunana pay: “Mabalin a kunaenyo a ti heavy metal rock ket agpaay iti kabukbukodan nga estilo ti Satanismo ket ti relihiuso a musika a mainaig iti ebanghelio agpaay iti Kinakristiano. Manmano ti tattao a makumberte iti Kinakristiano babaen ti panagimdeng laeng iti relihiuso a musika a mainaig iti ebanghelio iti radio. Ngem nakapigpigsa a mangallukoy ti heavy metal. Pagbalinenna a legal ti dakes nga ar-aramid a nakairamananen dagiti agtutubo.”
Daytoy ket nabileg a mangpabasol iti ibilang dagiti dadduma nga agtutubo itatta a kas kadawyan a dibersion manipud kadagiti pakadanagan iti biag—ti musika a heavy metal ken dagiti droga. Nainkalintegan kadi dagitoy a pammabasol? Mabalin kadi a dagiti droga ken ti musika a heavy metal ket sintomas iti Satanismo? Usigenyo ti komento dagidiay a naipasangon iti kinaranggas dagiti managdaydayaw ken Satanas ken dagidiay a nangimbestigar kadakuada.
“Ti makatignay a mensahe ti musika a heavy metal ket, mabalin a saan met a nakaskasdaaw, ‘relihiuso’—ta iwaragawagna ti nangatngato a pannakabalin a mangay-aywan iti uniberso. Nupay kasta, saan a ti Dios ti pannakabalin,” insurat ni Raschke, iti librona a Painted Black. “Daytat’ . . . pinataud ti Kangrunaan a Managdakdakes a mismo.” Mainayon pay, kinunana: “Ti pannakabalin ken kinaranggas a sinasatanas ket maysa a banag a mabalin a nalaka laeng a pakaruen dagiti agtutubo nga awanan iti namnama, ken addaan natiltil a konsiensia. . . . Patien dagiti nakumikom ken naabuso nga agtutubo, babaen iti nasursuroda iti dakes a kapadasan idi ubbingda pay, a ti Natantan-ok a Pannakabalin ket masapul a dakes. Patalgedan ti heavy metal daytoy a ‘teolohia’ ket inramanna dayta iti musika.”
Sigun ken Dr. Paul King iti University of Tennessee, a nagtestigo iti imatang ti Senado ti Estados Unidos maipapan iti musika a heavy-metal, ti musika a pagay-ayat dagiti adu a nakumikom nga agtutubo isu ti “di gagangay a tema a kinaranggas, gura, yaalsa, naalas a sekso, panangabuso iti babbai, ken panangitan-ok ken Satanas. No ti estilo ti panagbiag ti agtutubo iramanna dagiti droga, ad-adda manen a pagay-ayatna daytoy.” Ti musika a heavy-metal idayaw ken itan-okna ti pannakabalin ti dakes, kinuna ni King. Iti musika a heavy-metal, “kasta unay ti pannakaitan-ok dagiti dakes nga aramid kadagiti konsierto,” kinunana.
Usigenyo dagiti bunga ti di maipagpagarup a mensahe ti heavy metal kadagiti sumaganad a pasamak.
Idi napan a tawen idiay New Jersey, E.U.A., dua a 15-años a barito ti siraranggas a nangpatay iti aso a Labrador a managan Princess a taraken ti maysa a pamilia. “Daytat’ daton nga agpaay ken Satanas,” kinunada. Imbitinda ti aso babaen iti kadenana, kinugtaranda agingga a natay, pinutedda ti dilana ket inusarda dayta iti sataniko a ritual. Inlansada ti narangkayen a bagi ti aso iti dakkel a metal a kawit sada imbitin dayta iti karuotan iti arubayan ti kaarruba. Adda dagiti sataniko a marka iti ulo ti aso, ken ti maysa a pentagram (maysa a lima ti tiradna a bituen iti maysa a sirkulo—maysa a Sataniko a simbolo) ti naikitikit iti daga iti baba ti bagi ti aso. Iti rabii ti panangpapatay[da], umim-imdengda iti Deicide (a kaipapananna panangpatay iti Dios), maysa a banda ti death-metal, a ti kangrunaan a kumakanta itangtangsitna ti panangtutuok ken panangpapatay kadagiti ayup.
Idiay California, dua nga agin-innayat a tin-edyer, a sigun kadagiti gagayyemda, ket kasta unay ti pannakaallukoyda iti panagdayaw ken Satanas, ti sirurungsot a nangpapatay iti ina ti babai babaen ti panangbagsol ken panangmalo kenkuana iti llave. Iti isu met laeng a lugar, nagkararag ti sabali nga agtutubo ken Satanas, sana pinaltogan ni tatangna agingga a natay. Nakumbinsir dagiti mangim-imbestigar a polis a ti mapabasol isu ti musika a heavy-metal. “Kangrunaanna, isuro ti musika a di rumbeng nga umimdengkayo kadagiti dadakkelyo, ket masapul nga agbiagkayo sigun iti pagayatanyo,” kinuna ti maysa a polis.
