Pannakiuman iti Lubong Dagiti Espiritu
ITI sentro ti kadawyan nga ili ti Laud nga Africa adda maysa a grado a napintas a patakder, napinturaan ti puraw ken berde. Iti kuarto a pagawatan iti bisita, dua a sekretario ti agmakmakinilia. Sumagmamano a tao ti nakatugaw iti sopa, nga agur-uray a makiuman iti babaláwo, ti mammadles.
Iti likudan ti lamisaan a dumna iti opisina, iti abay ti fax machine, ti nagtugawan ti babaláwo. Nabaked, nga ubananen, nakakawes iti nagayad a puraw a roba—nangina, nabordaan. “Mammadles ti amak,” kinunana. “Naipasngayak a mammadles. Dayta ti dinakkelak. Idi agtawenakon iti lima, no mapan agpadles ni tatang, makikuyogak kenkuana. Buyaek no kasano ti panangaramidna iti dayta, ket tinuladko agingga a naigamerak.”
Intudo ti babaláwo ti dakkel a tabla a kayo a pakakitaan iti balabala ti narikut a sistema ti panagpadles nga inaramaten ti tattaona iti adu a kaputotan. Sigun iti pannakabola ti 16 a bunga ti palma, daytat’ sistema a nagsaknapen iti intero a Laud nga Africa ken iti labesna pay. “Umay kaniak ti tattao nga addaan iti amin a kita ti parikut,” kinunana. “Dagiti parikut ti babbai, kinalupes, kinaawan panggedan, panagmauyong, salun-at, ken dadduma pay. Agdepende iti resulta ti pammadles, no agkiddawda kadagiti inapo wenno kadagiti nailangitan a didios. Aniaman ti kasasaad, masapul nga adda maaramid a panagdaton.”
Dagiti nakayugalianen a relihioso nga aramid, agraman ti panagpadles, nakaramutdan, ngem kasta met dagiti iglesia ti Kakristianuan. Iti asideg dagiti opisina ti babaláwo adda dagiti patakder a napinturaan iti puraw nga addaan kadagiti karatula iti sango: Iglesia ni Ari Solomon II, Cherubim ken Seraphim, Nailangitan nga Iglesia ni Kristo, Apostoliko nga Iglesia ni Kristo, Iglesia Dagiti Managtrompeta ni Kristo. Agkakadua dagitoy nga iglesia ken no dadduma awatenda dagiti aramid ti kadawyan a relihion. Kinuna ti babaláwo: “Nabiit pay a makisarsaritaak iti obispo. Immay ditoy. Kalpasan ti panagpapatangmi kadagiti bambanag iti agarup 30 a minuto, kinunana nga agtutungtongkami koma a mabalin a makapagsisinnukat dagiti Kristiano ken dagiti traditionalist (mamatpati iti tradision) iti kapanunotan ken malawlawagan dagiti di pagkikinnaawatan.”
Ruangan nga Agturong iti Lubong Dagiti Espiritu
Masansan a ramanen dagita a di pagkinnaawatan ti kinasiasino dagidiay agindeg iti lubong dagiti espiritu. Iti intero nga Africa nga abagatan ti Sahara, adda nasaknap a pammati nga adda dua a grupo dagiti parsua nga agindeg iti lubong dagiti espiritu. Ti umuna a grupo buklen dagiti nadibinuan, wenno didios, a di pulos nagbalin a tao. Ti maikadua a grupo buklen dagiti inapo, wenno espiritu dagiti natay, a ti akemda isu ti panangipanamnama iti pannakalasat ken irarang-ay dagiti pamiliada ditoy daga. Mapapati nga agpada nga addaan dagiti didios ken inapo iti pannakabalin a tumulong wenno mangdangran kadagidiay adda ditoy daga. No kasta, agpadada a maipakitaan iti umno a panagraem ken dayaw.
Masarakan dagiti umasping a pammati iti adu a paset ti lubong. Babaen ti panangaramatda iti nadumaduma a pamay-an, umadani dagiti tattao kadagiti puersa a nadiosan, iti panangsapul ti pannakaammo iti masanguanan ken iti tulong ken pannakaiwanwan kadagiti inaldaw a parikut iti biag. Talaga kadi a posible ti manggun-od ti tulong iti lubong dagiti espiritu? Impakita ni Jesu-Kristo, a nagindegen sadiay, a mabalin. Kinunana: “Itultuloyyo ti agdawat, ket maitedto dayta kadakayo; itultuloyyo ti agsapul, ket makasarakkayto; itultuloyyo ti agtuktok, ket mailukatto dayta kadakayo.” (Mateo 7:7) Ngem tapno awaten dayta a tulong, masapul nga agdawattayo iti umiso a persona, sapulen iti umiso a pamay-an, ken agtuktoktayo iti umiso a ruangan. No agtuktoktayo iti di umiso a ruangan, mabalin a lukatan ti maysa a mangdangran kadatayo, imbes a tumulong.
Nasken, ngarud, a maammuan no asino ti agindeg iti lubong dagiti espiritu ken asino ti saan. Masapul met nga ammuentayo ti naggidiatan dagidiay tumulong kadatayo ken dagidiay mangdangran kadatayo. Kamaudiananna, masapul nga ammuentayo no ania ti masapul nga aramidentayo tapno umawat iti tulong kadagidiay sisasagana a mangipaay iti dayta. Usigen dagiti sumaganad nga artikulo dagitoy a bambanag.
[Picture Credit Line iti panid 3]
Retrato iti panid 3-4: The Star, Johannesburg, S.A.