Idiay Inglaterra, dagiti biktima a pagsusublatan a ramesen ti gang ti nagdarum iti polis a maysa a manangrames ti addaan kadagiti tattoo a pakailasinan ti maysa a banda ti heavy-metal a dagiti liriko [ti kantada] addaan kadagiti mensahe a panangrames ken kinaranggas.
Idiay Arkansas, E.U.A., maysa a tin-edyer iti away ti nanggandat a mangpatay kadagiti dadakkelna babaen ti panangmalona kadakuada iti batuta sananto rangrangkayen ida iti kutsilio ti partidor. Nasarakan ti polis iti audiocassette player-na ti nakasaganan a mapatokar a kanta ti banda a heavy-metal, nga “Altar of Sacrifice,” a ti lirikona iririawna ti: “Agur-uray ti nangato a padi, iggemna ti dága, a mangibuyat iti dara ti birhen. Panangpapatay ni Satanas, naseremoniaan nga ipapatay, sungbatam ti amin a bilinna. Sumrekka iti pagnaedan ni Satanas . . . Ammuem dagiti sagrado a sasao a pakaidayawanna, ‘Itan-okmo ni Satanas.’”
No maipapan kadagiti liriko ti dadduma a kanta a kankantaen dagiti agik-ikkis a miembro ti banda a heavy-metal—a masansan yebkas laeng dagiti agrayo babaen iti bibigda kadagiti naariwawa a konsierto, wenno imdenganda kadagiti audiocassette tape iti adu nga oras—ania a mensahe ti ipaayda kadagiti nalaka a maallukoy nga agtutubo? Usigenyo, kas pagarigan, dagitoy a liriko: “Ti apomi a ni Satanas iti kinaranggasna iwanwannakami iti tunggal umuna nga addangmi,” ken “Ibukbokyo ti darayo, bay-anyo nga agayus kaniak. Petpetanyo ti imak ket ipaayyo ti biagyo . . . Imbukbokyon ti dara. Adda kaniakon ti kararuayo.”
“No pagarupentayo a ti pornograpia mabalin a tignayenna ti manangmolestia iti ubing,” insurat ni Carl Raschke, “apay a dikay panunoten a dagiti liriko a mangyik-ikkis iti pumatayka, mangpawadka, mangpilayka, mangtuokka, mangpukawka ket pudno a tignayenna ti maysa a tao a nadadaelen ti utekna a mangaramid a mismo kadagidiay nga aramid?”
Pagarupen dagiti managsirarak iti isuamin a lugar nga agkuykuyog ti panangabuso ti droga ken ti Satanismo. Isennaay ti dati a detektib a mangparmek iti bisio a ni David Toma a di pay “pulos nakaam-ammo iti managdaydayaw ken Satanas a saan nga agtomtomar iti droga.” Impadamag ti magasin a ’Teen a ti panangabuso iti droga, pakaruenna dagiti bambanag para kadagiti tin-edyer “nga agturong iti panagdayaw iti diablo, a mamagbalin [kadakuada] a narigrigat a mangilasin no aniat’ talaga a pudpudno ken no aniat’ agpammarang laeng a pudno no matmatan babaen iti panangkullaap ti droga ken alkohol.”
“Ti heavy metal nasinged ti pannakainaigna iti pannakaigamer iti droga a kas iti pannakainaig ti loteria kadagiti napeklanen a sugador,” kinuna ni Raschke. “Ti agtutubo nga agpampannuray iti kemikal (droga) surotenna ti natangsit nga estilo ti biag, kinaulpit, panagtakaw ken panaglablabes iti sekso—nga amin dagitoy ket pakaruen ti agan-anug-og ken nauneg nga umas-asug a timek ti grupo ti heavy-metal.”
Awan duadua, nalaka laeng nga agbalin a biktima ti impluensia ni Satanas ti agtutubo no mapukawen ti nasayaat a panagpampanunotna ket maisukaten ti kinadakes ken kinaranggas.
[Blurb iti panid 8]
Ti maysa ket nalaka laeng nga agbalin a biktima ti impluensia ni Satanas no mapukawen ti nasayaat a panagpampanunotna ket maisukaten ti kinadakes ken kinaranggas
[Ladawan iti panid 7]
Aniat’ ipaspasagepsepyo iti isipyo?